اديني الحقنة بسرعة ، ارجوك محتاجة الجرعة

النفس الامارة ، ودتني لباب الخمارة ، وانا شارب سيجارة بني ، وحاسس ان راسي بتاكلني .. مش هي الاغنية كده برده

حتي الحشيش والويسكي والخمرة بقينا نغني لهم ، وكأن الموضوع عادي جدا ، بسيط جدا ، وامر طبيعي انك تلاقي في كل شارع وحارة منطقة وعاطفة محل بيبيع سقارة وستيلا ، وترخيص بمحلات خمور ،
وديلرز معروفين لترويج الصنف في كل حتة ، بقي انك تلاقي حشيش اسهل من انك تلاقي باكو بسكوت شمعدان ابو ربع جنيه
وبقي امر طبيعي لما تروح تقعد في اي جنينه عمومية انك تلاقي شباب قاعدين علي جنب بيضربوا سيجارتين
وعلي اي قهوة في اي منطقة عادي انك تلاقي قاعدة معلمين حوالين شيشة محشية
في الطريق في العربية في الهيئات الحكومية والشركات
في الاسانسيرات والحمامات عادي انك تشوف او تشم ريحة السجاير المحشية
عادي وبقي امر طبيعي
والطبيعي انك لو ليك ضابط معرفة وعلاقتك بيه حلوة ( ابن خالتك ولا ابن عمتك ولا ابن اخت مرات عم المدام حتي ) عادي انك تروح له قسم الشرطة وتقوله عندك حشيش وصاية - يمد ايده في جيبه ويطلع لك قرش او وقية كله حسب معزتك عنده والمصالح المتبادلة

ولو دمك خفيف شوية وليك دلال عليه ممكن يخرج يضرب معاك السيجارتين في الحارة اللي ورا القسم .. جنب ابو عمر الديلر المشهور في الحتة

الجديدة بقي اني حالة وفاة في البلد حضرت صلاة الجنازة في الجامع وخارج لقيت شباب قاعدين علي مصطبة كده علي سور الجامع وبيضربوا سجاير بانجو ريحتها ايه .. مكيفة الميت .. ولما سألت الشيخ قالي دول عيال لبط ومحدش عارف يتكلم معاهم .. ( الله علي الجمال ) حتي في الارياف والناس الطيبين راحت ريحة الطين وجت ريحة الكوكايين

وهو ده الحال واللي مش عاجبه يشرب م البحر

او يشرب له نفسين يطروا علي مراوحه

ويوم الخميس كان بكرة .. يبقي التلات كان ايه