بعض العادات من أفراحنا والثوب السودانى

بعض العادات من أفراحنا والثوب السودانى

نبدأ بأفراحنا ونرجوا من العلي القدير أنا تظلل سماء سودانا دوما أفراحنا ... قواوا آآآآآآ مين يا شباب .
طيب في الزواج عاده بيمشوا أهل العريس لطلب يد الفتاه وبيودوا زي ما بيقولوا أهلنا (( فتح الخشم )) وبيكون عاده عباره عن مبلغ من المال وحلوى وعطر وفي بعض الأحيان ذهب .
بعد ما خلاص عريسنا أدوهوا بيجوا بعد داك ناس العروس لو صادف أثناء فتره الخطوبه رمضان بيودوا ما يسمى بــ (( مويه رمضان )) وبتكون عباره عن حلو مر ، أبرى أبيض ، كركدي ، قنتليز ، عرديب ،قمر دين ....إلخ بالإضافه إلى جميع أنواع البهارات وعده لي أم العريس من كبابي وصواني وفناجين ... إلخ وبالمناسبه الزمن ده الناس المقتدره بقت تودي كل الأدوات الكهربائيه الخاصه بالمطبخ من التلاجه لغايه مضرب البيض وده طبعا أسمحوا لي نوع من البوبار الفنكهه الفاضيه .
يجوا يا شباب ناس العريس يجبوا لي العروس هديه العيد من ملابس وكريمات وكل ما تتمناه البنيه وقالتوا لي السيد العريس كان قاصده كان في مجرد ونسه نظام يا فالح أفهم براك ده البيسوا الزمن ده .
عند تحديد يوم لي للزواج يقوم أهل العريس بتحديد يوم لأهل العروس لسد المال وبيودوا الشيله حقت الملابس + شيله الأكل+ المهر أو يدوا ناس العروس متكفي .
إتحدد العرس يوم حنه العريس ناس العروس بيودوا فطور العريس وهو بيلم كل ما لذ وطاب في صينيتنا السودانيه العصيده والملاح والشعيريه والسكسكانيه والفول والطعميه ......إلخ طبعا الفطور بيمشي بي سيره بتتكون من نسوان تختارهم أم العروس وقريبتها ويصلوا هناك والجماعه يرحبوا بيهم ويكرموهم وهم طالعين بيدوا كل واحده من نسوان الفطور هديه يا بيكون فيها قطعه قماش أو ثوب أو فتيل ريحه ولو العريس مغترب ومقتدر ما بتكون في كلمه لو دي بتكون كل الأصناف مع إضافات كمان .
ناس العروس قبل العرس بأيام بيكون عندهم يوم دق الريحه وده اليوم البيكفوا فيهو الدلكه ويعملوا خمره الزيت وخمره المحلب وبخور الصندل وبخور الشاف ولازم من الحاجات دي تمشي لي أم العريس ضواقه لو ما كده الناريه بتولع والزمن ده بتمشي صينيه الريحه مع الفطور وبتكون مزينه ومزركشه .
بعد داك ناس العروس بيكون عندهم يوم فتح الفطير وعاده بيكون قبل يوم فطورالعريس بيوم .
أما عروسنا طيله فتره الإستعداد لي الزفاف وقبل حوالي الشهر أو الشهرين بتقعد في الدخان وقعدته دي ليها طقوس :-
1. عدم التعرض لي الشمس نهائياً .
2. عدم مقابله أي فرد من غير أفراد البيت ولو لزم الأمر تكون متبلمه .
3. الجلوس في عنقريب وبدون مرتبه وليلها ونهاره على قول حبوباتنا تتجربن بي الزيت (( تتمسح )) .
4. الجلوس في حفره الدخان مرتين في اليوم لمده ساعتين على الأقل في كل مره ويختوا جنبها جك عصير ليمون عشان تعوض الفاقد .
5. تقوم صديقات العروس واخواتها بتدليكها يوميا 3 مرات على الأقل .
يوم الحنه العروس والتي تكون عاده قبل الزفاف بيوم تأتي الحنانه نترسم وتنقش للعروس وصديقاتها وأخواتها وبيجيبوا غنايه لزوم الهجيج .

الثوب السوداني

في تمازج بديع بين المحافظة والمعاصرة بقى الثوب الزي القومي المميز للمرأة السودانية واحتفاظه عبر تلك المراحل بجماله وسحره وبساطته ، كلمة ثوب تُطلق على الكسوة أو اللباس مطلقا غير ان لهذه الكلمة لدى المرأة السودانية دلالة أكثر خصوصية وتحديداً إذ تعني رداءها الخارجي الذي يكون بطول اربعة أمتار ونصف المتر تلف حولها بألوان الزاهية ، ويمثل الثوب السوداني أهم عنصر في زي المرأة السودانية ، فهو عنوان وضعها الاجتماعي اذ به تميز المرأة المتزوجة عن الفتاة غير المتزوجة كما أن نوعيته من حيث الخامة والثمن هي المعيار الذي يشف عن زوقها واناقتها وفي الفترات التي شهدت هجرات السودانيين ظلت المرأة السودانية في الخارج تعتز بارتداء الثوب كعامة ورمز للهوية وكان الثوب السوداني في حقبة الخمسينات يفصل من قطعتين تسمي الواحدة منها فتقة تُحاكان بالتوازي مع بعضهما بالكروشية او بالتطريز بطول كلي تسعة امتار ويُركز التطريز على طرف الجدعة حتى يثقل وزنها فتثبت على الكتفة وعقب الرخاء الذي صاحب ارتفاع اسعار القطن ، وهذه النوعية من الثياب التي تفشت لفترة قصيرة لم تكن تحاك في اطرافها وكانت المرأة تقول للناس (هاهو ثوبي جديد ولا وقت لدي لكي احيكة) . ثم ما لبثت ان دخلت البلاد ماكينات الخياطة والتطريز من ماركة سنجر ومعها ظهرت المطرزة التي ما زالت ترتدي في السودان ، وفي السيتينات من القرن الماضي بدأ استيراد ثياب التوتال من سويسرا ومن اسماء هذه الثياب ابوكنار والمفستن ومنها ثوب عُرف بإسم بوليس النجدة وهذه التسمية جاءت بعد دخول عربات النجدة الزرقاء بأضوائها الحمراء الوهاجة ، وقد عُرفت هذه النوعية من الثياب بجودة الخامة والجمال فهي مطرزة بجودة الخامة، ويحبذ في خامة الثوب السوداني الجمع بين المرونة والخفة والثبات اي عدم الانزلاق وفي فترة السبعينات حلت محل ثياب الكرب ثياب هندية زهيدة التكلفة ذات الوان زاهية عُرفت باسم ثوب الجيران لبساطتها وتحملها وسهولة ارتدائها فبهذا الثوب تستطيع المرأة ان تطل على الجيران بسرعة ودون كلفة كما شهدت تلك الفترة ظهور ثياب مصر البيضاء بلونه الاسودوفي الآونة الاخيرة ظهرت بجانب الثوب خيارات أخرى في اوساط الاجيال الحديثة لاسيما الطالبات ، فالذي الاسلامي الشائع الان في السودان يتكون من تنورة طويلة وبلوزة كاسية بارتياح بأكمام طويلة وخمار للرأس او طرحة في الوان منسجمة وهادئة ، وبينما ترتدي بعض البنات العباية فبعض صغار السن من المتزوجات يظهرن في النقاب الاسود ولكن رغم هذا ما زال للثوب مكانته في أوساط المتزوجات في الحضر والريف على حد سواء فللثوب بجانب وظيفته الاساسية مزايا عملية فهو غطاء للشخص النائم من الذباب ، وهو احسن ستر لما رث من ملابس في حالة الحركة ، وهو غطاء واق للطفل المحمول على يدي أمه ودثار ساتر للطفل وثدي امه في حالة الرضاع ، وعندما يُفرد الثوب على الطفل فهو يؤدي دور الناموسية ، ولكن فوق كل هذا وذاك فإن الثوب يحظي بحب كافة النساء السودانيات لجماله وسحره وبساطته