البنت دى
شعر : محمد عبد القوى حسن
===================
دى بنت دى
والا الاحاسيس كثفوها
طلعت فى هيئتها ؟
دى بنت مين؟
اصل القمر
بيموت ليلاتنى وينتحر
على درب طلعتها
بنت اكتمال الزين .. والا
والا النبيذ معقود
على صفو ضحكتها ؟؟
***
يامين يراودك ياعسل
وانت اللى من اجود طبيعى
على شهد رقتها
يامين يراضى النخيل والسحر
اللى يهفهف سلام وعلام
وكلام ماهوش مفهوم ولا معلوم
ف عطفتها
كلام يتحس بالنبض بس
او يترش فوق خدود الورد
او ماحد
ماحد قالوا فى تاريخ الكون
لحد
غير الحلوه دى
ياما احلى نسمتها
ياما اندى رقتها
ياما ابهى طلعتها
***
ياما قالولى ف الكتب
وقريت عن الاساطير
ياماااااااااااااااااا
فى احلام المنى
فى بساتين رياض الجنان
حلمت ياما كتير
مع الحظ السعيد الجميل
انى ماشفت بنت
زى هذى البنت
لاف حلم او حتى علم
صلوا ف روضتها
***
او قيموا اعراسكم
هناك كلها
على شط ندهتها
اعراس
اعراس كتير ياما جميله
بتتمنى تاخد
م البنت دى
من عينها كحلتها
م الشفه بسمتها
او حتى ضحكتها
ندهتها
اعراس كتير
يتزينوا
ويضيع جمالهم هباءا
على ورد دخلتها
اقمار كتير يتغندروا
ويضيع دلالهم
على ضى نظرتها
البنت دى
تشبهش حد
ولا ليها ند
انى اعيذها يارب الجمال والكمال
من كل حاسد حسد
من كل كيد
واصطفيها للرضا والانسجام
واخاف عليها
من النسيم اللى يهفهف بالسلام
واغار عليها
من عيون
كل البناويت اللئام
ومن اللى يمشى ف دربها
من كل عين نظرت لها
من نفسى
ساعة ماتهيم
فى حسنها
يابختها
بنت النسيم والضحى
بنت الندى والرضا
بنت الوداد والدلال
لما الكمال
يطلع يغنى
فى ضم خطوتها
وعازفين مزامير التمنى
يتمايلوا لرقتها
المنشدين صفين
والمكللين صفين
والواصفين سحرها
صفين
والمغرمين ضيها
صفين
والعاشقين وردها
صفين
والمطربين
الرسامين
الفنانين
والراقصين
والممثلين
والمبدعين
ياما كتير
بيميلوا ف غنوتها
***
تسمع الكروان
تقول الله
تسمع نغم اوتار الكون
ف الصفو والملكوت
تقول الله
تسمع لصوت البنت دى
فتهيم ف حضرتها
والنطق منك يضيع
والشوف يتوه ف الربيع
بنت ام قلب وديع
انقى من صفاء الملايكه
واصفى من العسل الطبيعى
من مناحل السندسات
بساتين
ومن مناهل الورد تين
فدادين
ومن اشجار عصارى الكناريا
وبحار ليالى الجنان
ملايين
من عندليب الامان
من شهد رقتها
يامااااااااااااااااااااا
هويت ياجميل
يامااااااااااااااااااااا
عبرت شطوط
خطيت حدود ورسيت
مراسى شطوط
وقطعت اميال كتير
من عمر كله غنى
علشان تنول المنى
توصل لسكتها
***
واول ماتوصل
ياسعيد الحظ
يامتهنى
وتحط عينك
بس
فوق شطوط التمنى
على طلع مانجتها
فتدووووووووووووووخ
ياعينى من السحر
وتضيييييييييع
من بين الشجر
وتحس انه
فيه مطر بيرخ
فوقه زهر
ويغنى جنبك قمر
تحلم
بطول العمر
وتموت فداءا
ياسليل المجد
بين عيدان الورد
بين الفل
وانت تموت بتطل
على غنا الفراشات
ورقص اجمل الحوريات
اللى بينشدوا شعرهم
فى موكب الامنيات
موكب خروج البنت دى
الطالعه تمر تهل
بعيونها الجميلات
على ورد جنينتها
البنت دى
والا
الاحاسيس كلها
كثفوها
طلعت فى هيئتها
؟؟؟؟؟
موضوع: البنت دى 
5/6/2015, 23:09
