زجل بعنوان الخوجه (المعلم )

بسلامته أتعين خوجه يعنى أستاذ ومعلم
أهو واحد وسط الهوجه والكار أهو ياما بيلملم
أول تعيينه ما جاله هيص فرحان بشبابه
مبسوط يسرح بخياله السعد بيفتح بابه
شوف من ذوقه وجماله على كل الناس بيسلم
بسلامته أتعين خوجه يعنى أستاذ ومعلم
وقتن ساعة العصريه بيخش يقيل حبه
بعديها دروس خصوصيه مع نوع بشرى بيستغبى
يشرب بقين الميه ويقوم ع الشقه يضلم
بسلامته أتعين خوجه يعنى أستاذ ومعلم
أنا قلت كويس جدن بكره هيتعدل حاله
وأتارى الفرخه هتدن لو يفتح بيت بعياله
يقبض كام مليم نقدن وقصاد الخزنه يبلم
بسلامته أتعين خوجه يعنى أستاذ ومعلم
وف يوم مش عارف أيه طالب هزأه بصراحه
أتنحرر عم البيه والواد تنح بوقاحه
راح ضربه قلم بأيديه والواد أترمى يتألم
بسلامته أتعين خوجه يعنى أستاذ ومعلم
الواد من حظه أتعور والجرح ف وشه خطير
يبقى الموضوع أتحور والبركه فى العصافير
قالوا لمديره تصور كان نازل فيه بيلكم
بسلامته أتعين خوجه يعنى أستاذ ومعلم
كبر الموضوع وأتحول لنيابه وقلة قيمه
قصره مش كان م الأول مش ضرب كمان وشتيمه
تلاقيه قاعد يتسول كان لازم يعنى أتعلم
بسلامته أتعين خوجه يعنى أستاذ ومعلم

كلماتك جميله تنم عن موهبه متأصله أرجو أن أرى أعمالك فى القريب

جاسر جمال الدين الشاعر

أستاذ العامية وفنانها المتألق جاسر بك

كيف لا أحسد نفسي وهي تنعم بأغانيك وقصيدك

قرأت الكثير من الأشعار والأغاني


والقليل منها استوقفني مثلما تستوقفني أعمالك الراقية

دمت منبر للسمو بالكلمة


.

جزيل الشكر والعرفان للصديق الجميل أكرم ..أنا الذى أحسد نفسى على تواحدى معكم
فأنتم خير العون ونعم الأصدقاء .. كلماتك الجميله أثلجت قلبى وأسعدتنى
وجعلتنى مصر أن هناك مثقفين حقيقيين يدركون بوعى ماهية الأبداع ودوره فى المجتمع
سعيد بكلماتك يا أستاذ أكرم

جاسر جمال الدين الشاعر

أشكرك يا صاحبى حماده على كلامك الجميل ده ..
أدعيلنا بس ربنا يوفقنا جميعا فى حياتنا
صاحبك..جاسر

أشكرك وسعيد جدا بتواجدك وتشجيعى يا أم زياد
جاسر