ديوان الشاعر الأستاذ محمد رمضان

نبع الحنان

*****

نبع الحنان مين قدها

موجود حقيقي ف حضنها

مهما نقول في حقها

عمر الكلام ما يضيف لها

أصل الحنان ده طبعها

رب السما بيه خصها

قطر الندى من حبها

بنحس بيه من وقتها

إحساس جميل في قربها

أنهار سعادة عندها

مهما تشوف من إبنها

دايما بيبقى ف قلبها

يوم ما اتولدت يا سعدها

كان يوم جميل من عمرها

وان يوم تعبت تحسها

إحساس عجيب يرجها

تسهر تناجي ربها

تدعيه ينجِّيلها ابنها

رب السما يسمع لها

ده دعاء مجاب موهوب لها

وصى عليها ربها

طاعة وعناية حقها

أمي الحبيبة بحبها

روحي وكياني يبوح لها

زيك يا أمي ما شفتها

نبع الحنان إيه جنبها

طَّول يا ربي ف عمرها

واحفظها وارحم ضعفها
*****
محمد رمضان
13/03/2012

قالوا مصر عايزة معونة

*****

قالوا مصر عايزة معونة

من أمريكا دي حاجة مضمونة

قلت يا بلدي بلاش ده حرام

شعبك عايزك تبقي مصونة

واوعي ها يبقى ساعتها صدام

قراراتك وقتها مرهونة

دي موافقتها ها تبقى لزام

وتتحكم فينا برعونة

أوعي ده دينا دين إسلام

وهي عدوتنا الملعونة

لليهود تبني الأحلام

ولينا تهد بكل مرونة

السلاح ليهم ده تمام

ولينا سلاح محتاج لسخونة

تدفع لينا معونة بكام

تجعل منا شعوب مفتونة

مصر ده شعبك شعب همام

هو ليكي خير معونة

ممكن يدفع مش بكلام

ولأمريكا مش مديونة

إنوي وسيبك م الأحلام

واوعي تسيبي نفسك مسجونة

واحنا معاكي مر الأيام

ده شعبك ودي حاجة مضمونة

محمد رمضان
14/2/2012

حاجات كتير مش عجباني

*****

فيه حاجات كتير قوي مش عجباني

كان نفسي اقولها وعف لساني

يا مصر يا غالية مين فيكي الجاني

شبعنا كلام ووعود صبياني

في بورسعيد الناس بتعاني

فعلا ده كان تدبير شيطاني

ليه تفرقونا يا ناس مجاني

احداث كتير وحاجات غايظاني

شباب إبريل شباب عدواني

عايز يولع مصر تفاني

في خدمة مين ؟ ده كله أماني

دي بلدي احميها بكل كياني

وكل مصري شجاع ف مكاني

وجيشنا الحر ده كله معاني

ف وقت الجد ده جيش ميداني

إمتى يا مصر ها ترجعي تاني

بلد الأمان وعدوك فاني

ساعتها يا بلدي أهديكي أغاني

يا رب احفظها وزيل الجاني

محمد رمضان
6/2/2012

شباب وبنات الأيام دي

******

يا شباب وبنات الأيام دي ... من فضلكوا ممكن تيجوا عندي

يا شاب إسمع وانت معدي ... ويا بنتي إسمعي واوعي تعاندي

مرت سنين من أعمارنا ... زادت كتير من أفكارنا

وانتم أملنا وقدرنا ... عايزين نشوفكم أخيارنا

شباب كتير قوي هايفين ... محمول وشات مش سايبين

دول ليل نهار مشغولين ... مع البنات ولا حاسين

لا دنيا تشغل ولا دين ... دول للشيطان بقوا حابين

بنات معاهم ماشيين ... لا أهل يسألوا دول فين

دول للحجاب بقوا لابسين ... حجاب منين الله يعين !!!

حجاب موضة يا سامعين ... بلاش نوضح .. بعدين

الأب مش فاضي .. فين ؟ ... مشغول في شغله يا معين

والأم مش عارفه يا عين ... تربي أو حتى تعين

وفي المقابل عارفين ... في شباب قليل ملتزمين

ودول لدينهم حابين ... ولوالديهم بارين

وبنات كمان محترمين ... حجاب ودين ملتزمين

زي الملايكة عايشين ... دول أحلى من الحور العين

لكن المشكلة بقى دول فين ... أكيد ها يبقوا نادرين

ييجوا الشباب بقى عايزين ... يتجوزوا البنت الزين

يدوروا مش لاقيين ... طبعا ما كلكم عارفين

منين يجيبوا الصالحين ... ده حلم مش أمر مبين

وشاب منكم مسكين ... بيحب وبقالوا سنين

لا شاف حجاب ولا شاف دين ... وأهلوا ييجوا موافقين

بعد الجواز قول شهرين ... أو حتى سنة أو سنتين

يقول يا ريتني يا سامعين ... فكرت واخترت الدين

بقت حياته أمرين ... والحب ضاع ولا عارفين

والحل بقى يا شباب فين ... أكيد كلكم عارفين

نعود بسرعة للدين ... وندعي رب العالمين

يا رب يا قادر يا معين ... إهدي شبابنا الضالين

ياله يا شبابنا يا واعيين ... نبدأ بنفسنا فاهمين

وان كنا ليكم ناصحين ... طبعا لأنكم غاليين

علينا وانتم عارفين ... ده بيكم تقر العين

مجلسنا العسكري

أساتذتي الأفاضل : منذ حوالي إسبوعان كتبت خاطرة بعنوان مجلسنا العسكري يا حبيبنا .. وفيها سجلت وجهة نظري في مجلسنا العسكري .. وكان من المفترض أن أضعها في منتدى الخواطر لكني فضلت وضعها هنا لما فيها من وجهة نظرة قد تتفق أو تختلف من شخص لآخر .. فأردت أن أضعها موضع نقاش .

في البداية أتمنى أن تنال إعجابكم .. ومن ثم فتح باب النقاش في موضوعها مع خالص شكري وتقديريري .

مجلسنا العسكري يا حبيبنا ... ليه تدي الفرصة لغريمنا

يلعب ويعطل أحلامنا ... يخرب ويسبب في ألمنا

ليه تعمل زي حكامنا ... تسكت وتسيب اللي ظلمنا

ده احنا معاك من يوم ما عزمنا ... نمحي الماضي اللي هزمنا

عايزينك تمسح أحزانا ... وتزيل كل حواجز بينا

ليه تخللي الشك يجننا ... ده انت أملنا وانت سبيلنا

اكشف بقى كل اللي خاينا ... خلينا نفضى لأشغالنا

مش عارفين نعيش في أمان ... وانتوا كل شوية بيان

بيانات مايعة ما لهاش معنى ... دايما ما بترويش عطشان

أيدي خفية ومش عارفينها ... إمتى يكون عندنا برهان

وليه تسيب الفلول ... يمشوا يدمروا زي الغول

والبلطجية والحرامية ... سايبينهم من غير مراعية

إمتى تورينا الإنجاز ... ونحس إنك مش منحاز

بعد البنزين والبوتجاز ... أصبح عندنا أزمة جاز

عايزين بقى حل سريع ... واوعوا إياكم والتمييع

ده احنا شبعنا م الترويع ... إمتى يكون في حياتنا ربيع

وان كان في كلامي قسوة عليكم ... فأنا منكم ومش معاديكم

يا له بقى شدوا الهمة ... ورونا إننا أفضل أمة

بأفعالكم زيلوا الغمة ... وخدونا معاكم على القمة

وآخر كلمة أقولها لكم ... أوعى السلطة تبدلكم

وافوا بوعدكوا وسيبوها ... زي ما قلتم في بيانكم

والله معاكم يا حماة العرض ... ده انتم خير أجناد الأرض

تعالوا اسمعوا مني عتابي

أساتذتي الأفاضل : اليوم الجمعة جلست مع نفسي فإذا بي أكتب هذه لخاطرة
البسيطة والتي تعبر عما يجول بنفسي من عتاب لنفسي أولا ثم للأقربن فالأقربين
وأنتم بالطبع من الأقربين .. وأتمنى أن تنال إعجابكم .
مع خالص شكري وتقديري ..

يا نفسي يا أهلي يا أحبابي ... تعالوا اسمعوا مني عتابي

أعاتبكم أنا من دلوقتي ... من قبل ماييجي يوم حسابي

من نعم الله خدنا كتير ... من غير حساب ولا تدبير

لاغني منا ولا فقير ... إلا وخد منها كتير

من غير قناعة ولا تفكير ... ولا شكر لعلي قدير

طمع وحقد مرير ... وعدم رضا بالتقدير

فقير بيحقد ويغير ... وغني من طمعه فقير

دي نعم ربنا ما لها حدود ... لكن الإنسان منا جحود

يا خد وينكر ويحود ... على الحق من غير مجهود

إمتى يا إنسان تحمد ربك ... مش بالكلام لأ من قلبك

ده الرزق دايما على قدك ... لكن الرضا بس معاندك

لو ترضى ها يكون يوم سعدك ... وده وحده كنز ومين قدك

ليه تبص فوق مش على قدك ... وتحط إيدك على خدك

إسعى وارفع من قدرك ... والله يعينك ويساندك

مصر يا غالية رايحة لفين

أساتذتي الأفاضل : بحمد الله تعالى إنتهيت من تأليف خاطرة جديدة عن أحوالنا في مصر
وأتمنى أن تنال إستحسانكم .
ونسألكم الدعاء لمصر بأن يحفظها ويحفظ جميع بلاد المسلمين .. آمين

مصر يا غالية رايحة لفين

بشوف أحوالك وانا حزين

أهلك ناسك مش صابرين

لإعتصاماتهم الفئوية مش ناسيين

حتى شبابك المثقفين

في التحرير والعباسية منقسمين

والبلطجية والحرامية منتشرين

مش سايبين حد في حاله دول فاسدين

وفي شوارعنا كل ما نخرج مش آمنين

حتى ولادنا وفي مدارسهم دول خايفين

فين الأمن وفين الشرطة يا حكومة فين

من غير أمن ومن غير شرطة مش راضيين

وفي شوارعنا غاب مرورنا دول راحوا فين

حتى ان وجدوا يبقى وجودهم شكله مهين

عربيات تلاقيها واقفة على الصفين

والعسكري واقف يتفرج ولا سائلين

والأرض الزراعية الخصبة راحت فين

جاروا عليها ومش سايبين

نقصت جدا واحنا لسه مش حاسين

إن الأرض لما بتنقص أمر مشين

والتموين كنا عليه معتمدين

رز وسكر ويا الزيت مكتملين

أصبح كل ما نيجي نصرف ييجوا ناقصين

مرة الرز ومرة الزيت ونروح فين

والأسعار دايما في الطالع مش نازلين

والتجار كتر خيرهم مش حاسين

فرصة وجاتهم مش سايبينها ولا خايفين

مش لاقيين حد يحاسب دول ظالمين

ليه يا بلدي عايزين نهدى مش قادرين

كل ما تخلص فيكي أزمة تيجي اثنين

احتجاجات ومظاهرات مش نافعين

نعمل إيه يا مصر يا غالية مش عارفين

بس يا بلدي خلاص عرفنا الحل فين

ندعي يا رب يا رب يا خير معين

احفظ بلدي واحميها من الشياطين

ناس شياطين مش بني آدمين دول خاينين

خانوا بلدهم خانوا الدين

انت عليهم إخسف بيهم مش آسفين

واهدي ولاة الأمر علينا المجتهدين

هما سبيلنا وانت أملنا ليوم الدين

واحنا علينا نعمل بقى مش معتصمين

لازم كل شريف يتحرك ويبقى رزين

عقلنا بقى لازم يتحرك مش واقفين

نبني بلدنا نحمي ولادنا نحمي الدين

ياله يا مصري أنصر بلدك ده انت مدين

أيوه مدين لبلدك ياله إوفي الدين

بكره بلدنا بإذن ربي ها توصل فين

الله أعلم بس إحنا مش يا ئسين

بعد دعائنا ومعاه عملنا مكتملين

بكره يا بلدي نعيش معاكي أحلى سنين

ربي اكرمني واتوب

*****
ياربي كلي ذنوب
ربي اكرمني واتوب
انت رب الكون ده كله
انت رب القلوب
قلبي كل مره أقول له
إنت كلك عيوب
إبعد الشيطان وذله
خليه يهرب هروب
إوعى مره تبقى خله
إوعى ده اكبر كذوب
وصاحب الصدوق كظله
وامشي معاه ف الدروب
وان جالك المحتاج تدله
ع الخير وفرج كروب
واوعى فعل الخير تمله
ده انت عملك محسوب
حافظ على لسانك وشله
لو ف يوم حب الذنوب
أي شر جه تفله
ده الحديد ممكن يدوب
قوة الإيمان تقول له
وقتها يصبح حبوب
ربي اكرمني واتوب
ده انت علام الغيوب
محمد رمضان
30/01/2012

الفلوس

[b]أساتذتي الأفاضل : بداية أود أن أوجه الشكر للأخت والأستاذة الفاضلة : ثراء

فقد كان لله ثم لها الفضل في ضبط هذه الأبيات المتواضعة لتصبح شعرا .. فلها جزيل الشكر

وهنا يسعدني أن أقدم لكم هذه المقطوعة الشعرية مرة أخرى بعد التعديل في هذا المنتدى وأتمنى أن تنال إعجابكم

مع خالص شكري وتقديري ..

[b]الفلوس يا ناس الفلوس ... ياما زلت ف النفوس

اللي محتاج الفلوس ... وشه دايما في عبوس

واللي مش محتاجها تلقاه ... ع الفقير عمال يدوس

والفقير من حاجته تلقاه ... ع الإيدين عمال يبوس

والعفيف منهم لا يمكن ... ينحني دي عزة نفوس

هو ينفع حد يبقى ... يبقى مش محتاج فلوس

أيوه ينفع بس لما ... ييجي إيمان ف النفوس

الغني ساعتها يدفع ... للفقير حق الغموس

والفقير ساعتها ممكن ... يبقى فرحان مش يؤوس

والشباب بدل ما يقعد ... في البيوت جالس جلوس

يسعى يتحرك ويجري ... هو مش محتاج عروس ؟

والتاجر بدل الكتير ... بالقليل مش راح يحوس

لما يكسب اللي قده ... يومها هاتشيله الرؤوس

واصحاب الأعمال ساعتها ... يدوا للعامل دروس

يدوه حقه وبزياده ... مش بقلعهم الضروس

كل واحد منا ممكن ... يبقى عنده كتير فلوس

لما دينا الغالي يبقى ... أقوى حاجة ف النفوس

يا شباب ميدان التحرير

أساتذتي الأفاضل : اليوم هو 25-1-2012 ذكرى ثورتنا المباركة الأولى ..

وقد كتبت خاطرتي هذه منذ فترة ولكني أجلت وضعها هنا إلى هذا اليوم والذي أتمنى أن يكون يوما مباركا

وإليكم الخاطرة وأتمنى أن تنال إستحسانكم .. مع خالص شكري وتقديري .

ياشباب ميدان التحرير ... اوعوا اياكم والتدمير

ده انتوا اللي عملتوه لنا كتير ... وكفاية علينا التحرير

حررتونا من عهد مرير ... عهد ما كان عنده ضمير

كان الواحد منا أسير ... وربنا يسر كل عسير

واوعوا تقولوا احنا اللي عملنا ... ده اللي نصرنا عليم وخبير

هو الله صاحب التقدير ... كان لوقوفكم خير نصير

دوركم بقى من غير تفكير ... تبنوا بلدكم بالتعمير

مش كل شوية تعكير ... ده انتوا أملنا في التغيير

حكم العسكر ما هو مصيرنا ... لازم نصبر ونقول خير

هو وعدنا بكرة يسبنا ... وان ما عملش بوعده نثور

لازم نهدى ونبني بلدنا ... ده اللي ما يبني في بلده يغور

اعتصاماتنا والا عملنا ... هو اللي ها يبني لنا قصور

وانسوا الماضي ده همه كبير ... وها يودينا لفكر خطير

عايزين بقى ننسى التكدير ... ونحس اننا شعب كبير

مش بالإسم لازم بالمعنى ... وبلاش يبقى شعورنا مرير

ليه تدوا الفرصة لدخيل ... يدخل ويدمر تدمير

من غير ما نقول لكم ده كتير ... ونطلب منكم التفسير

ابدأوا ياله في التغيير ... واحنا معاكم مهما يصير

» لقاء تلفزيوني احتفال بصدور ديوان الشاعر محمد ربيع محمد كسر الازاز
» ديوان الشاعر محمد عبد القوى حسن
» فيديو - برنامج يوم جديد مع الشاعر محمد ربيع حول ديوان الطاحونة
» ابن الأستاذ محمد رمضان في التدريب
» الأستاذ محمد رمضان علي كرسي الإعتراف