درس في الرسم !!!!

كان يوم زي باقي الأيام

في دماغي كومة أحلام

عن مستقبل مش شايفينه

وحاضر مليان بالأقزام

قمت منادي على إبني وقايل:

يا مازن ،كراسة رسمك ومعاها شوية أقلام

إتعجب من طلبي وقال لي : تسمحلي أدخل وأنام

قلت له حاضر ، ده انا قلت حتطلع رسام

هز دماغه ولمعت عينه ، جاب كراسته والأقلام

قال لي :أرسم لك بطة ووزة ولا أرسم لك برج حمام

قلت : إرسم لي يا مازن علم ، تعرف ترسم لي أعلام

إرسم علم الوطن الغالي وخلي النسربشدة يبان

فالي بخفة : لازم نسر ؟؟

قلت : النسر علامة النصر

شامخ دايماً مهما تعدي عليه أزمان

وإرسم جندي شايل علمه بيرفرف في كل مكان

وإعرف يا بني إن جنودنا خير الجند في كل زمان

واللي بييجي يا بني عليهم ، عمره ما بيعيش في أمان

مصر حتفضل مصر بجيشها وغيرها راح يطويه النسيان

واللي بيقتل شعبه وجيشه، ده عدوك دايماً وجبان

رسم الصورة وغيرها وغيرها وراح علقهم ع الحيطان

حتى الطفل ف حبه لوطنه ،بنزرع جواه الإنسان

لكن اللي بيغرس حقده جوه ترابه

طرحه بيجني مصايب سودة

واللي بيعرف ربه كويس ،عمره ما يعاهد شيطان.

أبو مازن
19-10-2013

أجمل لوحة لأجمل أب لأجمل ابن لأجمل وأعظم جيش
تستحق تحية عسكرية
وربنا ينتقم من اللي عايز يأذي جيشنا
جميل يابو مازن

كعادة أبو مازن معنا ومع كل من يقرأ له

يجبره علي الجلوس قرفصاء لتلقي درس فكري وأدبي من نوع فريد

يفرض علي كل مار به أن يتمايل مع كلماته طربا واعجابا

مشاركتى بالرسم