الدكتور
.............
جوزى يادكتور مرضان
باين هايمـوت ويسلم
مع أنـى رغايه فى البيت
فـى كلامه هو بـيتلعثم
ياوليه اتلمـى وسـبيـنى
ده لسانك كرباج و يسمم !!
ياعزيزى أحكيلى متاعبك
من طقـطق لعليكوا نسلم
أرتاح شكـلك تعـبان
من أية خلـص واتكـلم
مع أنه بايـن على وشك
أنـك فهمـان . مُــتِعلمْ
مش فاهـم حاجه يادكتور
راح تشفـينى والا هاترسم
كلاويا صارت توجعـنى
ومش قادر أبلـع وأتكلم
ورجولى مش قادرة تشيلتى
والديسك تاعبنى وباتألـم
وفى صدرى بحس بنهجان
وانا طالع للبيت ع السلم
تعبـان .! والحيـل مهدود
ومش قادر أفضفض وأتكلم !!
اكتبلـى وصفه تروقـنى
وفرحـنى وخليـنى أتبسم
أخدت كتـير من البراشيم
خلتنـى نايـم ومبـلم
أنا حالـتى النفسيه هـباب
واتمـنى أخـرج وأتنـسم
انا جيتـك وسمعـت عليك
ووقعـت فى عرضك متعشم
خلينـى أقلـع قدامـك
أنا لابس هـدمه ومتحشم
شوف بطنى وصـوابعى وارمه
وقالولـى ممنوع من السمسم
مع أنـى ولا مـرة رأيتـه
وبالشامبو على طول أتـحمم
يكنـشى ده من أثر الشامـبو
مكتـوب مخـلوط بالسمسم
بس ازاى أبو رامى شاريه
وأم محـمد وأبـو هيـثم
أحتـرت يادكتور نورنـى
دنا قيمـة والشكل منمنم
ما ترد ياعـم على كلامى
وفسرلى حالتـى ولا تعمم ؟
عايز أقولك أيه ياحبيـبى
مفهـوم من غير ما أتكلم
مكتـوب ع الباب دكتور
وانت ماشاء الله مُتـكلم
دخلتـوا عليا وانا زهـقان
هي تلـت وأنـت مصمم
سبتك ترغى وانا سـرحان
فـى روايـه لازم تتـسلم
أيوه صحيح مكتوب دكتور
ومش لازم أشرح و أفهـم
ياعزيزى . أنا بتاع روايات
وقصـايد والناس تتكـلم
سيبنى فى حالى الله يخليك
مطحون مش فاضى أعَلم
أنزل تحت دورى دوريـين
فيه دكتور على سنجه وقيم
يلهـف منك القرشـين
وحق عيالك ياسلام سلم
أنت ياعمى سليـم ومعاف
زى التـور لكن متـوهم
انت علاجك جوه دماغك
أنسـى الهـم ولا تتـأزم
وصــفى بالك م الافكار
لو راح تـولع أو تدمـدم
وحط مراتك جوه بطاطك
وأجرى لبيتك ولا تتـألم
دى الدنيا اتخلقت بمشيئـته
وكل شئ موجود متـقسم
واخـد حقك ع الطبـطاب
صحـه ومال ! ليه تتـوسم
فأرضـى بحـالك كله زوال
وتبقى الاخره ! وفيها تتـنعم
..........
ك س ف 5/12/2011
موضوع: ...... دكتور الورق 
8/12/2011, 09:25
