عدد الرسائل : 709بلد الإقامة : القاهرةاحترام القوانين : العمل : الحالة : نقاط : 5262ترشيحات : 20الأوســــــــــمة :
موضوع: بلغى البوليس يا زينب 5/12/2012, 15:44
قرأت لكم هذه القصة لشاب غلبان بيفكر فى الزواج رغم انه شاب متعلم زى أخوىا وحبيبى حمادة قرنى لكن مش لاقى شغلانة لأن حال البلد لا يسر عدو ولا حبيب والدنيا واقفة والحالة ضنك وسواد وعيشة ما يعلم بيها الا ربنا .
ولنبدأ مع الشاب الذى يروى حكايته اقرأو معايا :
آخيرا وبعد طول عنــــاء قرر العبد لله اتخاذ قرار من شأنه ان يغير طريق حياتى بشكل جزرى ... لقد قررت ..
اتجوز !!
طبعا عريس زيى يعتبر لقطة لأى بنت ... يعنى تلاقى فيا مواصفات نادرا لما تلاقيها فى اى متقدم للزواج
فأنا على سبيل المثال لا الحصر طبعا ... عاطل + شحات + فقرى !!
اظن ان دى مواصفات يصعب على اى عائلة تبحث عن النسب الأصيل ان تجدها فى غيرى الا فيما ندر ... ومن هذا المبدأ فقد تشجعت لهذه الخطوة الجريئة
مبدئيا كدة ... بم انى عاطل .. فأول حاجة هافكر فيها عشان اقدر اتجوز ... هى مصدر اعتمد عليه للصرف على تكاليف هذا الفيلم ... وطبعا بدون تفكير لم اجد نفسى الا وانا انطق اسم واحد فقط ... ابويا !!
بعد تكتكه ومخمخمة لأيجاد طريقة للدخول بها لوالدى العزيز لأقناعة بالمسألة بدون خسائر مادية او روحية ( مين روحية دى ؟!! ) ... جاء أخيرا اليوم الذى اخترته لأفاتحه فيه بالموضوع ... ففى هذا اليوم استيقظت باكرا ... باكرا جدا ... قبل ان يستيقظ اى شخص فى منزلنا الموقر ... وانتظرت كثيرا حتى استيقظ الوالد ( طلع نومه تقيل اوى) !! فتح والدى باب غرفته وهم بالخروج وهو يدعك بكلتا يديه فى عيناه ليجدنى فى وجهة مباشرة !!
ابويا : حراماااااااى ... حرامااااااااااااااااى ... اطلبى البوليس يا زينب ... يا زينااااااااااااااااااااب ... انا مش هاسيبك الا فى القسم يا نصاب .. هى العملية ناقصة ... جاى تسرق غلابة يا أهبل ... طب روح اسرق المعلم سيد اللى فوقينا .. اهو هاتلاقى عنده حاجات كتير تتسرق ... انما احنا هاتسرق من عندنا ايه .. كباية شاى ولا رابطة بقدونس ... تعرف انا هاسلمك للبوليس مش عشان انت نصاب لأ .. انا هاسلمك عشان انت اهبل ... عارف يعنى ايه اهبل ؟؟
انا محاولا التخلص من قبضة السيد الوالد : استنى يا زينب .. اوعى تقربى من التليفون ... يخربيت اللى يزعلك ... انا ابنك يا حاج !! ابويا : كداب انا ابنى صايع ومابيجيش البيت قبل الضهر ... العب غيرها يا نصاب ... يا حراااااااااااااااامى ... مش هاسيبك الا فى القسم !!
ابويا بعد ما لبس النضارة : ايه ده ؟!! ... انت ايه اللى مقعدك فى البيت الساعة دى ... يبقى اكيد عملت مصيبة برة وجاى تستخبى هنا يا صايع ( وراح ماسك فيا تانى ) .. المرة دى بقى انا اللى هاسلمك للبوليس بأيدى ... انتى لسه ما اتصلتيش بالبوليس يا زينب ؟؟!!
امى : خلاص بقى يا حاج اهدى شوية خلينا نشوف فى ايه ... وانت يا مدعوق ... ايه اللى رجعك الساعة دى ؟!!!
انا : هو في ايه .. مش بيتنا ده بارضو ... ولا ده بيت السلاحف ... ولا ايه ؟!!
طرااااخ ( قلم على الهوا !! ) .. وراح قافش فى هدومى تانى !!
ابويا : بيتك ؟؟ ... هو اللى زيك ليه بيت يا صايع .. ده السلاحف بتقعد فى بيتها على طول ... انما انت برة البيت على طول يا متشرد ... آل سلاحف آل ... جاك سلاحف نينجا لما تبقى ترميك فى بلاعة كهربا يا بعيد !!
انا بنرفزة : جرى ايه يا حاج ... ما تهدى شوية .. وشوفنى جايلك فى ايه ... الله ؟؟!!!
امى : خلاص خلاص يا حاج اقعد كدة وروق .. وشوف ابنك عايز ايه منك .. على ما أروح احضرلكوا الفطار ... ربنا يهدى سركوا ...
بعد مرور ساعة او ازيد تقريبا من الشد والجذب ... تخللها الفطار المصرى الشهير .. الفول وتوأمه الطعمية .. ثم كوباية الشاى بالنعناع البلدى ... تمت السيطرة على والدى المبجل .. وهدأت الحرب المشتعلة وحصلنا على هدنة والحمد لله !!
ابويا : أدينا يا سيدى فطرنا مع بعض على غير العادة .. وحبسنا بكوباية الشاى كمان ... ممكن تقولى عايز ايه ... وايه اللى كان موقفك قدام باب الاوضة من طلعة الشمس زى الحرامى اللى مخلص شغله وماشى كدة ؟!!
انا : شوف يا حاج ... بدون مقدمات .. واحراج وكلام ورغى كتير ... انا هادخل معاك دوغرى !!
ابويا : تعجبنى !!
انا : أنا عايز اتجوز !!
ابويا : أطلبى البوليس يا زينب !!
انا : يوووووه ... ايه يا حاج ... انت ليك حد واحشك فى القسم ولا ايه ... هو كل جملة مفيدة نقولها لازم تتختم بالبوليس ؟!!
ابويا : ما هو لما مايبقاش عندك دم للدرجة دى ... ووصلت للمرحلة دى من الاوعى ... يبقى لازم أطلبلك البوليس عشان ياخدوك فى الحجز يفوقوك بكام قلم !!
انا : شوف يا حاج ... انا مش هاكلفك كتير ... انا كل اللى عايزه أوضة على سطح اى عمارة بمنافعها وقضيت على كدة !!
ابويا : آه ... ومين بقى بنت المجنونة دى اللى هاتوافق تتجوز واحد عاطل وشحات زيك ؟!!
انا : يووووووووه ... ده الحريم على قفى من يشيل يابا ... ده دلوقتى اللى بيتجوز واحدة .. بيدوله اختها هدية !!
ابويا : اطلبى البوليس يا زينب !!
انا : ليه تانى ؟!!
ابويا : عشان انت كداب ... ازاى العروسة وأختها ... ما ينفعش ... شرعا لا يجوز !!
انا : يابا .. انا بقولك مثلا يعنى ... اللى عايز أوصلهولك ان البنات دلوقتى بقوا أكتر من عروض المحمول ... وأسهل من مسابقات قناة ميلودى .. يعنى اللى هاتطلبها للجواز دلوقتى ... لا هاتدقق فى مهر ولا شبكة ولا مؤخر ولا الكلام الفاضى بتاع زمان ده ... الأهالى دلوقتى بقى كل اللى يهمهم حتة يتلم فيها الواد والبت وخلاص ... ده اللى عنده بنت دلوقتى بقى بيشتركلها فى قناة زواج اللى على الدش عشان يشوفلها عريس .. يعنى بيدللها على راجل !!
ابويا : طب وهاتصرف عليها منين بعد الجواز يا فالح .. ده انت صايع .. لا شغله ولا مشغلة !!
انا : والله بتتقضى ... وانا مقدم على كام شغلانة كدة وربك يكرم بقى .. بارك انت باس يا حاج ... وهى هاتسلك !!
ابويا وهو يحضننى بمنتهى التلقائية : الف مبروك يا حبيبى ... ياااااااااااااااه جه اليوم اللى اشوفك فيه عريس ... يا سلاااااااااااااااااااام ... انا جعان !!
انا :ها !!!!!!!!!!
امى : ما أحنا لسه شايلين الفطار يا راجل ... ايه ... لحقت هضمت ؟!!
انا مستدركا : المهم دلوقتى يا حاج ... انا منمًر على واحدة كدة بنت ناس .. وكنت عايزك تيجى تشوفها معايا ..
انا : ليه بس يا حاج ... ما كنا ماشيين كويس ... مالها بس سونيا ؟؟
ابويا : انت ياض عايز تتجوز واحدة ... بتبات فى بيوت الناس اكتر ما بتبات فى بيتهم ؟!!!
انا : لالالالالا .. انا ماسمحش الكلام ده يتقال ابدا عن سونيا ..دى ست سمعتها زى البرلنت !!
ابويا : عشان لما ابقى اقول عليك اهبل تبقى تصدقنى .. انزل ياض كدة ووقف اى عيل صغير ماشى فى الشارع .. وأسأله تعرف ايه عن سونيا ؟!!!
انا : يابا وعلى فرض ... اللى فات مات خلاص ... واحنا ولاد النهاردة ... والست خلاص اتحجبت دلوقتى .. وبقت حاجة كدة ماشاء الله مثال للمرأة المثالية ... ورمز للعمل الوطنى !! ابويا : العمل الوطنى ؟؟ ... هو انت هاتتجوز هدى شعراوى ولا ايه ؟؟ ... دى سونيا ياض ... سونياااااااااااااااااااااااا !!
انا : ياعم عارف انها سونيا ... هو انا قولتك عبد الهادى ؟!! ... بارك انت بس الجوازة وهى هاتتقضى وربنا يسهلها ان شاء الله
ابويا وهو يحضننى بنفس التلقائية : الف مبروك يا حبيبى .. آخيرا جه اليوم اللى اشوفك فيه عريس ... يا سلااااااااااااااااام ... بس انا لسه جعان !!
بعد جلسة المباحثات المطولة على المائدة المستديرة المسماه عند الطبقات الشعبية بالطبلية ... وافق والدى العزيز على العروسة وقرر الذهاب الى بيت العروسة للتقدم !! وفى مساء اليوم التالى ارتديت قميص جديد آخر صيحة استلفته من أحد الجيران ( الله يستر عرضه ) .. قميص عليه كل الوان الورود المختلفة .. أخضر × احمر × ازرق .. جنينة متنقلة !! .. وارتدى والدى هو الآخر جلبابه الابيض .. صاحب أكبر بقعة زيت فى المنطقة كلها ... رغم اننا بنستعمل برسيل ابو نضافة مالهاش مثيل !! ... ماعلينا .. انطلقنا على بركة الله متجهين الى منزل الست سونيا ... وما ان وصلنا وفتحت لنا سونيا الباب ... حتى انطلق والدى فى الهتاف .. ازيك يا طاهرة ... يا شريفة ... يا ..
انا مقاطعا : ايه يا حاج ... انت داخل مقام ؟؟ ... خش يابا من غير فضايح .. أحسن الولية دى ايديها طويلة وبتاكلها !!
ابويا بخوف : حـ .. حاضر !!
ودخلنا وقعدنا ...
ابويا : بسم الله ماشاء الله ... البيت جميل .. وفيه حمامين وصالة كبيرة كمان .. والله ولعبت معاكى يا سونيا .. ده أنا آخر مرة دخلت البيت ده ما كانش فيه أوض !!
انا : طب بس بقى أحسن جايه ..
الست سونيا : يا اهلا وسهلا .. يا اهلا وسهلا ... خطوة عزيزة ... شرفتونا وآنستونا
ابويا : اهلا بيكى يا ست سونيا ... شوفى يا ستى احنا هانخش دوغرى فى الموضوع .. وبدون مقدمات ... من الآخر كدة ... انا جاى اطلب ايدك لأبنى !!
سونيا : بوليس لمين يا عنيا .. ما الحارة كلها عارفة انى بتاجر فى الآثار .. بس اللى عنده دليل عليا يثبت ...
ابويا : آه يا منحرفة !!
انا مستفسرا : طب هو حضرتك بتعملى ايه بالظبط .. يعنى بتروحى بالليل تسرقى تماثيل من المتحف وتبعيها يعنى ولا ايه بالظبط ؟؟
سونيا : لالالالالالا .. دى شغلانة كبيرة .. آه .. كبيرة أوى يا سى الأفندى .. وانا مجرد حلقة فيها ... كل دورى فى الموضوع ده هو النقل من مكان الاستلام لمكان التسليم وآخد حسنتى واتكل !!
ابويا : طب يعنى الشغلانة دى مش صعبة على واحدة ست زيك ؟؟
سونيا : بالعكس .. دى الشغلانة دى بالذات ماينفعهاش غير واحدة ست !!
انا وابويا فى نفس واحد : اشمـــــــــعـــــــــنى ؟!!!
سونيا : ايه هو ده ؟ ... قصره .. عشان انا اللى بنقل القطعة من مكان الحفر لمكان التسليم بالعربية وطبعا القطعة دى ببقى رابطاها حوالين وسطى وفوقيها البس الفستان الجينز بتاع الحوامل ... واعمل نفسى حامل !!
انا : ولو اى لجنة وقفتك فى الشارع استحالة تشك فى هدومك !!
طرااااااااااااااخ ( صوت باب الشقة ينفتح بعد كسره !! )
سونيا : ايه ده انتوا مين ؟ ... وعايزين منى ايه ؟؟
الظابط : آخيرا وقعتى يا سونيا ... ده انتى مغلبانا وراكى من أكتر من سنة .. كله يقف مكانه !!
ابويا ببلاهة : زينب بلغت البوليس !!
الظابط : نعم ؟!!!
ابويا : لأ مفيش ياباشا !!
الظابط : قدامى كلكوا !!
بعد ليلة طويلة فى القسم من أجراءات واسئلة واجوبة لم تخلوا بالطبع من بعض المناوشات اليدوية من جانب السادة المخبرين !! ( حاجة كدة زى خدمة العملاء ) ... تم أخراجنا من القسم انا ووالدى سالمين بعد ان اثبتت التسجيلات التى أخذت عن شقة المدعوة سونيا ( الله يحرقها ) ان انا وابويا مالناش فى الموضوع .. وخرجت الصحف فى اليوم التالى تزف الخبر التالى : القبض على أكبر شبكة تهريب آثار فى البلاد .. وتورط مسئولين كبار فى القضية !!
ابويا وهو جالس على الكنبة بجوار والدتى : ها يا حبيبى ... مش عايز تتجوز ؟!!
انا : أطلبى البوليس يا زينب !!
كابتن أحمد منصور مشرف
عدد الرسائل : 6488بلد الإقامة : المدينة الفاضلةالعمل : الحالة : نقاط : 16904ترشيحات : 47الأوســــــــــمة :
موضوع: رد: بلغى البوليس يا زينب 6/12/2012, 00:52
هههههههههههههههههههههههههههههههههههههههه نهاية مش معقولة وسرد يجعل القارئ يتابع رغم أنفه هههههههههههههههههههههه
أكرم عبد القوي __________
العمر : 57عدد الرسائل : 23180بلد الإقامة : مصراحترام القوانين : العمل : الحالة : نقاط : 36969ترشيحات : 136الأوســــــــــمة :
موضوع: رد: بلغى البوليس يا زينب 6/12/2012, 01:22
أستاذي صاحب القلم الحرفي جدا
طاب لي التنقل بين حوارك الرشيق والممتع
وكما تعودنا منك المفاجآت والتي لا نتوقعها
وكما تعودنا منك أيضا الإستفادة من أسلوبك السهل الممتنع والذي لا يتقنه إلا الندرة من الأدباء
محظوظ أنني أقرأ لك يا أستاذي الكبير
فلا تحرمنا من تكرار هذه الوجبات التي نتوق لها دائما
عريس لقطه عضو فضى
عدد الرسائل : 1383بلد الإقامة : الجيزهاحترام القوانين : العمل : الحالة : نقاط : 7989ترشيحات : 5الأوســــــــــمة :
موضوع: رد: بلغى البوليس يا زينب 6/12/2012, 01:35
انا هنا ليس لإبداء اعجابي بل لإبداء انبهاري الشديد لكن لأول مرةأكتشف ان هناك عريس لقطة غيري هههههههههههههههههه
مصطفى عبد العاطي شخصيات هامة
عدد الرسائل : 709بلد الإقامة : القاهرةاحترام القوانين : العمل : الحالة : نقاط : 5262ترشيحات : 20الأوســــــــــمة :
موضوع: رد: بلغى البوليس يا زينب 6/12/2012, 12:48
كابتن أحمد منصور كتب:
هههههههههههههههههههههههههههههههههههههههه نهاية مش معقولة وسرد يجعل القارئ يتابع رغم أنفه هههههههههههههههههههههه
أستاذ أحمد أشكرك على تواجدك على متصفحى وأرجو ان أكون قد أدخلت البهجة فى نفسك فى ظل الأحداث التى تمر بها بلادنا الان . لك تقديرى واحترامى .
مصطفى عبد العاطي شخصيات هامة
عدد الرسائل : 709بلد الإقامة : القاهرةاحترام القوانين : العمل : الحالة : نقاط : 5262ترشيحات : 20الأوســــــــــمة :
موضوع: رد: بلغى البوليس يا زينب 6/12/2012, 12:54
[/quote]أستاذي صاحب القلم الحرفي جدا
طاب لي التنقل بين حوارك الرشيق والممتع[quote]
أكرم باشا أخجلتم تواضعنا فقد أستمد قلمى كلماته من وحرفيته من عظمة كتاباتكم فى منتداكم القيم . لك احترامى وتقديرى .
بيومي الفيومي عضو مبدع
عدد الرسائل : 818بلد الإقامة : الفيوم مصراحترام القوانين : العمل : الحالة : نقاط : 7162ترشيحات : 7الأوســــــــــمة :
موضوع: رد: بلغى البوليس يا زينب 7/12/2012, 02:14
ههههههههههههههههههههههههههه كاتب كوميدي نظيف من الدرجة الأولي الممتازة بعيد عن أسفاف أهل الفن بتوع الأيام دي جميييييييييييييل
ابن سينا مستشار أدبي
عدد الرسائل : 1928بلد الإقامة : الكويتاحترام القوانين : العمل : الحالة : نقاط : 7997ترشيحات : 129الأوســــــــــمة :
موضوع: رد: بلغى البوليس يا زينب 7/12/2012, 16:35
الأخ مصطفي عبد العاطي -
أمتعتنا بسردك القصصي من السهل الممتنع والضاحك الباكي بقصة رائعة وجميلة ومحبكة الُصنعة تستحق التقييم, تقبل مروري و إعجابي وتقديري.
أخوك - ابن سينا.
حماده قرني صلاح مراقب عام
العمر : 37عدد الرسائل : 8036بلد الإقامة : مصراحترام القوانين : العمل : الحالة : نقاط : 19165ترشيحات : 79الأوســــــــــمة :
أوعي وشك يا جدع انت وهو الباشا جاب اسمي في المحضر هههههههههههههههههههههههههههههاي يابختك يا واد يا حماده محدش أدي هنا مصطفي باشا بذات نفسه بيذكر اسمي في قصه من قصصه الرهيبه بس علي فكرة بقي من غير مجامله رهيب علي الآخر وبطل القصة دا حاله من حالي في حاجات كتير وحاله من حال شباب كتير بس سيبك انت ياباشا أنت ملكش حل فعلا أيوا كدا خلي قلمك يعبر عننا كلنا أنا بقي اللي عازمك علي بط ومن بتاع بركة قارون
هناء العدوي مكرم
عدد الرسائل : 1164بلد الإقامة : القاهرةالعمل : الحالة : نقاط : 7396ترشيحات : 12الأوســــــــــمة :
موضوع: رد: بلغى البوليس يا زينب 7/12/2012, 21:25
أستاذ مصطفي متشكرة انك رسمت الضحكة علي وجهي اليوم بعد اكتئاب كبير من نشرات الأخبار
موضوع: بلغى البوليس يا زينب 
5/12/2012, 15:44
