لكل سؤال جواب في مطبخ الاعلامي

كيفية عمل الشاى


على فكرة انا بضحك بس انا عاوز اشارك بس

وعلى فكرة انا فى الكشافة
يعنى الطهى الخلوى كلو
يعنى اجمل الاكلات المحروقه والتى تسبب وجع بالمعدة

لكم من جزيل الشكر والتقدير على هذا الموضوع

العصيدة آآآآآآآآآآه من العصيدة
كنت باكلها فى البلد جدتى كانت بتعملها الله يرحمها وماما فشلت فى أنها تعملها زى جدتى ونفسى آكلها وبنفس طعم الكانت بتعمله جدتى
ياترا ممكن لو تعرفى الطريقة ؟

رانيا من فضلك
طريقة عمل الحوواشى
اثابك الله

بالمناسبه عملت الارز للسمك بطريقتك
وطلع جميل جدا

liena كتب:

رانيا من فضلك
طريقة عمل الحوواشى
اثابك الله

بالمناسبه عملت الارز للسمك بطريقتك
وطلع جميل جدا

اهلا يا حبيبتي بتوحشيني

والف هنا على قلوبكم يارب

بصي يا ستي

اولا هتيجيبي العيش الشامي او البلدي
اللي متوفر عندك
اما اللحمة المفرومة هتبليها
بصل - ملح- فلفل -قرفة
ولو عندك دهن لحمة ممكن تقطعيها مكعبات صغيرة
وتضيفها على اللحمة مع التوابل
وياريت تقعد في التلاجة شوية عشان اللحمة تشرب التتبيلة
وبعدين تجيبي العيش وتفتحيه وتدهني من جوة وبرة
زيت زيتون او زبدة
وبعدين تحشيه اللحمة نيه

وترصيهم في الصاج والوش يكون مدهون وتحطيهم في الفرن
مش هياخدو ربع ساعة
وبالهنا والشفا
لو فيه حاجة قوليلي

طول عمري اسمع عن المفتقة ومرة واحدة جبناها من عطارين الي علي أول الشارع عند الحسين ومن يومها وانا كرهتها وناس قالتلي اكيد كانت محروقة سنة زيادة
لو تعرفي طريقة المفتقة يبقي كتر خيرك بس خلي بلك دي من ايام جدتي وجدتك

أم البنات كتب:

طول عمري اسمع عن المفتقة ومرة واحدة جبناها من عطارين الي علي أول الشارع عند الحسين ومن يومها وانا كرهتها وناس قالتلي اكيد كانت محروقة سنة زيادة
لو تعرفي طريقة المفتقة يبقي كتر خيرك بس خلي بلك دي من ايام جدتي وجدتك

صباحك سكر يا ام البنات
حااااضر من عينيا انت تأمري

شوفي الاول في مقادير بسيطة لو هتعملي برطمان صغير ومش هيقعد عندك كتير

بسم الله

2كم عسل اسود
3ملاعق سمسم
نصف كوب زيت ذرة
مكسرات زي ما انتي تحبي ( -فول سوداني فستق)
3 ملاعق دقيق
ربع كم حلبة مطحونة

الاول نحط الزيت على النار ولما يسخن ننزل بالدقيق ونقلبهم كويس لحد ما يصفر
وبعدين ننزل بالحلبة المحوجة ونقلبها شوية لحد مالريحة تطلع
وبعدين هنضيف العسل شوية شوية مع التقليب المستمر لحد ماتخلص الكمية ونقلب ونلاحظ ان القوام بيتقل
ونهدى النار واول ما العسل يبتدي يغلي شوية نشيله من على النار
ونحمر المكسرات في شوية زيت ونضيفهم على العسل وممكن نحط في الاخر جوز هند
بس ونسيبها لما تهدى ونعبيها في برطمان


الطريقة الصعبة شوية واللي بنستعملها عشان نعمل كميات تقعد معانا

المقادير:-
5كيلو عسل اسود
ربع كيلو تحويجه
ربع كيلو سمسم
نصف كيلو جوزهند
ربع كيلو حبة البركه مطحونه
كتيره ضانى ب3 جنيه
حبه خضراء بجنيه
كيلو ونصف زيت
الطريقه:-
1-تنقع الكتيره الضانى فى كوب ماء ساخن لمدة 6 ساعات.
2-تنقع الحبه الخضراء بعد تكسيرها فى كوب ماء ساخن لمدة 6 ساعات.
3-يحمص السمسم ثم يضاف الى الزيت ثم يضاف اليهما جوز الهند فى اخر تقليبه.
4-يضاف الزيت الى العسل ثم يضاف اليه التحويجه وحبة البركه والكتيره الضانى وماء الحبه الخضراء فقط مع مراعاة فوران العسل عند اضافته للزيت.
5-تؤخذ عينه من الخليط كل فتره حتى تصبح غليظة القوام عند ذلك يضاف عصير نصف ليمونه وتقلب وتطفأ النار.
6-ثم تترك لتبرد المفتقه وتعبأ فى برطمانات
كده خلصت الطريقه
بس فيه ملحوظه مهمه
الحاجات اللى فاتت طبعا دى كلها تتجاب من عند العطار
وبالنسبه للحبه الخضراء بعد ماتنقعيها تاخدي ميتها بس اللى اتنقعت فيها يعنى هتصفيها مش هتاخدي الحبه الخضرا نفسها



يارب اكون عرفت اشرحها كويس يا ام البنات
وعلى فكرة المفتقة بالرغم من انها اكلة قديمة اوي بس قمة الغذاء وخاصة للاطفال
ولو عملتيها حلو وعجبتك هقولك على بسكوت المفتقة ده تحفة

يا خبر لا انا اشتريهم اسهل بس المشكلة ان معظم العطارين في الفيوم مش بيبعوها وزي ما قلت يوم ما اشتريتها اشتريتها من عن خضر العطار اللي عند الحسين ومكنتش حلوة خالص
لكن ماشاء الله عليك يا قمر شاطره
ومتشكره اهتمامك وذوقك يا أم الذوق كله