جدع يا باشا. جت في عين الواد.الفلسطيني

http://www.almasryalyoum.com/



حسام السكري

- (إسرائيلي يتحدث بالعبرية) شايف الأطفال الفلسطينيين الإرهابيين اللي بيلعبوا على شط غزة يا كوهين؟

ياللا اهدف الكونبلة

بوووم.. ماتوا؟ لسة؟

أهدف كمان كونبلة لهد ماموتوا (بوم بوم بوم.)

- جدع أباشا. جت في عين الواد.. الفلسطيني

- إيه ده؟ صوت مين ده؟ انتي مين انتي. إيه اللي جابك هنا في منتيكه أسكريه يا خابيبي؟ أنتي إتكلمي عبري زيي؟ (ده عبري برضه)

- نو يا خواجة نو.. انا مصري أبا عن جد

- إشتغلي إيه يامصري؟

- ياباشا انا واخواتي بنشتغل في الإعلام في مصر، جارتكو، بنكتب مكالات في الجرايد والمجلات وبنتكلم في التليفزيون. عندنا شوية برامج توك شو كده. سبوبة وفيها لقمة حلوة الحقيقة.

- وعين مين اللي بتتكلم عليه؟ اخنا موش ضربنا هاجة في عين حد. الضرب في العين هرام، العين بالعين صحيح لكن إخنا موش نضرب خد في عينه. اخنا بنضرب فيه كلو

- عندك حق ياباشا القنابل بتاعتكو ما جتش في أم عين الواد الفسلطيني بس. دانتوا ماشاء الله خلصتو عليهم كلهم. أربع عيال مرة واحدة.. ماشاءالله.. ربنا يحفظك لإسرائيل.. ولمصر ياشيخ.

- وانتي إيه اللي جابك هنا يا مصري واخنا بنضرب الإرهابيين الأطفال إلى ألعبوا كورة شراب على البيتش بتاع الغزة؟

- والنيعمة ماعرف يا باشا.. أنا كنت قاعد اكتب العمود بتاع الجرنان وباشتم العيال الإرهابيين اللي قارفينكو وقارفينا. الفلسطينيين اللي وقعونا معاكو وسببولنا المشاكل كلها. تعرف يا باشا، لو دول مش هنا، كان زماننا سمن على عسل. سياحة واكتساد ومزز بالهبل عالبيتش بتاع الغزة ده. مانتو لا مؤاخزه يعني مززكو حلوة. ربنا يزودكوا من نعيمه يارب.. وتفتكرونا بقى..

- لكن برضه أنا موش فخمتو.. إنتي إيه جابك هنا يا مصري وازاي دخلت الموقع؟

- ربنا ينتقم منه بقى الجدع اللي اسمه حسام السكري. انا كنت قاعد في أمان الله لقيتني في الموضوع اللي بيكتبه للمصري اليوم. ربنا يتوعده بعذابه الأليم يارب علشان حطني في بوست واحد مع صهيوني زي سعادتك... بالك نقابة الصحفيين لو عرفت هاتزعل قوي. العيال النوشتاء بقى هايقولك تطبيع وحوارات وتبقى هيصة. ربنا ما يوريك يا باشا أصل احنا شعب لسانة طويل وزياط، مش عمليين زيكو كده.. امال.. ياباشا دانتا عسل ربنا يزيدك. انا قاعد اتفرج ومش قادر اشيل عيني من على حضرتك وانت بتقول: اهدف الكونبله.. هاتهم..

- ده مش كويس كتير اللي عملوا الجدع السكري ده. يهطك في المقال بتاع هو معايا أنا إزاي؟!! دي فيهما خطر على أمن إسرائيل، دي منتكة عمليات أسكرية. (لسه الكلام عبري)

- ما تقلقشي ياباشا.. انا ماشي على طول. المقال بتاع الجدع ده قرب يخلص... بس تعرف ياباشا. ماشاء الله النشان بتاعك فل.. القنابل جت في العيال تمام. جدع ياباشا. ربنا يخليك لمصر.. سلام!

************ النهاية... لسه ما جتش، بس جاية بعد شوية **********

*مذيع ومستشار إعلامي والرئيس السابق لبي بي سي العربية