بحبك يا مصر

موضوع: بحبك يا مصر 18/2/2010, 01:56

على اسم مصر التاريخ يقدر يقول ما شاء

أنا مصر عندي أحب وأجمل الأشياء

باحبها وهي مالكه الأرض شرق وغرب

وباحبها وهي مرميه جريحة حرب

باحبها بعنف وبرقة وعلى استحياء

واكرهها وألعن أبوها بعشق زي الداء

واسيبها واطفش في درب وتبقى هي ف درب

وتلتفت تلقيني جنبها في الكرب

والنبض ينفض عروقي بألف نغمة وضرب

على اسم مصر.

مصر السما الفزدقي وعصافير معدية

والقلة مملية ع الشباك .. مندية

والجد قاعد مربع يقرا في الجرنال

الكاتب المصري ذاته مندمج في مقال

ومصر قدامه اكتر كلمة مقرية

قريتها من قبل ما اكتب اسمي بإيديا

ورسمتها في الخيال على أبدع الأشكال

ونزلت أيام صبايا طفت كل مجال

زي المنادي وفؤادي يرتجف بجلال

على اسم مصر.

شفت الجبرتي بحرافيش الحسين وبولاق

بان البلد ماشي زي النمس في الأسواق

بالفلاحين ع المداخل من بعيد وقريب

بالأرنؤوط بالشراكسة بكل صنف عجيب

مترصصين سور رهيب مزراق في ريح مزراق

كأنهم لا بشـر ولا خلقـة الخـلاق

ومصر فلاحة تزرق بين رقيب ورقيب

من غير أبو الهول ما ينهض ناهضة شايله حليب

والصبح بدري الجبرتي ينام وقلمه يسيب

على اسم مصر.

مصر الرمال العتيقة وصهدها الجبار

والنيل كخرطوم حريقه وحيد في وسط النار

في إيدين بشر نمل رايحه وجاية ع الضفة

فيهم مطافي وفيهم كدابين زفة

وفيهم اللي تعالى وقال أنا حكمدار

وكل باب م البيبان مقفول على اسرار

وكل سر بحريقة عايزة تتطفا

من أهلي تندهلي وتقوللي تعا اتدفا

أنا اللي عمري انكتب إلى يوم ما اتوفى

على اسم مصر.

مصر اللي عمر الجبرتي لم عرف لها عمر

وطلع لقاها مكان مليان عوام وزعر

جعيدية غوغاء يجيبوا تملي وجع الراس

وخليط أفارقه هنادوة روم ملل أجناس

والترك في القلعة والمماليك خدودهم حمر

تكبير الصورة تصغير الصورة

كان عمرها ستلاف سنة .. كلها سنين خضر

بس الزمان يختلف زي اختلاف الناس

ناس تبني مجد وحضارة وناس بلا احساس

وناس تنام لما يزحف موكب الأحداث

على اسم مصر.

النخل في العالي والنيل ماشي طوالي

معكوسة فيه الصـور .. مقلوبة وانا مالي

يا ولاد أنا ف حالي زي النقش في العواميد

زي الهلال اللي فوق مدنة بنوها عبيد

وزي باقي العبيد باجري على عيالي

باجري وخطوي وئيد من تقل أحمالي

محنيه قامتي .. وهامتي كأن فيها حديد

وعينيا رمل العريش فيها وملح رشيد

لكني بافتحها زي اللي اتولدت من جديد

على اسم مصر.

تكبير الصورة تصغير الصورة

مصر .. التلات أحرف الساكنة اللي شاحنة ضجيج

زوم الهوا وطقش موج البحر لما يهيج

وعجيج حوافر خيول بتجر زغروطة

حزمة نغم صعب داخلة مسامعي مقروطة

في مسامي مضغوطه مع دمي لها تعاريج

ترع وقنوات سقت من جسمي كل نسيج

وجميع خيوط النسيج على نبرة مربوطة

اسمعها مهموسة والا اسمعها مشخوطه

شبكة رادار قلبي جوه ضلوعي مضبوطة

على اسم مصر.

قطعوا الأغاني وطارت نشرة الأخبار

دارت على كل دار في الكوكب الدوار

يا حاضرين اعلموا الغايبين بأنه في مصر

اتغير الاسم منذ الآن فأصبح .. مصر

ضحك التاريخ ضحكته المشهور بها واندار

ودخل مناقشة مع الجغرافيا عما صار

هل نعترف بالبيان اللي أذيع العصر

أم ننتظر مصر تطرد اسرائيل بالقسر

وساعتها تحصل بكل جدارة يوم النصر

على اسم مصر.

والمس حجارة الطوابي وادق بكعابي

يرجع لي صوت الصدى يفكرني بعذابي

يا ميت ندامة على أمة بلا جماهير

ثورتها يعملها جيشها ومالها غيره نصير

والشعب يرقص كأنه عجوز متصابي

إنهض من القبر احكي القصة يا عرابي

يطل لي رافع الطهطاوي م التصاوير

شاحب ومجروح في قلبه وجرح قلبه خطير

وعيونه مغرورقين بيصبوا دمع غزير

على اسم مصر.

مالك سلامتك بتبكي ليه يا طهطاوي

قال لك عرابي .. انكسر بسلاح أوروباوي

وسلاح أوروبا ماهواش المدافع بس

ده فكر ناقد مميز للثمين والغث

قلناها ميت ألف مرة ألف مرة بصوت جهير داوي

بس الحماقة لاليها طبيب ولا مداوي

ولا حد م الخلق بالخطر اللي داخل حس

الغفلانين اللي خلوا العقل صابه مس

قالوا الخطر هو فكر أوروبا لو يندس

على اسم مصر.

هل مصر موميا جميلة صورتها فوق النعش

يعشقها مجنون ينادي عليها ولا تطلعش

هل مصر نار صفصفت والنفخ فيها محال

والأرض نشعت على رمادها استحال أوصال

سألت أنا الرافعي كان عجٌز ولا بيسمعش

لكن عينيه كانوا يحكولي قصص ما اشبعش

يقولولي ماتخافش مصر بخير وعال العال

مصر الجبرتي ومصر الرافعي حال غير الحال

انظر محمد فريد أعظم وأرقى مثال

على اسم مصر

القاهرة في اكتئاب والأنس عنها غاب

من عتمة تدخل لعتمة كأنها ف سرداب

أو قرية مرمي عليا ضل هجانة

الحظر م المغربية بأمر مولانا

ومصر في الليل بتولد والبوليس ع الباب

صبية ولاٌدة يابا ولحمها جلاب

طلع الصباح زغرطت في السكة فرحانه

على كتفها مولودتها لسه عريانه

وف لحظة كانت جميع الدنيا دريانة

على اسم مصر.

على كتفها مولودتها وتجري وتنادي

ياولادي من يوم ميلاد الأرض ياولادي

ينهض لها امحتب بدواه يقويها

وبنتاؤر ينشد الاشعار يهنيها

وسعد زغلول يكح يزلزل الوادي

وعرابي يهمس ومصر ترد بتمادي

تقوله آه برضه ثورة جيش وح احميها

بالدم بالروح بكل حياتي ح افديها

اما الأسامي معنديش غير اسمها

على اسم مصر.

محلول مركز من السكر في كباية

وف قلبه خيط يتلضم حباية حبايه

سكر نبات بللورات الماظ بتضوي ضي

وتفضل الألماظات تكبر شوي شوي

لحد ما العقد يبقى في الجمال غايه

ده الحزب في الشعب نضرب به المثل آيه

الصلب والسايل الاثنين سوا ياخي

تنظيم محمد فريد في كل قريه وحيٌ

بللوره بتشع بالثورة اللي يومها جيٌ

على اسم مصر

منقووووووووووووووووووووووووول

تكبير الصورة تصغير الصورة
بحبك يا مصر Wesaal_63719585

موضوع: رد: بحبك يا مصر 18/2/2010, 07:17

أخى الكريم

سلمت يداك من كل مكروه وجزيت كل خير وصرف الله عنك كل شر

@@@@@@@@@@@@@@@@@@@@@@@@

موضوع: رد: بحبك يا مصر 19/2/2010, 23:34

أخي الغالي ووترنا السعيد

ذائقة رفيعة وكلمات رائعة وإعداد مبهر

ومن اغلى من مصرنا لنتغنى به

دمت رائعاً ومبدعاً

موضوع: رد: بحبك يا مصر 20/2/2010, 11:05

من مواطن مصرى يحب مصر

إلى المصرى الأصيل وترنا السعيد

الذى دائما ما يلهب حماسنا وحبنا للوطن

إقبل منى التحية ايها العملاق فى الفن والأدب

وسامحنى للتأخر فى الرد

مع حبى وتقديرى

موضوع: رد: بحبك يا مصر 20/2/2010, 20:36

أستاذى صاحب الوتر الحزين

من أجمل الشدو هو الشدو فى حب الوطن

ومن أجمل أنواع العشق هو عشق الوطن

سعدنا واستمتعنا باختيارك

أستاذى الكريم

سلمت يمناك فيما نقلت

صح لسانك

وبيض الله وجهك

ولا هنت ولا هان قلمك

دمت متألق الحرف والكلم

وفى انتظار المزيد من عزف قلمك

موضوع: رد: بحبك يا مصر 20/2/2010, 23:53

الأستاذ الوتر الحزين تسلم يداك وما نقلت

موضوع: رد: بحبك يا مصر 21/2/2010, 00:14

حب مصر لاتكفيه كل كلام الدنيا لأنها أم الدنيا

أ/ الوتر الحزين

عشت سعيدا

موضوع: رد: بحبك يا مصر 21/2/2010, 01:41

الأستاذ على الدين
لو انتقيت تنتقى بعين الأديب
بارك الله فيك

موضوع: رد: بحبك يا مصر 21/2/2010, 20:37

أستاذنا الوتر الحزين

كلمات شجية وانتقاء جميل بعين الأديب وعين الخبير

بارك الله فيك

وجزاك لله خير

موضوع: رد: بحبك يا مصر 28/2/2010, 11:02

الأستاذ الوتر السعيد

اختيار موفق وقصيدة تفوق الخيال فى التعبير عن حب الوطن

جزيل الشكر استاذى وتقديرى و مرورى وفائق احترامى

» بحبك يا
» انا بحبك؟
» على قد ما كنت بحبك
» { بحبك أكتمل }
» بتقول لى بحبك يا حمار