استشارة قانونية .. محتاج الرد فى اسرع وقت

خالى عنده بيت مكون من ارضى و4 اداور كان بناه بدون ترخيص بس هو مبنى بعمدان (البيت مبنى تقريبا فى سنة 79 / المنطقة اللى فيها البيت كانت اراضى زراعية و90% من المنازل فى تلك الفترة كانت تبنى بدون ترخيص )

وهو لسه بيشطب فى البيت والشقق جاءت واحدة ست ليه ومعها 4 اطفال وقعدت تعيط له وتتمسكن وتقول له انا واولادى منلاش بيت نسكن فيه وجوزى هيطلقنى وهيسافر ويسبنى انا واولادى فى الشارع الله يسترك اجر لى الدور الارضى منه تسترنى انا واولادى ومنه احرس لك البيت (لان خالى كان بيسافر كتير ومش مستقر فى مصر )

المهم خالى رأف بحالها واعطها الشقة اللى فى الارضى قعدت فيها شويه ببلاش ومن غيرعقد ايجار وبعدين راحت طلبت منه انه يكتب لها عقد ايجار باسم جوزها
خالى بدأ يحس ان الناس دول مش مظبوطين وناويين على نية فرفض تحرير عقد ايجار لهم (الكلام ده كان فى نهاية سنة 80 )

فى عام 81 زوج الست اللى سكنت فى الدور الارضى احضر لجنة تقدير الايجارات التى عاينت الشقة وطلبت من خالى تحرير عقد ايجار لهم واستكمال تشطيب الشقة وفى حينه دفع الساكن فى الدور الارضى مبلغ 200 جنيه كمقدم ايجارعلى ان يخصم منهم 15 جنيه شهريا

خالى اتفاهم مع زوج الست (اللى استأجرت الدور الارضى) وطلب منه يكمل التشطيبات المطلوبة ولما يرجع من السفر هيدفع له قيمة التشطيبات بناء على الفواتير راح جوز الست ديه طلع كل الفواتير الخاصة بالتشطيبات باسمه وطبعا خلاهم معاه ولعب على خالى وقاله خلاص لا تستعجل لما تفرج معاك ابقى ادفعهم لى

خالى كان عامل مطابخ وحمامات البيت كلها فى اتجاه واحد ... بالمسكنة والحيلة الساكن اللى فى الدور الارضى أقنع خالى انه هيحول مكان المطبخ والحمام لغرف عادية وهيعمل حمام صغير من ضمن الصالة ومش محتاج يكون فيه مطبخ (لان معه اربع اولاد.. والشقة اصلا صغيرة لانه من الاول كان مأخوذ منها غرفتين على الشارع معمولين دكاكين )

خالى سكت لان الساكن اللى فى الدور الارضى كان هدده بشكل او باخر انه اذا رفض ذلك هيرجع عليه بفواتير التشطيبات اللى لجنة تقدير الايجارات كان سبق والزمت خالى بها .. فسكت خالى لانه كان بيمر بضائقة مالية فى هذا الوقت ولم يعطه اى ورقة رسمية بموافقته على هذه التعديلات

خالى فى سنة 83 قرر انه هيأجر لابى الدور الاول بعد الارضى جيه علشان يركب مواسير الصرف فى المنور الساكن اللى فى الدور الارضى منعه وتحت ضغط من سكان الشارع خالى اضطر انه يركب المواسير على السلم (مع انه فيه منورين للبيت.. منور للحمامات والمطابخ ومنور للغرف الاخرى) ومن بعدها بدات المشاكل تتوالى

فى اواخر سنة 84 قام الساكن بالدور الارضى (بدون اذن خالى او حتى علمه) بهدم حائط الصالة المطل على المنور الخاص بالغرف وكمان اخذ جزء من المنور وعمل فيه مطبخ (للعلم الحائط المزال كان به شباك وباب كان معمول علشان يكون فيه سهولة لتنظيف المنور )

خالى كان فاض به الكيل من هذا الساكن فأول ما علم بذلك راح عمل محضر فى قسم الشرطة وطلب معاينة لاثبات الواقعة

وقال خالى بالنص فى هذا المحضر :-
(اثناء توجهى اليوم لاستلام الايجار الشهرى من الساكن /.... الذى يقيم بالدور الارضى فى المنزل الذى املكه الكائن فى /.....
وجدت هذا الساكن قام بازالة الحائط الفاصل بين الصالة والمنور وقام بعمل فتحات وازالة بعض الابواب والشبابيك داخل الشقة مخالفا بذلك شروط عقد الايجار مما ادى الى حدوث تصدع فى العقار لذلك حضرت لتحرير محضر حتى اخلى مسئوليتى عن اى اثار تترتب على ذلك )

وتم استدعاء الساكن الذى يسكن الدور الارضى الى قسم الشرطة وبسؤاله قال
- محصلش لانى استأجرت الشقة على الطوب الاحمر والتراب وكان ذلك عام 80 وقد طالبت من المالك تحرير عقد ايجار لى فرفض اعطائى عقد ايجار فلجأت الى لجنة تقدير الايجارات التى فى عام 81 قامت بتعيين الشقة والزمت المالك بعمل التشطيبات بالشقة فرفض المالك فقمت انا بتشطيبها على نفقتى الخاصة ومعى كل الفواتير الخاصة بعملية التشطيب .. وقمت بدفع مبلغ 200 جنيه كمقدم ايجار للشقة وتم خصمهم شهريا بواقع 15 جنيه فى الشهر .. لذلك اطالب مالك العقار بالمبلغ الذى قمت بتشطيب الشقة به على نفقتى الخاصة من بلاط ومحارة
-بالنسبة لازالة حائط الصالة المذكور فهو ليس يطل على منور العقار فانا قمت بازالته لانه تشقق وكان يهدد اولادى الصغار وكان ارتفاعه متر
وطوله 2.10 متر اما بالنسبة لباقى الشقة فقد شرخت بسبب تعلية المبانى بدون رسم هندسى وبدون ترخيص .. وانا قمت بجميع اعمال الشقة من من الداخل وببناء مطبخ لانى كنت واخد الشقة بدون مطبخ

ولما سئل هل قمت بعمل المبانى داخل الشقة (سكنك) والمطبخ بموافقة المالك ؟؟
اجاب : لعدم وجود مطبخ بها لم استعين بموافقة المالك لرفضه القيام بعمل مطبخ للشقة نظير اننى استأجرت الشقة على الطوب الاحمر والارضى

ولما سئل : هل قمت ببناء الحائط الذى قمت بازالته بداخل الشقة (سكنك) واعادته على مكانه الطبيعى؟؟
اجاب: انا مستعد لبناء الحائط الذى تم ازالته بمعرفتى حيث ان ارتفاعه متر وطوله 2.10 متر .. اما بالنسبة لتشقق الجدران فهذا بسبب ارتفاع المبانى وارجو تكليف لجنة فنية من مجلس المدينة لمعاينة العقار حيث اننى لم اقوم بخلع شبابيك او فتحات اخرى
وكذلك اطلب اخد تعهد على المالك واقاربه بعدم التعرض لى ولاسرتى

رد خالى على هذه الاقوال بالاتى :-

- بالنسبة للتشطيبات انا قمت بتشطيب الشقة لهذا الساكن وكانت على المحارة وكانت البلاط الخاص بها مبلطة بالاسمنت وكانت توجد بها اشياء طفيفة لم يتم عمل محارة بها والساكن استأجر منى الشقة على هذا الوضع وقام باحضار اللجنة بعد ذلك واثبتت اللجنة فى محضر وعملت معاينة بذلك وتم تقدير القيمة العقارية للشقة على هذا الوضع الا ان الساكن المذكور هو الذى قام بتغيير معالم الشقة بمعرفته مما ادى الى حدوث شروخ بالعقار مع انه لا يوجد بينى وبينه اى اتفاق بتغيير وعمل فتحات ونوافذ وازالة الحائط وكان يمنعنى من الدخول للشقة

-بالنسبة لما جاء باقوال الساكن عن ارتفاع الحائط الذى قام بازالته .. هذا الحائط كان به شباك مثل الاداور العلوية يطل على المنور وله حوائط مماثلة له فى الاداور العليا وهذا الحائط فاصل ما بين المنور والصالة كما جاء باقواله من انه طوله 2.10 وارتفاعه متر وقام ايضا بازالة شباك المطبخ واطلب لجنة فنية من مجلس المدينة لعمل معاينة

-بالنسبة لعدم التعرض له .. انا اتعهد بذلك واذا كان معه شهود تفيد اننى اتعرض له فعليه تقديمهم

المهم مرت السنين وبقى الامر على وضعه واصبح الساكن فى الدور الارضى يرمى الايجار فى المحكمة علشان يضايق خالى وبدأ فى مضايقتنا نحن ايضا بكل الاساليب فى محاولة منه للضغط علينا لكى نضغط على خالى لكى يدفع له مبلغ (50 الف جنيه) لكى يترك الشقة ..

اخر اما تعبنا ذهابنا فى عام 2008 وعملنا شكوى فى الحى (لان كان واضع سلك بقلاوة كسقف للمنور اللى هو ضمه لشقته وهذا كان يؤدى الى تراكم القمامة والمخالفات الى كانت ترمى من البيوت المجاورة والاداور التى فوقنا مما كان يسبب روائح كريهة ووجود فئران وصراصير وغيره .. ولان المطبخ بتاعه لانه موجود فى المنور الخاص بالصالة وغرف النوم ولانه موجود فى اتجاه مخالف لاتجاه باقى المطابخ الموجودة فى المنزل فكانت روائح الطبخ كلها بتطلع على الصالة وغرف النوم عندنا مما يتسبب فى مضايقتنا واجبارنا على غلق الشبابيك بشكل دائم .. اصراره على عدم السماح بادخال مواسير الصرف فى المنور ادى الى تضرر السلم مما اضطرنا الى تغير السلم على نفقاتنا الخاصة )

وبالفعل قام الحى بارسال مهندسة من ادارة التنظيم قامت بعمل معاينة وتأكدت من هدم الحائط وعملت له
- (قرار ادارى بايقاف اعمال بناء مخالف ممضى منها /ومن مدير التنظيم /ومن مديرعام الادارات الهندسية /ومن رئيس الحى) وقالت فيه ان المدعو /... الساكن بالدور الارضى بالعقار الكائن فى /... قام بهدم حائط المنور وضم المنور الى الشقة بالدورالارضى بدون ترخيص مخالفا لقوانين المبانى والتنظيم لذا يلزم ايقاف هذه الاعمال
- وبعد ذلك تم عمل (محضر جنحة تنظيم اعمال مبانى) قالت فيه المهندسة التى قامت بالمعاينة ان المدعو /... الساكن بالدور الارضى بالعقار الكائن فى /... قام بهدم حائط المنور وضم المنور الى شقته بدون ترخيص وذلك بمسطح 6متر تقريبا وبتكاليف 3000 جنيه مخالفا لقوانين المبانى والتنظيم

- بعد ذلك تحركت شرطة المرافق وذهبت مرتين الى الساكن بالدور الارضى لكنه فى كل مرة كان يسارع بترك الشقة قبل قدومهم

- فى النهاية تم تحويل الامر للقضاء ونظرا لعدم حضور الساكن فى الدور الارضى بالرغم من اعلامه بميعاد الجلسة حكم القاضى عليه بسنة سجن وكفالة 100جنيه وغرامة 3000 جنيه فقام الساكن بدفع الكفالة وعمل معارضه لان الحكم كان غيابى وانكر واقعة هدم الحائط فتم تحويل الامر لخبير

الخبير علمنا انه هيأتى يوم الاحد القادم للساكن بالدور الارضى ... الساكن فى الدور الارضى ذهب الى محامى طلب منه احضار شهود من الشارع يأكدوا اقواله بانه لم يقوم بهدم الحائط وانه تسلم الشقة على هذا الوضع ويقوم اذا امكن بمحاولة تظبيط الخبير ماديا ... وبالفعل الساكن بالدور الارضى اتفق مع ناس فى الشارع (مستغلا وجود خلافات ما بيننا وبينهم ) على الحضور للشهادة معه

احنا كمان حاولنا نجيب شهود لكن للاسف كله مكبر دماغه وبيقول انا مالى ادخل نفسى فى مشاكل وخلافات مع ناس مافيش مابينى وبينهم اى مصلحة ليه .. ولاد خالى واحنا مش بتوع رشاوى

السؤال دلوقتى :
هل ممكن نقدم المحضر السابق ذكره للخبير لاثبات انه الشهود اللى مع الساكن بالدور الارضى شهود زور ولا المحضر ده ممكن يضر اكتر ما يفيد ؟؟
هل ممكن احنا نقدم للخبير صورة المحضر واصله للمطابقة باعتبارنا اقارب لاصحاب البيت وباعتبارنا احنا اللى لجئنا للحى .. لان خالى توفى واولاده غير مستقرين بشكل كامل فى القاهرة ؟؟
لو الخبير اقتنع باهمية هذا المحضر هيكتفى باخذ صورة منه (بعد مطابقتها بالاصل) ولا لازم يأخد اصل المحضر؟؟

فيه مشكلة تانية .. (الساكن بالدور الارضى كان حاول انه يقنع المهندسة التى قامت بالمعاينة انها تغير اقوالها لكنها رفضت فراح طلب منها انها تعمل لنا احنا كمان بالمثل محضر بمواسير الصرف المتهالكة الموجودة على السلم لاجبارنا على تغيير كافة مواسير الصرف فى البيت واكد لها من خلال شهود زور اننا اصحاب البيت الفعليين وليس خالى ويبدو انه هددها بطريقة او باخرى انها اذا لم تفعل ذلك انه هيقول انها تقاضت منا رشوة .. وبدون علمنا اتعمل لنا قضية ترميم وصلت الان الى الخبير الذى طلب منا تقديم كل ما يثبت اننا مستأجرين وليس ملاك للمنزل وفى انتظار قدومه للمعاينة)
هل هذا الامر ممكن يفيده فى قضية الحائط اللى هو هدمه ؟؟
مع العلم ان الحائط لما هدم كان البيت يعتبر حديث البناء ولم يكن به استهلاك لانه يدوب كنا احنا والساكن اللى فى الدور الارضى اللى مقيمين فى البيت

معلش الموضوع طويل بس انا محتاج المساعدة على وجه السرعة ؟؟
ساعدونى وقولوا لى ايه اللى اقوله واعمله علشان هذا الساكن ينال عقابه اللى يستحقه خاصة انه مقوم السكان اللى فى الاداور العليا علينا ولاعب فى عقلهم ومخليهم رافضين يعملوا اى اصلاح فى مواسير الصرف المتهالكة الموجودة على السلم واللى للاسف عاملة رطوبة فى اسقف الحمامات فى البيت

حتى من شهرالساكن فى الدور الارضى سقف الاوضة بتاعته اللى تحت الحمام بتاعنا المحارة بتاعتها تهالكت ووقعت قام جرى على الحى وقال اننا عملين كسر فى الحمام بتاعنا وبنسرب عليه ماء ليل ونهار لغاية اما وقعنا له السقف بس احنا معندناش اى كسر او شروخ فى أرضية الحمام فموظفين الحى قالوا بعد المعاينة ان سبب وقوع السقف عنده تشبع السقف بالرطوبة نتيجة لتهالك الصرف الصحى الموجودعلى السلم وتسريب المياه الذى يبدأ من الدور الخامس (الدور الرابع فوق الارضى) مع العلم الدور الخامس ده غير مسكون بالمرة حتى مش متشطب يدوب متروك على المحارة بس هو لما فشل فى انه يلصق التهمة فينا حاول مع بتوع الحى علشان يلصقوا التهمة فى اصحاب البيت اللى هما ولاد خالى

ساعدونى الله يكرمكم

سيوافيك أهل القانون إن شاء الله بالرد الشافي

مرحبا بك

السلام عليكم ورحمه الله وبركاته
الاستاذ شريف عبد العزيز محمد
الموضوع خطير الله ييسر اموركم وتلاقوا الحل اللى يرضى الطرفين
ممكن الموقع هذا يفيدك :- http://reda79.arabblogs.com/redalawyer/
بارك الله فيك وسدد خطاك
دمت بحفظ الله ورعايته

بالتوفيق

أكرم عبد القوي كتب:: سيوافيك أهل القانون إن شاء الله بالرد الشافي

مرحبا بك

شكرا لحضرتك ... واتمنى ان اجد مساعدة فى اقرب وقت ان شاء الله

smile every morning كتب:: السلام عليكم ورحمه الله وبركاته
الاستاذ شريف عبد العزيز محمد
الموضوع خطير الله ييسر اموركم وتلاقوا الحل اللى يرضى الطرفين
ممكن الموقع هذا يفيدك :- http://reda79.arabblogs.com/redalawyer/
بارك الله فيك وسدد خطاك
دمت بحفظ الله ورعايته

بالتوفيق

جزاك الله خيرا ..هو الموضوع طويل ومتشعب
انا كنت وجدت هذا الموقع على النت وبعثت مشكلتى بالايميل بس ما فيش حد رد عليا للاسف
علشان كده لجأت لكتابة مشكلتى هنا فى المنتدى لعلى اجد (من بعد الله) من يساعدنى ويوجهنى للتصرف السليم
بس ياريت يكون ده قبل يوم الاحد ان شاء الله

أستاذ / شريف عبد العزيز

تم تحميل السؤال وسيتم عرضه على أهل القانون

وسنوافيك بالرد فى خلال يومين فقط أو أقل

تحياتى لك

أخي الكريم
تعرضت لموقف مشابه ولكن كانت حجتي في ذلك ان الساكن له عقار اخر في ذات المنطقة ومبني اكثر من 3 ادوار وتوجه الخبير لذلك العقار وأثبت

حالة رغم ان الساكن كتب العقار بإسم زوجته تحايلا على القانون وبالفعل تم طرده ، وصدقاً لو في مكانك حأعرف السكان المتضامنين معه إني حأجيب

قرار ازالة للبيت بالكامل ( طبعا ده في مصلحتي لإن سعر الارض اعلى من القيمة الإيجارية ) وطبعا ده موثق من كلامك بمحاضر ان البيت فيه شقوق

ومتصدع وساعتها كل واحد حيعرف نعمة المكان اللي عايش فيه بإيجار زهيد وغيره مش لاقي وحتشوف حيجددوا المواسير وحيظبطوا الدنيا ازاي.

تحيتي ووفقك الله لما فيه الخير.

يسرى محمد جاد كتب:: أستاذ / شريف عبد العزيز

تم تحميل السؤال وسيتم عرضه على أهل القانون

وسنوافيك بالرد فى خلال يومين فقط أو أقل

تحياتى لك

مازالت فى انتظار الرد

» استشارة قانونية
» محتاج مساعدتكم
» استشارة
» سؤال محتاج جواب؟؟؟
» استشارة عن ضم الخدمة