رحلة فى خريطة بلدى

رسمت خريطة لبلدى من أسوان لأسكندرية وأسكندرية ماريا وترابها زعفران وعرفتها من قبل الزمان بزمان ببحرها وحبها لكل الناس برجالها وعيالها وبناتها وترامها والمرسى ابو العباس الله عليكى يا عروسة البحر يا مدينة السحر من ابو قير للمنشية من باكوس للابراهيمىة ياللى فيكى اسيادنا بشر وجابر يا بلد الأكابر يا بلد الأتحاد والأوليمبى . . بتقول أيه .. أصل عم صابر قاعد جنبى بيقلى ايوووه هو انت أسكندرانى قلتله ولا حتى خيلانى لكن بحبها لأنها . . حتة من بهية اسمها اسكندرية .ومسكت قلمى وكملت بقيت خريطتى وشرقت والبحيرة رسمت بلد الصيادين الطيبين و الفلاحين الشقيانين والخير عندهم كتير فى دمنهور ومديرية التحرير ودخلت منها الغربية وطنطا والعيشة أونطة فى أونطة وشى الله يا سيد بنجيلك لاجل نعيد وناكل حلاوة حمصية وكمان مهلبية ونعيش عيشة هنية وناكل الفول والطعمية من عند البغل فى المحلة والمصانع علينا هلة ونسيجها ولا أجدع فابريكة لا فى الصين ولا امريكا تعملك جلابية وبجامة حاجة آخر ايامة ومشيت بقلمى لدمياط والنيل عندها ليه فرعين والسمك فيها بقرشين والجو فيها جميل مش حر دى فيها يا ولاد راس البر فيها الموبيليا والحلويات ومصيف لكل المستويات
ومن دمياط للمنوفية عديت على قويسنا ومنوف وأهلى فيها الوف والوف كرم وشهامة وجدعنة آل ويقولوا المنوف لا يلوف بالذمة برضه ده كلام ولا هو كلام افلام اى نعم كان منهاحسنى مبارك بس برضه كان منها السادات بطل المعارك وشهداء دنشواى الجدعان اللى وقفوا ضد الطغيان عشان يحموا ارضهم ويصونوا عرضهم . وجريت بقلمى بحنية ودخلت بيه الشرقية الله عليكى وعلى ولادك الجدعان عزموا القطر على فطار رمضان وده مش عبط منهم ده كرم زيادة فى دمهم ومحدش يقدر يذمهم لان محدش قدهم بلدى وحبيبتى ومسقط راسى وطول عمرها مبتسعاش لكراسى لغاية لما جه مرسى وقعد ع الكرسى .وده نصيب اى والله نصيب وركبت ورحت المنصورة شفت الأموره ماشية تتمختر زى السنيورة وبعزيمة واصرار وقفوا ولادك فى وش الاستعمار ومسكوا لويس وحبسوه وعلى دار ابن لقمان ودوه الله عليكى يا منصورة دايما موجودة فى الصورة بناسك الطيبين العاشقين لترابك . ومشيت على طول على بنها اللى جيرانى منها ناس اى نعم طيبين بس واعيين اهم برضه مصريين عندهم الارض وخير الارض وعايشين بالطول والعرض وعمار يا مشمش العمار وماشى ع الترعة واحد راكب حمار بيغنى بالمزمار
وراجع من الغيط اخر النهار ساحب جاموسته ومروح لعروسته ماهو عريس جديد متجوز يوم العيد رجال القليوبية سواعدهم قوية وارضهم طرية وعيشتهم هنية مشيت من عندهم وقلت أنزل بقى على وجه جبلى وأجبل وأول ما جبلت ع الفيوم نزلت وقدام السبع سواقى وقفت
ليه هناك حكيات وذكريات من كوم أوشيم لبحيرة قارون ليه معاهم ذكريات من زمن فات دى سويسرا الشرق ومفيش فرق واحة فى الصحراء أبدعها رب السماء بلد الفلكلور الأصيل بيحضنها النيل وبحر يوسف بيقسمها نصين حاجة تاخد العين ودلوقتى لي اصحابي واحبابى فى الأعلامى أجمل المنتديات أدباء ومبدعين وكمان ناس عاديين كلهم أخواتى وولادى كلهم على الراس والعين ياجمال البحيرة والبط حاطط عليها والنورس طاير فوقيها وعلى شطها يتقابل الاحباب والأصحاب ليكى منى سلام يا فيوم يا بلد السلام فى قراك رجال فلاحين ابطال زارعين ارضهم بالخير


وهنا وفى الفيوم وقفت اخد راحة قبل ما جبل على باجى الصعيد .
وسوف استكمل باقى الرحلة بعد ان اقضى راحتى على شاطئ بحيرة قارون .

رحلة كبيرة لقلم عظيم شوقنا بأسلوبه الفريد

قلم انغمس في كل شبر من مصر

فأخرج لنا لوحة أدبية فنية يعجز كبار الفنانين عن الاتيان بمثلها

تمتلك قلم متلون المواهب ..مجنح الثقافات

أستاذي مصطفي بك

كلما حاولت أن أجاريك أكتشف أنني مازلت صغير الهامة بجوار قلمك السامق

ننتظر علي أحر من الجمر ما تجود به

كابتن أحمد منصور كتب:

رحلة كبيرة لقلم عظيم شوقنا بأسلوبه الفريد

استاذ احمد العظيم والفريد متابعتك لنا وتشريفكم لصفحتنا فلك منى كل حب وتقدير .

[u]

اقتباس :

"أكرم عبد القوي"
كلما حاولت أن أجاريك أكتشف أنني مازلت صغير الهامة بجوار قلمك السامق
ننتظر علي أحر من الجمر ما تجود به [u]

لولا تشجيعكم الدائم ودعمكم الزائد لى ولولا اننى تتبعت كتاباتكم ونهجت مدرستكم العتيقة فى الكتابة لما كتبت حرفا هنا.
فأنتم هامة كبيرة لن استطيع ان اقف بجوارها استاذى .
لك كل حب وتقدير .

حماده قرني صلاح كتب:

أنت فعلا باشا وقلمك قلم بشوات
عرفت تجمع الحاجات دي ازاي
دا أنا لوقعدت شهرين معرفش أجمع نص الحاجات دي ياباشا
مع إني جايب مصر من شرقها لغربها
بس انت ياباشا نزلت الفيوم وعارفها حتة حتة
شوف بقي أول ما توصل كوم اشيم قول بس حماده
وشوف بقي اللي هيحصل هتلاقي كلهم صوتو في وشك
اصلهم بيحبوني أوي ومستنين اليوم اللي أسيب فيه الفيوم ومرجعش ههههههههههههههههههههههههاي [u]
ملكش حل ياباشا

انما انت ايه رأيك يا هندسة انا كمان مش عايز اقولك على طامية وعين السيليين وهدرات العزب وأبراج الحمام بتاعة بنى صالح والكتاكيت الفيومى
وبط البحيرة بتاعك اللى ماشفتش منه حاجة . عموما لو نزلت كوم اوشيم هاسأل على حمادة وانا ونصيبى .
شكرا يا هندسة على وجودك معى هنا .
لك كل تقدير واحترام .

الأستاذالعزيز مصطفي عبد العاطي
كما قال الستاذ المكرم أكرم هي لوحة فنية رسمتبقلمك أجمل ما في مصر بمنتهي الفن والتذوق اللغوي
تحية قلبية لك

غير متصل كتب:

الأستاذالعزيز مصطفي عبد العاطي
كما قال الستاذ المكرم أكرم هي لوحة فنية رسمتها بقلمك أجمل ما في مصر بمنتهي الفن والتذوق اللغوي
تحية قلبية لك

اخى الفاضل اشكر لك ثناؤك علينا واجمل ما فى الموضوع تواجدكم هنا فى صفحتى .
تقديرى لحضرتك .