سجون الغربه

سجون الغربه
زليتني يانفسي ما بين المدن وقبائل
فرحتينى في جده وعذبتني في حائل
بالعذاب الشفتو انا كاتب شعري فيك قائل
لو اشرب الحنضل أو آكل دريش وبلائل
ما بجلس بعد سنتى وجيبو غيرنا بدائل
كل البلاقيك يشكي من الحريم وكفائل
لو تخدم بأحسن نيه مايذكرولو جمائك
ما شافو الأهل في بلدنا ناساً كرام وفضائل
ما برجع عشان انزلا أو اسمع كلاماً مائل
تعبت وشكيت للخالق راكع ودمعاً سائل
أكون في بلادي سعيد مبسوط كمان متفائل
والقاء نور عيني في بيت أصيل واصائل
واقضي معاك عمري يا زهرة الخمائل

بـــــــــــــــــــــــــــلادي

ليك يابلادي الف الف سلام
من ارض الحرمين منبع الاسلام
اناقلبي ليك حنا مدّح عليك كلام
بحبك يابلادي بحب الطيبه والاكرام
بحب الضعفاء والفقراء بحن على الايتام
عشان كمان بسطاء عفه واحترام
مشتاق للذكر وللبسة الاحرام
مشتاق اشوف شيخي واجلس معاه و امام
اذكر كمان ربي واستغفر لذي الارحام
في النوم كمان جاني طاير على حمام
جالس على الكرسي ذي قصة الاحلام
قال ليا يالفاروق دايرك تكون بسام
صلى ذي شيخك والناس كثير نيام
ابعد من الفاسق واحذر النمام
تكسب كنوز ربك وتمشى دقري تمام

يالسمحه يا مالكه الحسان
بالله كيف حال الزمان
عزو قام قال ليا والله مافي امان
غير العرس مافي اطمئنان
يلاك ياعمر نمشي أم درمان
خليك ياخي من طيبة الأخوان
لم القروش وافتحلك كمان دكان
واعمل عرس ذيومافيش كان
لم الشيوخ ومعاهن الحيران
واضبح تيوس معزه وكمان ضان
نادى للفاضل معاوعلى باتشان
بكره العرس بس اضبحوا التيران
واعزم جميع الناس في الشقله وام ضبان
سمي الكريم ربى وبخر الديوان
من عطر صندل وكمان بخور تيمان
جيب الكتب وزعهن واقرأو القرآن
من صورة الفاتحة البقرة والإنسان
تلاوة بترتيل تطرد الشيطان
جاني الحبيب عزو اضحك كمان فرحان
قال ليا أخوك عباس جاى من لبنان
راكب البصات وجاي باسوان
وصل في يومين لكنو كان تعبان
قال لا مو اخطبي ليا إن شاء الله من عمران
شفنا الحبيب عباس لكنو كان غضبان
قال انتو ناس جبنا انتوما صحبان
قت ليهو كيف نرسلك وما عندما العنوان
قلبي العجيب قال ليا يلاك نمش ايران
سيب كمان الربوه وأوعاك من جيزان
والحلوة قالت ليا اعمل كمان بستان
خليو جميل للناس بالخضره والريحان
واملاهو كلو زهور وازرع شجر رمان
واعمل كمان بقرات وافتح محل البان
جاني الحبيب الطيب سالم اخو عثمان
قال ليا كلام رسمي لكنو في المليان
اعمل كمان مصنع ذبده وكمان اجبان
وابوى كمان قال ليا انا راضي ما زعلان
بس ياخي داير ليا بصات كمان نيسان
قويه وكمان سمحه مصنوعه في اليابان
حذراك من التجميع وصناعة التايوان
جاني الخبر عاجل من صحف الوان
قال الكمال حرر كبويتا وكمان قيسان
والليله سامع خبراً جابنو لي نسوان
دقلوشنا قال داير الاختها أم رمان
انقلبت الحله ولعت نيران
قالو ناس الحله والله بس بركان
ياعبد راجع نفسك انت زول غلطان
لو أنت متحير أو كمان طفشان
اقراء سورة يوسف الواقعة والرحمن
كاشفات كمان للضر وبزيدن الاحسان
ياربي تصلحنا ونشوف كمان رضوان
نعمل بحسن النيه وندخل الريان

ماشاء الله ، أشعار جميلة بالعامية الأصيلة التى أعطت لها نكهة وطعم ومذاق له خصوصية فريدة ، علاوة على الغرض الشعرى القيم والهادف ، ويزيد على ذلك جمالا هو البناء الرائع للقصائد والأبيات