عمو حولان زعيم الأمة
صباح الخير بالليل يا أولاد . أنا جامعكم إنهاردة علشان فيه سر خطير ولازم أخبيه عنكم . الملك فاروق زودها معانا . والبطيخ سعره أرتفع في السوق مع إن إن الملك كان دايما يقول : لا مساس بأسعار البطيخ رحمة بمنزوعي الدخل وخلاها خل على الآخر بسبب إننا مش لاقيين نجيب بطيخ للأطفال المبتسرين . ولازم نقوم بثورة زي ثورة سنة واحد وعشرين . وها نسمي نفسنا ( الضباط الأبرار ) زي الزعيم ( جمال عبد القادر ) واللواء ( محمد نبيل ) وطبعاً زي ما انتم عارفين أن الملك عايش فى قصر التين في القليوبية علشان كدة إحنا أول خطوة ها نعملها علشان يستسلم بسرعة هي إننا نحاصر بيت الواد سعيد الميكانيكي في الفيوم علشان أنا ليا عنده تلاتة جنيه ومش عايز يرجعهم ليا .. وأهم أسلحتنا ها تكون قنابل الجلوكوز لزوم حرق بيت الواد سعيد . وبالونات غاز السيلكون لزوم طيارات التحالف .
أولا : طريقة عمل قنابل الجلوكوز
( المقادير )
نصف كيلو كهرباء ناشفة
نصف لتر مياه مبلولة بشرط تكون جافة
متر ونصف سكر جلوكوز
3 ملي متر فلفل أسود
نصف ليمونة مطلقة
( طريقة الإعداد )
ضعي مقدار الكهرباء الناشفة في إناء خشب علشان ما تتكهربيش وضعيه على نار هادئة لمدة 3 ساعات و12 دقيقة وواحد ونصف ثانية و15340 فمتو . وبعدها تضيفي المياه المبلولة على ثلاث مرات وكل مرة تشهقي علشان القنبلة تطلع حلوة . أما السكر الجلوكوز إرميه في صفيحة الزبالة علشان ما يفتكرش أن هو سبب نجاح الوصفة . والفلفل الأسود نرميه هو كمان على السكر في الصفيحة علشان ينكد عليه عيشته . أما عن نصف الليمونة المطلقة فلها وضع خاص .. الأول : ها تخيريها وتقولي لها هترجعي لزوجك ولا أعصرك ؟ إذا وافقت على الرجوع أتركيها في حالها و( كفى المرعوبين شر النسوان ) أما لو ما وافقتش إضربيها على دماغ أمها بالعصارة اللى جايبها الواد فرغلي بتاع دكان الكاوتش وبكدة تكون ( جنت على نفسها مجانص ) . ثم أتركي الخليط على النار وأذهبي ونامي براحتك أو أتفرجي على المسلسل الطويل الأهبل . بس ما تنسيش تقلبيه المقادير على النار بانتظام كل 3 ثواني علشان ما يلزقش في غطاء الإناء .
( طريقة الإستخدام )
تقدم باردة للمتظاهرين في ( ميدان التحليل ) وبالهنا والشفا للملك وأعوانه وما تنسيش تكتبي على كل قنبلة ( صنع رجليا وحياة عينيا )
----------------------------------------
أما عن بالونات غاز السيلكون فهذه لحماية الثورة من طائرات التحالف وزي ما أنتم عارفين أن دول أوربا الحشرية والولايات المتحدة الإشتراكية دايما يزنقوا مناخيرهم في كل حاجة تحصل في المنطقة وطبعا أنتم عارفين السبب .. وهو إنهم عايزين يسيطروا على السكر الجلوكوز والفلفل الأسود اللي في صفيحة الزبالة . علشان كدة إحنا ها نجهز ليهم بالونات السيلكون ودي هتكون المفاجأة الكبيرة .
( المقادير )
- عدد من البالونات .. وده يباع عند خالتي أم أحمد بتاعة الطرشي أو في محلات الجزارة والكيلو بـ 5 جنيه حسب التسعيرة .
- 13 رطل غاز السيلكون بس بشرط يكون طازج ولونه أخضر مخطط بالطول .
- الواد رجب التخين اللي شغال في مطعم ( هاو هاو .. ناو ناو ) بتاع الكباب اللي شعاره ( بلدنا أمانة .. ولازم نخلصه من الكلاب والقطط ) وبالنسبة للواد رجب التخين يتم تأجيره بالساعة وحسب أولوية الحجز .
- إبرة خياطة وخيط لونه مربعات أبيض في أسود .
( طريقة الإعداد )
- تضحكي على الواد رجب التخين وتقولي ليه إنك عازماه على الأكل وده طبعا بعد متدفعي حق الإيجار . ونظرًا لأنه واد دنيء وطفس مش ها يكدب خبر .. تكوني مجهزة غاز السيلكون وحطاه في طبق الغسيل الكبير وتقدميه ليه .. وطبعاً هو ما بيصدق . عملاً البمبدأ الصيني ( أبو بلاش ألهطه وما تستناش )
- بعد ما يخلص على اللي في الطبق كله . تحضري الخيط والأبرة وتخيطي فم الواد رجب وتتركيه من غير ماء ولا طعام لمدة ثلاثة أيام لنترك فرصة للغاز يتفاعل مع ( قلويات ) المعدة .
- بعد الثلاثة أيام نفك الخيط اللي على فمه . ونرقد الواد رجب على ظهره ونحضر البالونات ونحطهم بالونة بعد الأخرى على فمه . ونضغط على بطنه .. نفس نظرية ( ماكينة الآيس كريم ) .
( طريقة الإستخدام )
طبعاً أو ما نقوم بالثورة طيارات التحالف ها تيجي جري . هنكون مطيرين البالونات في الهواء وزي ما انتم إتعلمتم في في المدرسة إن غاز السيلكون أخف من الهواء .. علشان كده البالونات هتكون مشعلقة في الهواء . وكل طيارة هتدخل المجال البحري طبعاً ها تصطدم بالبالونة . والبالونة هتفرقع في الطيارة وطبعا السيليكون سيقوم بتكبير جناحي الطائرة في خلال دقائق وبالطبع الطيارة وزنها ها يزيد وتقع في الأرض والباقي أنتوا عارفينه ... وإكرام الضيف الطرقعة بالشبشب على قفاه ... مع الاعتذار للأسطى أوباما .... معلش إحنا بنتكلم .
أيها الأخوة المواطنون .. أضبطوا الساعات لأننا ها نتجمع كلنا عند مطعم الواد زكي المعفن الساعة ( 11 ) الفجر لنبدأ ثورتنا المباركة الزرقاء .
الله أكبر .. الله أكبر .. الله أكبر
يسقط الملك وتحيا جمهورية اليابان الوحدوية
موضوع: عمو حولان زعيم الأمة 
27/10/2011, 23:00
