مصر التى اعرفها احبها فى السر وانتقدها فى العلن اخاف ان تعرف اننى احبها لهذه الدرجة من العشق فأخسرها فربما تكون غير مستعدة لعلاقة حب جديدة بينها وبين واحد من اهلها لا سيما وان كل علاقت الحب التى دخلت فيها تركت فى جسدها وتاريخها اثارا وندوبا وجروحا لا يبدو انها ستندمل يوما ومع ذلك تبتسم مصر ولا تظهر المها مهما حدث تبدو ...مرفوعة الرأس مصلوبة الظهر امام الجميع رغم انها تعانى من (الاتب) تقف شامخة وهى تخبئ عكازها بحيث لا يراه احد مهما شعروا بوجوده.
مصر هى الصبح بدرى اذان الفجر ومحاولات الاستيقاظ وتحدى الشيطان والتسبيح بصوت هامس وانت نازل على السلم خوفا من (العاووو) الذى لا تؤمن بوجوده ولكنك تخاف منه .
مصر الناس اللى بتنزل من بيوتها بعد قرأن السادسة والنصف لتقف على اقرب عربيه فول وتضرب الفول بالزيت الحار.الفول مسمار البطن ووجبة الفقير والغنى التى اتفق عليها الجميع فى مصر "وحط شوية صحينة زيادة" "طب هات لمونة" "فين المخلل" رغيف صابح يابنى" "المية فين ياعم" "الحمد لله" "حسابك كام ياحج".
مصر الولد الصغير البرئ الذى ينااام فووووووق اعلى قمة البرسيم اللى تعب فى رصه على العربية الكارو فى الفجرية النوم على البرسيم فى الصباحات الجميلة احلى من النوم على ريش نعام والهواء الذى لم يلوث بعد والسماء الصافية لدرجة انك تحس وكأنك سترى الله لو دققت النظر.تولد الشمس شيئا فشيئا والولد يفتح عنيه ويدعو بكل شىء وبالرزق الوفير والستر وطولة العمر ودوام الصحة والزوجة الصالحة وكل شىء لا يمل من الدعاء به مهما تأخرت الاجابة.
مصر طفل المدرسة الذى تتشاجر معه امه لايقاظة ثم تتشاجر معه ليأكل السندوتشات ثم تتشاجر معه ليشرب اللبن فيتشاجر معاه لان "البقسماط" خلص وهو بيحب ياكله مع اللبن ولا يقتنع الا بعد ان تصالحة امه ببسكويت نواعم لتوصية قبل ان ينزل الوصايا المائة للام المصرية والتى تبدأ ب (اوعى حد يقولك تعالى اوديك لبابا وماما وتروح معاه) ولا تنتهى ب (ماتخليش حد يشرب من زمزميتك) بل تمتد الى (خد بالك من نفسك) وتنتهى مؤقتا ب "لا اله الا الله" فيرد الابن وهو يبتسم ابتسامته البريئة التى تختصر الكون "محمد رسول الله"
مصر البنت العسولة ام ضحكة تجنن اول ضفيرة اول بوسة على خد بابا وماما او توكة بتشتريها وفرحة هدوم العيد فركة عنيها فى الميه ساعة الحموم تسريحة شعرها الطويل (القصة) الطوبة اللى بترميها وهى بتحجل وتعلب (الاولى) مساعدتها لامها وهى بتغسل المواعين مسكها للمشابك وامها بتنشر الغسيل وواقفتها قدام المراية وهى تلعب بعلبة الماكياج ملاعبة القطة والطبطبة عليها رغم تحذير الام من الامراض حضنها للكراريس وهى رايحة الدرس ابتسامتها بعد اول معاكسه وخوفها وارتجافها من اول كلمة بحبك حلمها بفارس الاحلام وبأن تعمل مضيفة طيران وتلف الدنيا بحثا عنه.
مصر الولد الشقى الصفعة على وجه بابا وماما على سبيل الهزار الجرى وافلات ايد من يمسكها والتنطيط على السلم وكسر زجاج الشباك بشوطة كورة قوية.الشبطة فى البوزو والشيبسى وشيكولانة جيرسى وعصير المانجو ابو شفاطة التأخير فى المدرسة والمريلة المبقعة اللعب فى الشارع.معاكسة البنات.صيادين السمك والسبعاوية ومصر وسوريا وقفاشة الملك وتيرو وشد الكوبس ..... كهرربااااااااا وتريك تراك واول يوم صيام فى رمضان وفرحة صلاة الجمعة وعذاب الثانوية العامة و"ماتقراش وانت نايم"و"ماتقربش من التليفزيون عشان عنيك"و"ذاكر وحل عشان تجيب مجموع".ربكة مكتب التنسيق والكلية اللى ماتبحبهاش مع انك بتدمع وان متخرج منها .
مصر الارتباط وبحبك واول بوسة وجنينة الاورمان وكوبرى قصر النيل و"اشترى الورده دى منى يارب تتجوزها " "خدى منى دى ربنا يخليهالك " مصر القايمة والعفش والاتفاق و"هاخدها بشنطة هدومها" واحنا بنشترى راجل" و"احنا نجهزهالك وندويها لغاية البيت" هتكتب مؤخر كام بقا ؟؟!!!!
مصر طابور المدرسة وتحية العلم وبلادى بلادى و"مصر يااول نور شق ضلام الليل" اللى احنا حولنها ل"بيتنا يا اول بيت دخله حرامى بالليل".
مصر رحلة جنينة الحيوانات وحديقة الازهر وجنينة الاسماك ومتحف الشمع والكبريتاج وبانوراما اكتوبر .
مصر السياحة والفسح وركوب الحنطور و"كرباج ورا يااسطى" وبمب العيد.
مصر الكورة الحدوتة المجنونة "اخيرا جووووووووون" والجون مغازل واللى يخرج من جونة يتكسر وخروقة ياكابتن باصى ياانااااااانى والاهلى حديد ويازمالك يامدرسة و"العب جاتك نيله على اللى قالك العبها " حلم كاس العالم وحسام حسن وحسن شحاتة وابوتريكة وشوقى والحضرى ومتعب يامتعب واوعى يجلك متعب وماتشات الاهلى والزمالك و"بيبو وبشير بيبو وبشير بيبو والجون و جوووووووووووووووووون" والحكام الاجانب وماتش الاهلى والاسماعيلى فى الاسماعيلية والشماريخ و"اللى بيخاف يروح "و "بورسعيد المدينة الباسلة"و"المصرى بيكرهك ياأهلى".
مصر الصحاب والجدعنة "والجرى نص الجدعنة" واحنا جدعان اوووى "والندالة ليها ناس" و"قليل الاصل مايلزمناش" و"قليل البخت يلاقى العضم فى الكرشة او يعضة الكلب فى المولد" اهو قليل بخت .
مصر المعايرة بين الاطفال وهم بيلعبوا "وبطل يا اهبل" "واتقى شر من اقترب من الارض" وانا مش قصير قزعة" وياتخين يابو كرش" و"ياابو اربع عيون " وواحد اتكبس دمه اتحبس...طق مات "وكبسة كبوسة واللى يكبسنى يبقى جاموسة " وبريللا بريللا " وخلاااااااااويص ......ليييييييييسسسسسسسه ".
مصر الزوج والزوجة ناقر ونقير وخناقة "انتى كنتى عند امك النهارده ومسلطاكى عليا" والسؤال الازلى "بتحبنى زى زمااااان ولا لاء " و خناقة الماتش والمسلسل وخناقة الاكل اتأخر ليه والملوخية مش مظبوطة والرز معجن واللبس ماتكواش ليه وفين الشراب وماغسلتيش ليه امبارح بدل الرغى فى التليفون وتعالى ساعدنى علشان تعرف انا بتعب اد ايه وقوم هات كوباية مية لنفسك ياسى السيد وهو انا الجارية اللى اشتريتها" ومصالحة "ماهو انت اللى بتزعقلى ياحبيبى " وبوسة قبل النوم وليلة الخميس القومية والصحيان متأخر يوم الجمعة بحجة انه اجازة.....
مصر الفرحة قدام السونار قبل اول ولادة وقلق العملية والخوف على صحة مراتك و "ولد ولا بنت" ...؟كل اللى يجيبة ربنا كويس " ودموع الفرحة بعد قومتها بالسلامة وارتعاشت ايدك وانت تمسك ابنك او بنتك لاول مرة والمشاعر الحنونة اللى تتولد فيك فجأة والحيرة فى اختيار اسم "الولاد" اللى بعد قليل "العيال" ثم سيكبرو ويبقى "القرود" ومن الدعاء ليهم بالتوفيق للدعاء عليهم "ربنا يخدكم " ...... مصر الضنا غالى "وكلكم ولادى" وبحبكم زى بعض" واتغطى يابنى كويس" "واعسل رجلك قبل ماتنام"
مصر اللمة على الطبلية فى الفطار وطبق الجبنة بالقوطة وعلية "ندعة زيت" و"حبة طحينة" والعيش الطازة ....
مصر المواصلات اللى بنجرى وراها حتى نفاجأ اننا وصلنا من غير ما نركب .....مصر مترو الانفاق وممنوع التدخين "وعدينى وراك لو سمحت" "و مصلحة ياسيد" "ورينى بطاقتك" وغرامة عشرة جنية ...
مصر الشغل الذى تعانى منه ولا تستطيع الاستغناء عنه.رخامة المدير وغلاسة الساعى ...
مصر الجمعيات والاقساط وفاتورة الكهريا والتاكسى اللى مابيقفش وخناقة الحساب وبالراحة فى المطبات معانا واحدة حامل" "ورش المية عداوة" ..!!!
مصر بحرى واسكندرية "ومدد يامرسى ياابو العباس" الاسكندرانية يا اجدع ناس " قلعة قايتباى .جيلاتى (عزة). سندوتشات (جاد) سمك (قدورة) الغدا فى (بلبع) المشى على الكورنيش ضرب الفلوكة والصيد على (اللسان) وركوب الترام ابو دورين .والوقوف على فرشة الرملى فى محظة الرمل لقراءة الجرايد ببلاش ومعرفة جديد الكتب ومتابعة احدث الافلام الاجنبى المضروبة على سيديهات بنص التمن. احمد الابيض والكتاب زيادة خمسه جنيه عن سعره وبعد مايعرفك ممكن يدهولك ببلاش .
مصر الشراقوة "اللى غدو القطر" والمنصورة وجمالها والدمايطة وشطارتهم والمشبك .طنطا والحمص والسيد البدوى ومطعم ام محمد.المحلة ومصانع الغزل والنسيج.والمنوفية والمنايفة اللى بيضرب بيهم المثل ويتألف عليهم النكت رغم ان اتنين منهم رؤساء جمهورية.مصر قبلى والصعايدة الرجالة والدم الحامى والمخ الصعيدى و"ماتقفلش معايا امال"
مصر الاثار والهرم وحضارة 7000 سنة ورمسيس التانى ونفرتيتى وحورس وايزيس واوزيريس وحورمحب وايمحوتب ومينا موحد القطرين والفلاح الفصيح والكاتب المصرى واخناتون اول من دعى للتوحيد... مصر القيمة والسيما؛التاريخ والجغرافيا ...
مصر حر الصيف والدش البارد و"تعالو صيفوا عندنا" ولسعة البرد فى الشتا.طبق العدس من القزاز.كوباية حمص الشام وكتر الليمون على الكورنيش وطبق الكشرى من عند ابو طارق وكتر الدقة رز بلبن من المالكى والقنبلة من عند (الكرنك) وطبق المشكل من(حبايب ام هاشم) والسمين المعتبر من (بحة) بتاع الناصرية والفاكهة فى سوق الاتنين...
مصر حفلة 3 فى سينما اوديون وفسحة سيتى ستارز ونزولة روكسى ووسط البلد وملاهى دريم بارك..
مصر سلاح التلميذ والاضواء وكراسة الاول والتوقعات المرئية ورجل المستحيل وملف المستقبل وماوراء الطبيعة والمكتب رقم 19 والشياطين ال 13
مصر مكتبة (ديوان) ومج النسكافية وصوت فيروز جى من بعيد والشروق وطلعت حرب ومكتبة مدبولى وروايات ميريت وندوة علاء الاسوانى كل خميس وحفلة توقيع فى مكتبة البلد وندوة فى مكتبة حنين وساقية الصاوى وفرقة وسط البلد
مصر قرف ورق التجنيد والبحث عن وظيفة والقعدة على القهوة واهرام الجمعة بأعلاناته المبوبة والدعاء بعدم دخول الجيش او القسم فى محضر تحرى ..
مصر الشرطة فى خدمة الشعب والشعب مضروب على قفاه من الشرطة والبلد دى يابنى بقالها 7000 سنة بتتنهب ولسه فيها خير "وان الله لا يغير مابقوم حتى يغيروا ما بأنفسهم"وكله بتعليمات سيادة الريس"
مصر بالروح بالدم نفديك يافلاااااااااااااان" "وحلاوة بلادى السمرا بلادى " "وبسم الله الله اكبر بسم الله " "وانا م البلد دى انا م البلد دى ...."
مصر واهلها الطيبين و"يارب احج " "وارزقنا بزيارة النبى يارب" واغنينا بالحلال من عندك واسترها علينا دنيا واخرة " "حسبنا الله ونعم الوكيل " وربنا على الظالم والمفترى وابن الحرام " "واستر عليا ربنا يستر عليك "....
مصر اللى انكسر لازم يتصلح وبنات الناس مش لعبة وامشى من هنا ياواد ياخنفس انت وهو .." واللى يلبس انسيال وسلسلة دهب ويمضغ اللبانة يبقى لا مؤاخدة راجل ........!"
مصر غنوة فى الافراح "اتزحلق واجرى يارماااان........ وياللى ع الترعة حود على المالح ..... وشوفت العريس بيقول للعروسة ايه ......وبسم الله الرحمن الرحيم هنبدأ الليله ...."والنقطة دى جيه من عم المنطقة " ونجاملكم فى الافراح وعقبال ولادك يديك طوله العمر وتشيل ولادهم ....
مصر جلال الموت "وعلى الله الناس تتعظ " وياسبعى وياجملى " "ماتسبنيش يامستتنى" وشريط الشيخ عبد الباسط وهو بيقرأ سورة يوسف ..والصوان من فراشة سيد انور "والموت علينا حق " و"البركة فيك يابنى" "وربنا يجعلها اخر الاحزان" وكان وشة بيضحك واحنا بنغسله" وشفت الخشبة كانت بتجرى ازاى" والله كانت ليلته حلوة اوووى ياجدعاان"
مصر التلاوة والمشايخ . الشيخ محمد رفعت ومصطفى اسماعيل ومحمد صديق المنشاوى ومحمود على البنا ومحمود خليل الحصرى وعبد الباسط عبد الصمد وعبد الفتاح الشيعشاعى وشعبان الصياد ومحمد محمود الطبلاوى وراغب مصطفى غلوش ومحمد جبريل فى دعاء ليلة القدر وهو يصلى بالالاف فى مسجد عمرو بن العاص ..
مصر الازهر والحسين والسيدة زينب والسيدة عائشة والسيدة نفيسة واولياء الله الصالحين.
مصر الشعراوى والشيخ الغزالى والشيخ كشك
مصر التى ذكرت فى القراءن .مصر "خير اجناد الارض"
مصر رفاعة الطهطاوى ومحمد على ومحمد كريم واحمد عرابى ومصطفى كامل ومحمد فريد وسعد زغلول
مصر على مصطفى مشرفة واحمد زويل والبرادعى والنشائى ومجدى يعقوب ومصطفى السيد .
مصر احمد شوقى وحافظ ابراهيم وابرهيم ناجى وعبد الحميد جودة السحار .
مصر طه حسين ونجيب محفوظ ويوسف ادريس ويوسف السباعى ومحمد عبد الحليم عبدالله واحسان عبد القدوس.
مصر بهاء طاهر وخيرى شلبى وابراهيم عبد المجيد والمنسى وقنديل والخزنجى ..
مصر امل دنقل ....
مصر بيرم التونسى وصلاح جاهين وفؤاد حداد والابنودى وسيد حجاب واحمد فؤاد نجم وفؤاد قاعود.
مصر رنات الموبايل فى انصاص الليالى والسهر للصبح مصر الحب والحضن الدافى لولدها مصر لمه عيله فى الاحزان قبل الافراح مصر الجدعنه والشهامة والاصل الطيب مصر "عيب ياكابتن انت معندكش اخوات بنات" وده احنا ولاد حته واحدة" مصر اروح العنوان ده ازاى يابنى" مصر الوصفة الغلط والتوهة فى كل سكة " وقل من الندر واوفى " "والجميل ده عمرى ما هنسهولك يابنى"
مصر كده على بعضها مفيش فيها تنقية
مصر باكيدج كامل ومينفش تحب منها حته وتسيب التانية
مصر هى كده ياتخدها على بعضها بحلوها وبمرها ياما تسيبها كلها ..........
موضوع: مصر 
14/10/2010, 14:32
