العاديات الصافنات الرهيبات .... الواثبات المشهرات السلايل

قصيدة للشاعر / الأسمر بن خلف الجويعان العنزي

(( _ يصف بها الخيل وما أتت به في العصور القديمة _ ))
,
,


يوم اتذكر بالعصور القديمات* واسمع رواة يذكرون القبايل
تذكر علوم شامخات جزيلات * كود السوالف باقيات سمايل
يسوقني شوق لها كل الأوقات * وأطرب لها لو كان ماضي وزايل
لو كان فيها للعرب شن غارات * ومشاحنات بين صايل وجايل
إليا صوت الغزاي وأدلى بالأصوات * مد العقيد وحضبوه الأوايل
تتليه دقلات السبايا الرزينات * وأقفى يدور معبسات الشمايل
غاروا على وضح تلالا لهيقات * حالوا عليهن كاسبين النفايل
وصاح المصيح فوق ناب الطويلات * البل خذوها مقحمين الدبايل
لحقوا هل البل طالبين المثارات * المعتزين بناقضات الجدايل
لحقوا على قب من الخيل عجلات * لحقت بكل مجرب له فعايل
الموت عند قطيهن له علامات * كم فارس من فوق سرجه تمايل
حمي الوطيس وصار للسيف صرخات * تلاحمت به صافنات الأصايل
المكرمات الضابحات الأصيلات * مسومات هاجمات ثقايل
القادحات المسرعات الثقيلات * الهاذبات بالغضب والغلايل
العاديات الصافنات الرهيبات * الواثبات المشهرات السلايل
المرهمات القاحمات السريعات * الراجفات اللاحقات العجايل
الجادفات الصاهلات الخطيرات * الجامحات الشاحنات الهوايل
عليهن اللي يدحمون المهمات * متوشحين (ن) بالسيوف الصقايل
تلاحموا بمصقلات شطيرات * قطف النفوس وساخن الدم سايل
المدرعين الشاهرين الصقيلات * القاتلين ومرملين الحلايل
ياما أرملوا من جادل زوجها مات * بسيوفهم طشوه حدر النثايل
يالمستمع عصر مضى وانقضى فات * جيله رحل والجيل هذا نزايل
عنهم سألت وقيل تحت الثرى أموات * وحنا بثرهم سائقين الرحايل
دنياك يالمخلوق تجريبها اّفات * دنياك هذي بين عدل ومايل
لو أقبلت دنياك تجزيك باقفات * أقفت بفارس عبس وكليب وائل
وين الأصيل اللي حكم بالمساوات * كل (ن) شهد له بالفعول الجزايل
عبدالعزيز مكون المستحيلات * ياما قهر بالسيف من كان عايل
ليث يدش فجوج غاب مخيفات * كم حاكم من سطوته راح شايل
عوجا إليا ردوا لنصب الرهيفات * صارت على ذولاك عوج سحايل
السيف يشهد والقلم والسجلات * هذا الصحيح اللي ذكرته صمايل
العز لأهل العز ساس وعادات * ينسخ بسطرات الورق بالسجايل
الله جعل للناس طرق فضيلات * طرق تناني عاشقين الفضائل
درب المعزة للنفوس العزيزات * ما تقبله نفس تروم الهزايل