قلمي معاند
*****
قلمي معاند يمكن باعني .. أو يمكن خايف يخدعني
عايز أكتب مش بيطيعني .. عايز أسمع .. طب يقنعني
*****
كان دايما يسمع لكلامي .. ولا عمره فكر ف خصامي
كان يشاركني كل آلامي .. ولفرحي وكمان ف غرامي
*****
خايف تكتب قول وصارحني .. بس اوعى تفكر تجرحني
من يومك وانت مفرحني .. يعني كبرت وظهرك محني !
*****
قول ما تخافش انا دايما جنبك .. وانا أكتر واحد بيحبك
فاكر أول مره مسكتك .. يومها إيديا حضنت قلبك
*****
قول ما تخافش كلام الناس .. أنا عارفك دايما حساس
عبر عني بكل حماس .. ده انا شايلك دايما ف الراس
*****
أوعى تسلم أنا محتاجك .. كل مشاعري واقفه ببابك
افتح ليهم دول أحبابك .. ولا يرضوش أبدا بعذابك
*****
عارف إني بقالي زمان .. هاجرك وبقول انا زهقان
بس خلاص أنا ليك غلطان .. بس سامحني وانا ندمان
*****
باركوا لي يا أعز اصحاب .. قلمي خلاص فتح لي الباب
وخلاص ما بقاش بينا عتاب .. ورجع لي من بعد غياب
*****
بقلمي : محمد رمضان
18/03/2015
موضوع: قلمي معاند 
18/3/2015, 18:44
