13 حيلة مكياج بالمعلقة !
(1)عشان نتخلص من الانتفاخات تحت العين نجيب معلقتين ونحطهم في الفريز بالليل ونسيبهم لحد الصبح وبعدين بضهر المعلقة نمررها تحت العين من جوه لبره مع ضغط خفيف, الطريقة دي هتخلصك من الانتفاخات تحت العين والميزة في الحيلة دي انها سريعة يعني لو عندك مناسبة او خارجة وعندك انتفاخات الطريقة دي هتخلصك منها بشكل سريع.
(2)لكل البنات اللي بيعانوا من رسمة الايلاينر ومش بيعرفوا يرسموها النهاردة جيبنالك حيلة سهلة جدا هتساعدك ترسمي رسمة ايلاينر عين القطة مظبوطة, هتجيبي معلقة وتحطي ايد المعلقة عند الزاوية الخارجية للعين من تحت وابدأي ارسمي خط الايلاينر اللي تحت, وبعدين عشان ترسمي الخط اللي فوق خلي الناحية الداخلية للمعلقة عند زاوية العين من فوق وارسمي الخط المنحني اللي فوق, بعد كده املي الفراغ بالايلاينر وكملي باقي الرسمة عادي هتبقى سهلة بعد كده.
(3)عشان تتجنبي تلطيخ منطقة تحت العين لما تيجي تحطي الماسكارا على رموشك من تحت, تجيبي معلقة وتخلي الناحية الداخلية للمعلقة ناحية العين وتحطيها تحت الرموش وتطبقي الماسكارا على رموشك عادي المعلقة في الحالة دي هتحمي منطقة تحت العين انها تتلطخ بالماسكارا, وممكن تعملي نفس الطريقة مع الرموش اللي فوق كمان.
(4)لو علبة البلاشر بتاعتك وقعت والبلاشر اتكسر ممكن ترجعيه زي الاول بانك تحطي عليه كام نقطة كحول وتجيبي معلقة وتبدأي تضغطي عليه وتساويه وبعدين تسيبيه لحد ما ينشف هتلاقي البلاشر رجع سليم زي الاول بالظبط, والطريقة دي ممكن تطبيقها على اي مكياج مضغوط عندك اتكسر.
(5)ممكن تستخدمي المعلقة عشان تدي الرموش حجم اطول هتجيبي المعلقة وتخلي ضهر المعلقة لجوه والناحية المجوفة في اتجاه الرموش وتبدأي بصوباعك تضغطي على الرموش في اتجاه المعلقة وتطبقي الطريقة على الرموش اللي فوق واللي تحت, وممكن عشان نتيجة احسن تدفي المعلقة بسيط جدااا بالسيشوار وتطبقي الطريقة هتديكي طول طبيعي لرموشك حلو جدا.
(6)عشان تظبطي حواجبك وترسميهم على شكل قوس, هتجيبي المعلقة وتخلي الناحية الداخلية ناحية العين تحت الحاجب وتبدأي ترسمي الحاجب على المنحنى بتاع المعلقة وبعدين تملي الفراغات.
(7)ممكن تعملي روج بنفسك من اي لون ايشادوا عندك تجيبي معلقة وتحطي عليها شوية فازلين وبعدين تخلطي معاه اي لون ايشادوا تختاريه وتخلطيهم كويس مع بعض بفرشة او بصباعك وتطبقي اللون على شفايفك بالفرشة.
(
لكل البنات اللي مش بيعرفوا يرسمو الكونتور تقدري بالمعلقة تظبطي رسمة الكونتور بسهولة, تجيبي المعلقة وخلي التجويف الداخلي للمعلقة ناحية جوه على عظمة الخد وابدأي رسم خط الكونتور تحت المعلقة.
(9)ممكن تعملي تصميم للمانيكير انك تجيبي معلقة وتحطي عليها نقط من المانيكير من اي لونين تختاريهم وتلخبطيهم مع بعض بدبوس بطريقة عشوائية وبعدين تحطي ضافرك على اللون هتلاقي التصميم طلع عندك على الضافر, وبعدين في الاخر نضفي اي مانيكير حوالين الضافر بالاسيتون.
(10)ممكن كمان تستخدمي المعلقة كبالتة الوان انك تحطي عليها الالوان اللي انتي عايزاها عشان ترسمي ضوافرك بالفرشة, الطريقة دي هتسهل عليكي الموضوع جدا.
(11)عشان تمنعي المانيكير انه يلطخ الجلد حوالين الضوافر حطي معلقة تحت الضافر وانتي بتحطي المانيكير بالطريقة دي هتحمي الجلد انه يتلطخ باي مانيكير.
(12)لو عندك اي كدمة على الرقبة او الوش ممكن تخففي من حجمها باستخدام المعلقة, حطي معلقة في التلاجة شوية وبعدين حطي الناحية الخارجية للمعلقة على الكدمة وافركيها هتلاقي اثار الكدمة اختفت لانها هتساعد في التخلص من تجمع الدم.
(13)اخر حيلة معانا وهي حيلة قديمة كانت بتستخدم للتخلص من الحبوب بسرعة, تجيبي كوباية وتمليها ماية دافية وتحطي فيها المعلقة لمدة دقايق, اتأكدي الاول ان المعلقة مش سخنة اوي عشان متحرقش بشرتك يادوب بس تبقى دافية وبعدين تحطي الناحية الخارجية للمعلقة على مكان الحبوب وتسيبي المعلقة على الحباية لحد ما تبرد.
المصدر:klmty
موضوع: بالصور 13 حيلة مكياج بالمعلقة ! 
20/1/2016, 23:43
