قصيدة (أوهام أبو الرياح ) مهداه إلى الصديق الرائع أبو العلاء

أوهام أبو الرياح

دخان سيجارته بيترسم سلم طويل
يطلع فوقيه لحد أحلامه الكتيره
كان نفسه قلبه يتفرش زي الحصيرة
يلم كل الناس سوا
كان نفسه في شوية هوا
دافيين يخشوا السدر يشووا أنته
أحلامه مش أبداً كبيره
لو فيلم بس يكون رومانسي
ويشوف في بطله نفسه وهيه بتدوب ا شتياق
ودموعه توصل شفته
من كسفته .. يمسحها بصوابعه القماش
كان نفسه في شوية أمان .. لكن خسارة
حبه هوا .. قطَّعوا عليه خيط السيجارة
والسلم المرسوم صبح
زحليقه بتمزع في روحه
تطبع صور متكرره لرسمة جروحه
واتنعكش الدخان في ثانيه .. بقى حاجه تانيه
عفاريت بترقص بالسموكن
و حيطان مطرطشه بالوجع بتمرمطه
ترميه بعيد .. وترده ليها وتخبطه
وتفرفطه ع الأرض حفنه من حروف
حاطط دماغه وتحت منها شنطته
يحلم يطوف .. على ضهر صواريخه الورق
تاخده لبعيد .. يتمنى يعقد دمعته عقده بشنيطه
ويمسح دمه فوق أقربها حيطه
يشرب في كوز الحجز أصوات العيال
الهربانين من حصة الدرس الممله
وكلام حبيبته اللى أتحرق كفه بنَفَسها
واشترت من جوه راسه حبه النوم البساط
وأتربعت جوه السلوك – والسكه محشوره بعياط
متعاصه برماد النفس
كان نفسه يحشيها فـ عروقه
كان نفسه تلمح لحظة واحدة من شروقه
ويشر تحت عنيها هربان م السؤال
كان نفسه يسرق من كلامها .. كلمه واحده
كان نفسه حتى ولو إشاره
لكن خساره – حبه هوا قطعوا عليه خيط السيجاره
والسلم المرسوم صبح زحليقه بتمزع في روحه
تطبع صور متكرره لرسمة جروحه
واتنعكش الدخان في ثانية – بقى حاجه تانيه
سيرك مليان بالأراجز
وعجوز معدى السكه جرى مع إنه عاجز
وعنين بتجرى بعكازين ما تحصلوش
ينداس على الأسفلت – لوحه نقصاها الرتوش
نقصاها دمعه تتركب بذوق .
. وفنجانين
وقهوة ملهاش وش تضحك
وكام صباع من غير ضوافر بيكرشوا الضحكة
اللى لزقت ع الشفايف
وبَكْرَه لسه بتكر الساعات وتلخفن الرجلين فى خيطها
يرمى السؤال .. وكأنه بيقطع حروف الحلق
يطلع بالدما .. وكأنه مستنى غمامه من السما تضلل فوقيه
والبرد داخل من صوابعه ولا الأبر
والبحر حالف يشربه .. ويجربه شربه غسيل
قبل العشا جايز يفيد .. ويرجعه فوق الرصيف
مختوم فوقيه بالملح .. ومرار مستوى
والبحر لازق فوق كتافه مزهقه
بيعضه بسنانه الطرية
كان نفسه يرمى البحر على أخر دراعه
ويحذر الناس من خداعه
لكن بتهرب منه لحظات الجسارة
لما حبه من الهوا قطعوا عليه
خيط السيجاره
والسلم المرسوم بقى
كرسى اعتراف ومشنقه
والحزن داخل من وسع
كل البيبان متفندقه
وكأنها زحليقه بتمزع في روحه
تطبع صور متكرره لرسمة جروحه
واتنعكش الدخان
في ثانيه بقى حاجه فانية

بسم الله ما شاء الله

كم تمنيت لو كان هذا الدخان سحابة .. فهي أيضا دخان وأشبه به

فكما تعلم أن التدخين ضار بالصحة أما تعاطي السحاب فلم يرد به نص مؤكد

Very Happy

أخي الشاعر القدير

هكذا ينظر الشعراء والأدباء لكل شيء من زاوية خاصة جدا

تناول جديد للدخان عامة رسمت من خلاله عدة لوحات شعرية

شكرا لك

ربنا يستر من اللي جاي

Very Happy

.

أشكرك يا أستاذ ..أكرم ...سعيد بهذه الكلمات التى برغم بساطتها تحمل فى طياتها رؤيه ثاقبه
ووجهة نظر تنم عن أديب متمرس تمنياتى بالتواصل ..لأنى أعتبر هذا المنتدى ورشه أدبيه
أتعلم منها الكثير ..
شكرا جزيلا

جاسر

فناااااااااااااان يا أستاذ جاسر
فنااااااااااااان يا أستاذ جمال
لكن سؤال هل أسمك الحقيقي جاسر ولا جمال
لكن عن جد شاعر من النوع الثقيل جدا واللي يتعمل له ألف حساب

سعيد بمرورك عزيزى أخر نكته .. أريد فقط أن أوضح ..
أسمى .. جاسر جمال الدين ...
شاعر عاميه .....
قام أخى وليد بعرض أعمالى من خلال إميله فقط ..
أشكرك للمره الثانيه
وبالفعل سعيد بهذا التعاون

شكرا للتوضيح يا أستاذ جاسر وعن جد أنت شاعر موهوب استمر حتي ترقي سلم المجد والشهر أن حري بها

شكرا علي هذا الشعر الجميل

الصديق العزيز جاسر
اولا اشكرك على الاهداء واتمنى ان اكون على قدرة
وشرف لنا جميعا تواجدك بالمنتدى نستمتع بما تخطة اناملك من روائع العامية .
اسمح لى ان اقول بالتعليق على قصيدتك فى وقت اخر كى اقرئها جيدا لانى اراها كنص فلسفى اكثر منها قصيدة عامية
حيث الصور المتداخلة وطريقتك الجميلة فى السرد . لى عودة . تقبل تحياتى

روعه ياروعه انت قدير في رسم الصور بشكل فذ

أشكرك على هذه الكلمات الرقيقه
سعيد بالتواصل

جاسر

» قصيدة رائعة للشافعي عن الصديق
» الصديق الرائع " للاصدقاء فقط "
» أوهام طبية يعتقدها حتى بعض الأطباء
» قصيدة رائعة تحاكي قصيدة صوت صفير البلبل المشهورة
» قصيدة قصيدة القدس للشاعر عبد الرحمن الأبنودى