بسم الله الرحمن الرحيم
ربما كنت مخطئا عندما اردت ان اعلم آراء الشعب المصرى عن زيارة الرئيس الامريكى باراك اوباما لمصر ولكن الفضول كان يقتلنى لاعلم كيف يفكر هؤلاء
الناس فنزلت الى الشارع لاسأل الناس عن رأيهم فو ذلك وكان اول من صادفنى رجلا كبيرا فى السن فقلت لة
"اوباما جاى مصر يا حاج ... اية رأيك"
فكان رده كالتالى
" و ده دوا سكر جديد يا بنى ؟"
فتركتة واكملت مشوارى لارى رجلا سمينا يجلس على قهوة وبيده جريدة يتصفحها وعلى عينية نظارة شمس وتبدو علية الثقافة وعندما اقتربت منة وجدتة يقول
"ارفض حدوث هذا ... انا حقا اعترض"
ولم يكن هذا هو اللفظ الذى قاله بينما قال اختصار لتلك الكلمات فى كلمة يعجز قلمى عن كتابتها ولكنى تجاهلت ذلك وسألتة
"لية بتقول كده يا أستاذ؟"
فقال لى
"لا لا لا ... مش موافق خالص"
فتعجبت وسألتة مرة اخرى
"مش موافق على اية "
فقال لى
"على ان اوباما ييجى مصر طبعا "
وعندما سألتة عن الاسباب قال
"مش عارف ... بس انا لازم اعترض ...هما كاتبين كده فى جريدة المعارضة اللى انا بقراها دى"
فذهبت فى طريقى حتى قابلت طالبا جامعيا يدرس بجامعة القاهرة وقلت لة
"اوباما جاى جامعة القاهرة ... اية رأيك"
فقال لى
"والمصحف ما يهمنى ... والله اعورة ... هما كل يومين يبعتوا لى واحد من امن الجامعة يضربنى عشان بعاكس البنات"
فواصلت مسيرتى وقابلت طفلا صغيرا قلت له
"تعرف باراك اوباما يا حبيبى"
فقال لى
"آه... مصاصة بلبانة ... طعمها حلو اوى"
فتركتة هو الاخر ثم قابلت شخصا جديدا وقلت لة
"باراك اوباما جاى مصر ... اية رأيك؟"
فقال لى
"انت عبيط يابنى ؟ ... مــــــــــــــــــــــــــــــــــباراك طول عمرة موجود فى مصر ... بس مين اوباما ده ؟ ... هوة الريس غير اسمة ؟"
فنظرت لة نظرة استحقار فظهر على وجهة ملامح الخوف وقال لى
"انا مش بتكلم فى السياسة يا باشا"
هكذا كانت ردود المصريين ... فهل نستطيع ان نعرف آراء الامريكان حول ذلك الموضوع ؟
* بقلمى
*مصطفى الاعصر
موضوع: اهوة جة ياولاد 
2/12/2009, 07:39