انت يا شحط ... أيوه .. انت اللى هناك

انت يا شحط ... أيوه .. انت اللى هناك



- انت يا شحط...أيوه..انت اللى هناك...أيوه...انت..ياللى معاك دكتوراه...انت لو أخوك ولا أبوك طلب منك توكيل بتمضى له على التوكيل كده من غير ما تعرف توكيل على ايه ولا مكتوب فيه ايه ؟؟!!

- وانت..انت يا ثورى...ياللى نزلت قلبت الدنيا على مرسى علشان خايف يستغل إعلان دستورى فى اجراءات استثنائية..نازل تفوض الجيش يواجه الإرهاب ازاى بالظبط ؟ فيه اجراءات معينة معلنة ؟ فيه قانون محدد ؟ فيه أسماء ؟

- وانتى يا مدام..ياللى رايحة وجاية على الكنيسة...انتى بتفوضى بتوع مذبحة ماسبيرو على ايه بالظبط ؟ لو كنيستك اتحرقت بكره ونزلتى تعملى مظاهرة ضامنة انهم مش هايدوسوا عليكى بالمدرعة تانى بالتفويض بتاعك ؟

- وانت يا باشا..أنا عارفك فلول صحيح وبتاع شفيق...انما عسكرى الجيش اللى هايبقى واقف فى الشارع فى نص الليل يصطاد الإرهابيين هايصطاد ابنك اللى راجع من النادى معاهم..الإرهابى مابيبقاش مكتوب على هدومه: ارهابى..

- وانتى يا آنسة...أنا عارفك مابتطيقيش الدقون والمنقبات صحيح..ونفسك تصحى الصبح تلاقيهم اختفوا...بس لو كل واحد فينا ادى تفويض للجيش يبيد كل اللى مش عاجبينه فى البلد..أؤكد لك انك مش هاتكملى معانا كام أسبوع..

- وانت ياللى عايش على لحس البيادة...لحسوها قبلك كتير..شوفهم فين دلوقتى...

- وانتى يا حاجه...ياللى مابتتفرجيش غير على القنوات اياها..جربى مرة اتفرجى على الجزيرة مباشر مصر ولا الحوار ولا القدس ولا اليرموك ولا المستقلة..وشوفى الناس اللى فى رابعه...هم دول اللى السيس عايز تفويض منك علشان يقتلهم..اذا كان ضميرك مريحك ان دول يستحقوا القتل..فأنا كمان ضميرى مريحنى انك تستحقى القتل...

- وانت ياللى عمرك ما قريت كتاب تاريخ..ولا شفت بلاد الدنيا...روح اقرا وشوف..ولو لقيت ان فيه تيار أو مجموعة مواطنين أصحاب قضية عددهم بالملايين سكتهم مدفع أو دبابة..ولو جت لك معلومة ان الدم بيجيب سلام اجتماعى أو حياة مستقرة أو وحدة شعب...ولو قريت عن أى حرب أهلية البلد ماتدمرتش فيها وأولهم أمثال حضرتك ابقى تعال قوللى...

منقول