ديوان الشاعر محمد عبد القوى حسن

الشاعر الأديب / محمد عبد القوى حسن

الشاعر محمد عبد القوى حسن أحد شعراء محافظة المنيا / العدوة / بنى عامر

المناصب الأدبية :

عضو اتحاد كتاب مصر

رئيس لجنة شعر العاميه باتحاد كتاب مصر بالمنيا

الجوائز الأدبية :

حاصل على المركز الاول فى شعر العاميه عام 99 على مستوى الجمهوريه

دواوينه :

وله مجموعه اصدارات على نفقة الدوله منها

رساله الى قلبى مجموعه اغانى عام 1988

عوده قبل الرحيل .. ديوان بالفصحى عام 88

باغنيلك .. ديوان بالعاميه صادر عن هيئة الكتاب

عيونك .. بالعاميه .. عن هيئة قصور الثقافه

اسمعينى .. عن سلسله نفرتيتى

واخيرا غناوى الروح على نفقته الخاصه

له مجموعه مسرحيات وطنيه منها

صح النوم ياعرب

محمد الدرة

وطالت ليالى الظلم

تسافر حبيبتى

وتاخد معاها امانى العمر
تسافر عيونى وقلبى القمر
تسافر لاخر حدود احتمالى
وتاخد معاها قليب انشطارى
تسافر وتاخد اغانى الليالى
وانا بين ماسى وحزن انتظارى
اعانى السهر
اعانى القهر
اعانى سنينى وحنين
وشطوط انبهارى
بحارى بتوسع
وامواج بحارى بتعلى وتعلى
تشيلنى تحدفنى لعمق انتحارى
بحارى مديده
اهاتى شريده
ليالى شديده وقاسيه
بقسوة عناد القدر
تسافر حبيبتى وعيونى القمر
وبعد الرحيل المرير العسير الطويل
البخيل الهذيل
ارانى اسير الغدر
اسير زكرياتى واهاتى
ووحدة ساعاتى
تطول الليالى على
وما فيه ايدين بين ايديا
ولا نظره حلوه بتحضن عنيا
يرفرف قليبى
وطيف الحبيبه يهفهف
فيهتز قلبى
لعنف الرحيل المفاجىء
وارحل واعود
فى وجهى سدود
ولا شىء يحتضنى
ويمسح دموعى
صحارى وجفاف
سنينى العجاف
وما عدت اخاف
على ايه اخاف
اللى كانت بتحضن اهاتى تسافر
واللى كانت بتقرى امنياتى تسافر
واللى كانت لى مرسى
ولا يوم بتنسى
حنينها وانينها
فرحة سنينها
تسافر وازكر مكانها
سوالف حنانها
عطورها
قصايد شعرها فى عيونى
ودفىء الايدين الحنونه
فى حين ما تلامس
اصابعها يدى
شعرها الحريرى
وضحكة عبيرها
واذكر
وما عدت انسى
كؤؤس المحبه
مع عندليب ابتسامة قمرها
فى لقايا
ورقص ابتهاجها
فى ساعة غنايا
واحضان نسيمها
واحلام نعيمها
ورقة مشاعر مشاعر عيونها
واذكر واذكر
فى يوم اتقابلنا
فى اول بنايه
فى عش العشوش الهوى
والجوى
واول كلام من شفايف حبيبتى
واذكر خدودها فى خجلها
واذكر كسوفها وعسلها
واذكر حبيبتى فى كل انبهارها
فرحها وغضبها وزعلها
حبيبتى المسافره لوين السفر
والدروب اللى ياما
مشينا فى ظلالها
لوين المطاف والطواف
والرحيل المباغت
لوين
والساعات والسنين
وابتسامة ربيع ابتداء السفر
والخطر
والربيع الزهر
انشطار العمر
حبيبتى تسافر مسافره
ياويلى فى بعد السفر
ياويلى
ياويلى
ياويلى فى بعادك
حبيبتى
اللى مو كان بيدك سفر
اعاهدك حبيبتى
بقدر الماسى
اللى راح اعانى مرارها فى بعاك
ورغم ابتزازى فى سكاتك
اللى انى افضل اصون حبنا
وافضل على الود
احافظ على عهدنا
بحبك ولكن
جميع الاماكن
بتاخدك وتتركنى وحدى
بحبك
وماراح يبقى من الحب بعدى
بحبك وعارف بانك سجينه
رهينه وضحيه
حبيبتى القضيه
ماهى منتهيه
حبيبتى
قضية هوانا وعذابنا ابتدت
بدايتها صارت
مع ابتداء السفر
يالوعة قليبى فى بعادك
احسك واحس اغترابك
وانادى عيونك فى كل الثوانى
برغم انى اعانى النداء
ورغم انى اعرف
ماحد راح يرد على النداء
ولكن انادى
واظل انادى عليكى
وادور ايديكى
اقبلها مره
واحضنها مره
وبعديها اكتب كتاب السفر
الرحيل الاخير
فهل تقبلى برحيلى النهائى
قبل ما احضن ايديكى
وهل تسمعينى
انادى عليكى
وهل تقبلى اهدى روحى
جروحى وبوحى
لكفك
وهل يالمسافره الحبيبه
الحبيبه المسافره
للسفر من رجوع
حتى تجف الدموع
وهل راح اشوفك
قبل انتهاء العمر او اموت
وانا المسافر للقبر
اشهد بانى
ماعانيت الموت الموت الحقيقى
بقدر انى عانيت السفر المفاجىء
حبيبتى لوين السفر

عدى الشهور
-----------------

يابنت مشمش ربيعك

فى الفؤاد خضر
لون زهورى
ووسع الشرايين
فتح انسجامى
بابه للضحكه
غنت يمامات الهوى
على وصلة التراحيل
سافرت عيونى لجنونى
فى رحله بلا مواعيد
هل قلتى ام حاتنعيد
كل الكلام الجديد
زى اللى ما اتكرر
بيسيل لعابى لغيابى
الشهد متكرر
وانا مش هاكرر دخولى
لجناينك الوحمانين
لاتشتهينى لسفاينك
فى الهجير
لامواج حنين
قزمى اكتبينى فصلتين
فى دفاتر المغرمين
للغربه والحكايات
قطرك ماعمروش فات
قطرك على رصيف الفؤاد
طالع فى يوم العيد
ياام الامل مندمل
طايلاه ايدين تشريد
خدى الايدين الشفيفه
تمسح سنين الغبار
يوسع فى عينك مدار
بكره بلا ترديد
ولا كنتى ساره ضحكتك
للاحتلام بيا
لكن انشطارك
للربيع بيجود
صدف البحار البايشه
فى عروقك
زاينه المحار اللى جارح
خد حزن شطوطى
ارمى بياضك جوه
منديل الحنين
تلاقينى زادك بين
صحارى السنين
رابط فى اوتادك
حبل الخلاص رابط
والباب داظابط
فتحته للحضور
عدى الشهور
واتصبرى ماتدور
ابدا عليكى الليالى
بطول مياه البحور
وان طيفى
غاب انتداب نسيان
اقرى كتابى ف
ى سما روحك
لقنيه بوحك
يوصلى دوحك
لو هواكى
لزنقة الشرايين
ر
هـ
ى
ن

وتدور عليك الليالى

.

وتدور عليك الليالى
مثل مادارت علينا
تشتاق عنيك الامانى
مثل ما اشتاقت عنينا
لاهاندهك تانى
ولا لفراقك هاعانى
ولا عدت اذكر هوانا
اللى اندبح ع الطريق
ونسيت لحظة لقانا
ونسيت كلامى الرقيق
نسيت شطوط مرسانا
ضاع من عنينا البريق
كنت فاكر انى بعدك راح اموت
كنت فاكر تعلن الدنيا السكوت
كنت فاكر الليالى
تتكسى بلون السواد
كنت فاكر الاغانى
ترتدى توب الحداد
كنت فاكر الشجر
ورقه راح يدبل عليك
كنت فاكر القمر
طلعته من بين عنيك
كنت فاكر البحر
غنوته فى الليل تغادر
انت ترحل .. بعد منك
غنت اطياف البوادر
انت ترحل .. تكتسى الدنيا بزهور
عمر فرحتنا يطول
شكل بهجتنا انكسى بالاخضرار
والورود نضجت بلون الاحمرار
والسدود اتفتحت
والكآبه روحت
والنخيل هفهف وميل
ورمى على قلوبنا السلام
ياسلام ما انت بغرورك
كنت فاكرنا حانبكى
كنت فاكرنا حانشكى
كنت فاكرنا حانحزن
وف سواد الليل حانسكن
لا .. لا .. انســــى
لا .. لا .. انســــى
داحنا بس
حبنا .. كان عطف منا
واحنا بس .. كنا نفتكرك فاكرنا
داحنا بس
ما عمرناش نجرح ونغدر
وف غرورك نتركك
ع القسوه تقدر
بس جاى اليوم اقولك
لا لا ترجع
مستحيل تانى اصدق دمعتك
مستحيل تانى خطايا
راح تصاحب خطوتك
مستحيل وردة هوايا
راح تزين سكتك
مهما راح بكره تحاول
توصف الفرقه ونارها
للنيران انا راح اناول
قصتك بجميع فصولها
والرماد ماراح تطوله
الرياح هاتشيله منك
والغرور هاتنول ميوله
والعناد راح يكى عنك

مستحيل تانى هاترجع
مهما تبكى ومهما تدمع
مهما تحكى عن ضياعك فى غيابى
مش هاتدخل
اصل قلبى .. من خداعك
سك بابى
ولغيابك حل قلب ابيض
وله صبح انتسابى
والقلوب دايما تدوب
فى اكتسابى واقترابى
اما انت روح ياهوه
لك غيابى واغترابى
ومستحيل

دبنــــــــــا
-------------------

بين شطفة قلبك النعسان
فى موالى
شبيت
وبعلو الصوت
وبملو ضلوعى ناديت
حبيتك ملو البيت
فى عيون الطفل افراح
ورميت الليل
على ضهر الكون سواح
انا مين يرمينى
لبحر سنينى الاولانيه ارتاح
البنت ? عينى عيدان اغصان
فنجان مزدان
سقينا حليب الدهشه بكسر الحلم
الداخل صحن العمر
شربنا الشوق واللهفه
قبابى قيشان عناب
لاعرفنا طريق العتمه منين تنجاب
ولاهيه لسيرة حس الوقت براح
ولكن غافلتنا الدنيا بصناديق الاسرار
قلبت فى الدفه
وهدت زفة شوق
نزلت فى غويط البحر
ودبنا فى الاعماق على فوق

ام بسمه مرقرقه
----------
اه ياحبيبتى يام بسمه مرقرقه
قلبى اللى مش قادر ينام
لسه بيحلم باللقا
والحضن لخضر سندسك
يملى المكان
قلبى اللى كان عطشان حنان
دخل الجنان
فاض بالهوى لما ارتوى
وخضر ورود شال الحدود
ورسم لفجرك ميت محطه للوصال
شيلى وحطى كما اليمام
العش مفرود بالوئام
واما انسجامك يرتمى
فى حضن الغرام
املى قليبى انسجام
يام الضفاير ? الحرير
قلبى الاسير لسه بيحلم اغنيات
ويعيش ساعات الليل ثوانى
وثوانى ليله تطول ساعات
على شط فرح الامنيات
فارش قصايد فرحتك
فوق طرحتك
راشش حيطان قلبه ابتسام
لمحبتك
واما المكان يديق عليه
يدخل بسرعه لسكتك
تاخدى قليبى من ايديه
وتخشى بيه لحنيتك
ياضحكتك
ساعة بتفرد كون هوانا
وتسهر البدر فى سمانا
علشان يشاهد طلعتك
يطلع عبيرك من لقانا
والا رحيق توب وردتك
يام العيون فيها الدفا
اسقينى من عينك شفا
واما يطول بينا الطريق
والحب فيه يصبح رفيق
خلى النسايم ? الشفايف
تترسم
واللحظه فينا تتحسم
تجمع قلوب متشوقه
يدوم اللقا
على شهد بسمه
مرقرقرقه

بيشتهيكى البدر للرحله
وبتستحما نظرته فى عنيكى
وبتحتمى فى سندس هواكى سنين
ونوسع الشرايين بضحكة صفا
من بين عسل روح اشتياقنا
لاندهاش مهجة هوانا
وارتياح القلب بين نهرين رضا سنينك
انتى ابتسام زهر الربيع لليائس الحائر
حجة وداع احزان بتتراكم
على سموات حنينك
ليكى اندهاش عطفة فؤادى وغربة الحواديت
ليكى عصير المحبه ونشيد البرتقان
فى جنان حوريات البدر فى السموات
وقت انتعاش فهرس حلاوة جبهتك
مع طلعتك ماتهل
وحلمت بالفردوس فى عليين ندهتك
وركبت فرس اشتهائى لسرسبة الحليب
بين فجر ضحكتنا
قام النخيل هفهف اصيل من نيل
جنايب رقرقة القبل
كتب الكتاب للضى
ورمى هواه للمى
وشوش صدف اصداف محبتنا
انتى اكتفاء الرغبه والعذابات
وانتى شفاء العله ? العذابات
وانتى ان ركبت قطر السكات ساعات
استنى فى قدومك
واقرى فى معلومك
الاقينى مرعوش ومحموم
لا تهرب نجمة السموات
مين اللى خلانى اضعف
من نفسى قدامك
وانا اللى كانت ما تقدر تميل قلبى
كتايب الحوريات
انتى الوحيده الفريده
فى جناين البرتقان
ولمون اشتهائك طلاكى
خلاكى حورية الملكات
ملكة الحوريات
قاعده بتقرى الشعر خصيصا
فى عليين روحى
وتستحمى زكريات
وتكتبينى قصيده فى عنيكى
على موسيقى التكوينات
يطلع هواكى من حدا الفرحه
والا هواكى يهفهف الطرحه
والا نداكى لطلعة منشرحه
والا احتماكى بقلبى يروينى
والا من شطفة قلبك النعسان
والا نداكى يموت ويحيينى
خشينى بخت ونصيب
وانطفاء ولهيب
وانا ادخلك خلسه
من غير اذان ولا استئذان
ولا بوابات ولا حرس وقصور
محاوطه القلب والرجفه
مع رعشة اللزه
ولزة الهزه
وهزة المزه
ومزة الدوق اللى زاد
ع الوصف والاشعار
ودوبنى انتعاشى وغربه اغرب
من اكتمال الرغبه فى المستحيل
فى رحلة الواق واق بنات
وغربة الحوريات لوالى ومرجانات
اطفال محبه فى غيطان عطفتك
تطلع تنادينى .. اعطش تدفينى
انعس فتهدينى لسكة الاحلام
احلامى مش ليكى
احلامى انا بيكى
وفتى اشتهائك كانت
بتخجله النظره
وتعذبه الضحكه
وتسهره الفرحه
دلوقتى داخل
لاعمق عمق فى بحارك
سابح فى انهارك
سكران فى نظراتك
انتى سكك متاهات جميله
بين شجر ندهة احلامك
لغربة ايامك عن الانس والجن والملكات
ولشىء مايتسماش
ولا يتكتب ولا يتنطق
يتحس بس ويتمسك بالروح
فنبوح ببعض شهد
نبعت يجينا الرد
ولاعمرنا هانتخض ولا ننصد
من عندليب تجديد
مواعيد فتوحاتك
اقاصيص طموحاتك
اسرار حكاياتك
بين كاس اندهاشى بشربك
عصير كوكتيل
من منجة البهجه
وبهجة الاشتهاء
وضحكة الارتواء
واقف شجر ونخيل وكافور
ووحاح صفصاف
واقف نسيم واقف ربيع
واقفه ورود اصناف
ازهار من الجنه
على نيل تحياتك
عصافير بتطلع من غيطان الرضا
للزرع تتحنا بضيا
خضرة عيونك
وعسل حنينك
واحتلام احاسيس لبعض
على بعض
طالع مهج – غنوة نشيد الضى
طالع تشيلنى جناحات
نوارس من سماكى
ونجوم تغرد بالنشيد وتقول تعيد
اسمع يجينى الصوت كحلم قديم
والكلمه تتردد سنين
اسمعها من تانى
ولاعمرى اعانى الكلام
الطازج الناضج
الحالم القادر
نشيدك صبى وعفى
وبيزدحم بالصور
والمفردات الاصيله
دى اللى نازله
من سموات ربيعك
للكتايب من شجر ونسيم وورد
ومجد وبهجه وارتعاش
وضحكه وانتعاش
فى تحيات روحك
اقرى نشيد البرتقان
واصلى بين محراب سنينك
للبدر والاكتمال
ولصدفة الاحتمال
الطالعه
من خريف روحى
وصوان عزا احزانى
وفاتحه للنشيد طرقات
وللضيا مساحات
تكتبنى للاغنيات
تحياتى وتحياتك
وتحية الساكنين
فى جناين افراحنا
وبسمة لقانا
فى هوى الابتسام
فى ريحان الازدحام
فى انتعاش الاحتدام
نطلع نلاقيكى
بيشتهيكى البدر للرحله
وبتستحمى نظرته فى عنيكى
ندوب ونسرح
ونموت ونفرح
نتوضى من سندسك
ونصلى لسنينك
ونقرى نشيد البرتقان

خلود
مهداه الى
شهيدة الجنوب اللبنانى
سناء محيدل
---------------
لميت من الارصفه
خبز اللى متوجعه
يمكن يعود الامل
لما الولاد يشبعوا
باشت فتافيت الكسر
طفحت على وش المدى
نجمايه سودة مبحلقه
قاموا العيال
من غير بطون متنفخه
باتوا العبال لم يغفلوا
للصبح .. فين الصبح ؟
مين يستنظروا
خمسين سنه
ولا مره حود عندن
طفلى الرضيع
مين يرضعه
والا سواد الليل ياناس
مين يخلعه
قامت سناء
من عشها
من ملجأ التوابيت حزينه
مفزعه
صرخة مخاض جوه الحشا متوجعه
وسناء محيدلى فى الجنوب
مش زى صابره مسلمه
ولا زى غزه مرصعه
ولا زى دير ياسين ولا
بحر البقر
عربيه مش متدلعه
داسناء ولا عمر السنا
يرضا يفرط فى الضنا
دايما عنيها مفتحه
شافت عيون كل الرجال متشمعه
مالقتش فينا اى شمخه مولعه
تقدر تهد الصومعه
مالقتش فينا المجدعه
هتكت فى عرض الخوف ووصلت للجثث
جثث الضماير اللى فينا مخلعه
غاصت بحور الزوبعه
لبثت عبايتك ياصلاح اليانعه
واتحزمت .. على سيف على
ركبت بساط الانبيا
وف قلبها .. مليون دعا
من فوق جسر حطين وعدت مسرعه
وبجسمها
ع المنشأت اللى اتبنت من دمنا
حدفت بلا
حصدوا الردى .. من يدها
من فعلها
فى الملحمه السوده فى تاريخهم زكرها
ماهى فجرت
كل اللى مدفون عندها
ربطت مع
كل القطع من لحمها
علم العروبه المزمعه
انا شفتها متوزعه
انا شفتها
على وجه نهر الخلد قاعده مربعه
من حولها
كل البنات الحور هناك بتزفها
انا شفتها
وسمعتها
عبر السهام الساطعه
بتشدنا م الارصفه
انا شفتها
شفت الرجال قاعدين هنا
بينوحوا ويولولوا
على روح سنا
وحايقضلوا .. خمسين سنه
قاعدين هنا يستنظروا
يمكن تقومتانى سناء
وتمسح دمعهم

عدى الشهور
يابنت مشمش ربيعك
فى الفؤاد خضر
لون زهورى
ووسع الشرايين
فتح انسجامى
بابه للضحكه
غنت يمامات الهوى
على وصلة التراحيل
سافرت عيونى لجنونى
فى رحله بلا مواعيد
هل قلتى ام حاتنعيد
كل الكلام الجديد
زى اللى ما اتكرر
بيسيل لعابى لغيابى
الشهد متكرر
وانا مش هاكرر دخولى
لجناينك الوحمانين
لاتشتهينى لسفاينك
فى الهجير
لامواج حنين
قزمى اكتبينى فصلتين
فى دفاتر المغرمين
للغربه والحكايات
قطرك ماعمروش فات
قطرك على رصيف الفؤاد
طالع فى يوم العيد
ياام الامل مندمل
طايلاه ايدين تشريد
خدى الايدين الشفيفه
تمسح سنين الغبار
يوسع فى عينك مدار
بكره بلا ترديد
ولا كنتى ساره ضحكتك
للاحتلام بيا
لكن انشطارك
للربيع بيجود
صدف البحار البايشه
فى عروقك
زاينه المحار اللى جارح
خد حزن شطوطى
ارمى بياضك جوه
منديل الحنين
تلاقينى زادك بين
صحارى السنين
رابط فى اوتادك
حبل الخلاص رابط
والباب داظابط
فتحته للحضور
عدى الشهور
واتصبرى ماتدور
ابدا عليكى الليالى
بطول مياه البحور
وان طيفى
غاب انتداب نسيان
اقرى كتابى ف
ى سما روحك
لقنيه بوحك
يوصلى دوحك
لو هواكى
لزنقة الشرايين
ر
هـ
ى
ن

قمر يلالى فى السموات
----------------
قصيده من شعر العاميه المصريه
مهداه الى برنامج شاعر المليون
-------------------------
فى شاعر المليون فنون وعلوم لكون فى الشكل والمضمون
للمبدعين والمبدعات والسامعين والسامعات
بستان هوى ونسيم رقيق
من خلفه ناس تفتح مراسيها لشطوط
وموانى لبحار الصدف وامواج تراث
ولجان امان الحكم فى ميزان حساس
وشيخ جليل نبته اصيل .. مثل النخيل الشامخات
تعطينا من شهد الرطب شوق وامنيات
هنا منطلق مجد وعبق صوت التاريخ يحكى حكايات
وامهات كتب الفنون
ومفردات عرس وقانون
واغنيات عشق الاماكن وعبير لسندس كون مكنون
هنا كون بيفرد فى جناحاته كما يمام الغار
انوار جديده
تطلع خطاوى سديده تدخل ميادين رشيده
وتهز كل القلوب وندوب
نشرب كيسان الصفا صد العطا محلوب
من قصر زايد خير وراحه بالمحبه يفيض
تشم منه ريحة الاجاويد تجيد
معنى المعانى والامانى لكل عشاق النسيد
يطلع الفجر الصبوح من ندى ثرى التمجيد
يحكينا ست الحسن الفن والامارات اشارات
نبضات علوم .. همسات رسوم .. لمسات تدوم العمر كله
فى صورة الحوريات
والسندسات والترنيمات والتلميحات والتقسيمات على وتر موزون
يبنى الخليل بن احمد مافوق اساسه التفعيلات
المبدعين مش قايلين الشعر والقايلات
المبدعين الراعيين والشاهدين ومشجعين
الحاسسين متلقيين الحرف بالشوق والمداد
بيصوتوا بالهمس .. من بين عيونهم حس
وعلى جبين الوجه تقاسيم بشارات الرضا
من راضيين وراضيات
روضات جنان ممزوجه بالتحنان
مغموسه فى الفنجان
فنجان عصير الروح على شجر النعيم
يطلع فى عز الضحى من كف شب حليم
وفروع محبه امانى شابه
عيون يفيض الشعر من سحرها بتمجيد
تشرب هنا عسل اشتهاء
وتشم فى نسايم عطاء
وتداوى كل العلل والملل
يجمعها روح من ريحان الامتنان منان
فعلا وطبعا بو ظبى ترتدى توب البهاء
على استحياء
يدخل بها شيخ بن شيخ حامى لقب اجداده
من فرع انبياء الحكمه امراء القلوب
الراهنين كل العمر والامل
لجبين عيونهم وسنين حنينهم
واهبين الارتياح
للعالم المدهوش بهم واللى ما يملك غير حبهم
بيوزعوه ويمزجوه من بين رمال التلال
ينضج زروع ودروع شموع
بتشعل على الدوام المجد
فى لسان احوال كل اللغات وتقول
( من هنا نبدى القصيد .. من هنا نبدى القصيد )
من هنا
كلمه اخيره من هنا
القصيد :- ماهى اللى منشوره فى ديوان
القصيد ماهى اللى مكتوبع فى بيان
القصيد ماهى اللى ببحث لها عنوان
القصيد هى المكان والزمان والناس
الراعيين الشعر والشعراء
ولجنة التحكيم .. والشيخ محمد وعشاقه .. والمرتدين توب الملايكه
فى زهوة العنفوان وعفة الازهوان
ورقة الشبات وحكمة الشبان
وعطفة الامهات وصورة الاكتمال
فى جفون شيوخنا وعيون فهارس شموخنا
وصلاح فلاح التاريخ
اللى بيحكى تاريخنا
القصيد بتكتبوها فى عقولكم
نقراها احنا فى عيونكم
نكتبها من احبار مدادكم
على مدارك دروبكم
وفوق مزارع فروعكم
تظهر لنا صوركم على كل صدر وعجز
وتد مفروق ومجموع وفاصله صغرى وكبرى
تطلع لكل الجموع موزونه من احاسيسكم وعلى دقات كفوفكم
ترسم معالم حاضركم
وتنهل من ماضيكم
تحكى لبكره عليكم
يقروها احفادكم على وجه مياه خليجكم
جريد نخيلكم
اوراق شجر ابداعكم
ادوار عباداتكم
اعماد انارتكم
مجالس امارتكم
فى بدوها وحضرها
وسهلها وتلها
تقف القصيده جبل فى وش الريح
تصبح دروع تسبيح
ترحم الكون الفسيح وتقدم التباريح
والتوضيح لكل حضاره كل مناره وتسبق جميع الحضارات
تصعد اعالى السموات
كل حرف نجم
كل نقطه ضوء
كل بيت سما
وعنوان القصيده
قمر يلالى فى السموات

ردا على الشاعرين صلاح جاهين واحمد نجم
===============

ودى مصر نشيد الروح ودوى المجروح وهوى الايام
مصر الامل المتبقى لغنوة قلبى مع الاحلام
انا مصر ان كنت هاغنى واقول مواويل مالهاش فى الحصر
هافضل فى غناها وسحر حلاها اقول واعيد ولا اخلص يوم
على شط النيل فلاحه خدود قداحه معاها الشاى
صياد مفتون بجمالها وسحر احوالها معاه الناى
بيلحن دقة قلبه ويوصف حبه مع الالحان
قاعد طول عمره لقمره يصيد النجم فى عز الضهر
يغزل من لوعة قلبة نسيج الفرقه ساعة ما تمر
من جنب الترعه البارعه وجنب السور الواد مبهور
لساه فلاح بيغنى يعبر عنى فى شوق الشوق
وانا واقف تحت الضله معايا القله شجر برقوق
ونخيل مايميل غير للمواويل بيطاطى باحلى سلام
وعصارى ترد الروح ونسيم بيبوح وعسل مسموح
من بق صبيه عفيه بتعشق شعرى مع المواويل
انا مصر دى امى وعمى وخالى وهمى وبنتى هدير
وكتايب راكبه ركايب عاوزه تعيش فى جناين الخير
ع البر الشرقى ايذادورا تنادى حبيبها وتغرق موت
على شط البحر اليوسفى حسن ونعيمه فى اجمل صوت
وشفيقه معاها متولى نجيب محفوظ من تحت التوت
بيهادوا الهرم الاكبر كل ابداعهم كله صمود
كان واقف شوقى وحافظ يحكوا النيل عبر الازمان
وبحكوا عن الاساطير والطير ويعدلوا فى الاوزان
ودى مصر بهيه وطه وبيرم التونسى وعمى جاهين
مصر الجامعه المفتوحه وقلعة علم لكل الناس
بتحس الداخل فيها مابين اراضيها بكل احساس
مصر البوابه العاليه الام الغاليه حضاره وفن
مصر الشابه المحروسه خفيفة الدم صغيرة السن
طالعه بعيونها الوالعه وحاده القصه عنيها تجن
كان واقف ابن عروس مع هدى شعراوى فى حارة الفن
بيهادوا الناس امجادهم يحكوا تاريخهم يكتبوا عن
العم جمال الناصر واخد امه فى اوسع حضن
وبيرفع يده جبرتى ويحرص ارضى ماعمرة يون
على موج البحر الكامل مصطفى كامل هادى الكل
من شجرة طلعت حرب فى اول درب نسيم مع فل
وعزمنا امام مع نجم ورحنا لحوشهم سيدنا حسين
ومحمد على فى القلعه ندانا هدانا وقلنا امين
زهران حمدان وغيطانى مع احسان كلنا طالعين
فى المغرب يدن رفعت صوت كروان فى ليالى رمضان
ويجينا فؤاد حداد من قبل الفجر كما الكروان
وفى ليلة العيد السومه بتونسنا مع الالحان
وحليم درويش وحمولى وعبده وطه فى كل مكان
الخفه الرقه الطبل البلدى صعيدى وبحرى اخر روقان
مصر 18 مارس عيد المنيا تاريخ المجد
و23 يوليو الثوره الحره حلاوه تصد
وتخلى الواحد قايم قاعد حاسس انه مالهش مثيل
بطولات فتوحات صفحات امجاد واصاله لشعب اصيل
ياسلام ساعة ماقالوها عبرنا الخط وخدنا التار
ضربوا الشجعان ضرباتهم حققوا زاتهم عز نهار
كان 6 اكتوبر واقف شرق البحر يقولك مر
عدى ياعبعاطى زناتى يافتحى ياقرنى وخطى البر
ارفع اعلام امجادك هادى اولادك نصر كبير
وابعت للام بهيه احلى تحيه دى وش الخير
خليها تعاود تانى لعصر اغانى واكل فطير
قلها عدينا لسينا بكل سكينه عدونا فر
قولى يامايا لولدى حدايا العالم كله اصبح حر
طلعنا بطلعه ابيه عفيه قويه كل الغل
حطمنا خطوط وحودو وسدود مع دود فى حقيقه وعلم
وادى مصر بكل مافيها بزهر واديها بتطلع فوق
كان على مع مصطفى امين مع روزاليوسف ليهم حس
وروايح السيده زينب نور الازهر فوق الوش
وسادات والجمسى وهيكل وضعوا الخطه وجات بالعز
ومبارك ضرب الضربه وكانت صايبه وهزت هز
كان برضوا السد العالى نوره ملالى فى عرق الطمى
قام طلع قطن وقمح ونخل بيرمى من فوق رمى
وانا قاعد اكتب شعرى واغنى لمصر واعيد واقول
انا مهما اكتب يابلدنا مش راح يخلص منى القول
انا نفسى اكتبلك مره قصيده جديده تقول وبجد
عن مصر الاصل الحب الفرح الشوق الانس الود
الحرب العلم السلم الفكر الحلم جمال القد
بصراحه انا اسف جدا واقف عاجز كلى كسوف
مش قادر قلمى يعبلا واقف هايم مليان خوف
بس المشتاق لبلدنا وقدرة زاتنا سلاحنا عتادنا ييجى يشوف
ويزور ويدور الكرنك والاهرام والقلعه ثم يطوف
وساعتها يدوب فى هواها وسحر حلاها يحب ثراها مايمشى قوام
ماهى مصر نشيد الروح ودوى المجروح وهوى الايام
مصر الامل المتبقى لغنوة قلبى مع الاحلام

» لقاء تلفزيوني احتفال بصدور ديوان الشاعر محمد ربيع محمد كسر الازاز
» ديوان الشاعر الأستاذ محمد رمضان
» عيد ميلاد الاستاذ يسرى محمد جاد المراقب بمنتديات الشاعر عبد القوى الأعلامى
» فيديو - برنامج يوم جديد مع الشاعر محمد ربيع حول ديوان الطاحونة
» فيديو - أوبريت الثورة مستمرة - تأليف الشاعر محمد ربيع محمد وألحان محمد سامى وغناء محمد أسامة