جوابات حراجي القط للأبنودي

موضوع: جوابات حراجي القط للأبنودي 15/9/2009, 21:11

جوابات حراجي القط العامل في السد العالي وزوجته فاطنه عبد الغفار في جبلاية الفار

الجوهرة المصونة
والدرة المكنونة
زوجتنا فاطنه أحمد عبد الغفار
يوصل ويسلم ليها
في منزلنا الكاين في جبلاية الفار

أسوان ... الرسالة 1

أما بعد .. لذا كنت هاودت كسوفي ع التأخير
سامحيني يا فطنه في طول الغيبة عليكم
وأنا خجلان .. خجلان .. وأقولك يا زوجتنا أنا خجلان منكم ..
من هنا للصبح ..
شهرين دلوقت ..
من يوم ما عنيكي يا فاطنه .. بلت شباك القطر ..
لسوعتي بدمعك ضهر يديَ
لحضتها قلت لك :
(( قبل ما عوصل عتلاقي جوابي جي ... ))
نهنهتي .. وقلتي لي بعتاب:
(( النبي عارفاك كداب .. نساي
وعتنسى أول ما عتنزل في أسوان .. ))
حسيت واليد بتخطفها يد الجدعان
بالقلب ف جوفي ما عارف ان كان بردان .. دفيان
والبت عزيزة والواد عيد
قناديل في الجوف .. زي ما بتضوي .. بيقيد ..
.......... والقطر إتحرك ..
وقليبي بينتقل من يد لإيد .
والقطر بيصرخ ويدَودِو
اتدلدلت بوسطي من الشباك ..
(خذي بالك م الولد .. راعي عزيزة وعيد )
والقطر صرخ ورمح لكإنه داس على بصة نار ..
ولقطت الحس قريب .. قد ما كنتي بعيد :
(قلبي معاك يا حراجي هناك في أسوان ..)
...........................
ورميت نفسي وسط الجدعان .. وبكيت ..
وبلدنا اللي كنا بنمشيها ف نص نهار
كان القطر في لحظه .. فاتها بمشوار .
سامحيني يا فطنه على التأخير ..
ولو الورقه يا بت الخال تكفي
لأعبي لك بحر النيل والله بكفيِ
وختاماً ليس ختام ..
بابعت لك ِ
ليكي ولناس الجبلايه ولبتي عزيزه والواد عيد
ألف سلام
زوجك ... لوسطى حراجي

الجوهرة المصونه
والدره المكنونه
زوجتنا فاطنه أحمد عبد الغفار
يوصل ويسلم ليها
في منزلنا الكاين في جبلايه الفار

الرساله الثانيه

أسوان
زوجي الغالي
لاوسطى حراجي القط
العامل في السد العالي

جبلاية الفار

الرسالة 2
زوجي حراجي ..
فوصلنا خطابك ..
شمينا فيه ريحة الأحباب .. ربنا ما يوري حد غياب ..
مش أول مره البسطاوي يخطي عتبة الدار ؟؟
عمرنا يا حراجي .. ما جلنا جواب .
النبي ساعة مرزوق البسطاوي .. ما نده ..
كده زي ما كون .. دقت في حشايا النار .
وكإن العمر بيصدق .. بعد ما كان كداب ..
اتأخرت مسافه كبيرة كبيرة علي
عارف فاطنه يا حراجي لاليها عايل .. ولا خي .
ليه تتأخر كده يا حراجي .. ؟
طب والنبي كأن ورقتك دي
أول قنديل بتهز ف جوف الدار .
أول ندعة ضو.
الدار من غيرك يا أيو عزيزه .. هو .
وعزيزه وعيد ..
من غيرك يا حراجي زي اليُتما في العيد .
الواد على صغره حاسس بالغربه والبعد .
ولا عاد حتى بيطلع يلعب في القمَارى مع الولِد .
اطلع وأخش .. أطلع وأخش القاه .. غيمان
وكأنه محروق له دكان .
ويقوللي : (( فين يامه أسوان .. ؟
وأبا سابنا ليه يا مه ؟ ما يمكن زعلان .. ؟ ))
شهرين يا بخيل ؟
ستين شمس وستين ليل ؟
النبي يا حراجيما أطول قلبك
لاقطع بسناني الحته القاسيه فيه
..........................
كل الجبلايه تسلم فرداً فرد ..
م الحاج ((( طِلب حامد )) لعيلة بيت (( علي سعيد ))
وانشالله يا حراجي ما يوريني فيك يوم
وانشالله تكون تعلمت ترد قوام .
ومادام احنا راسيين ع العنوان
والله ما حنبطل بعتان..
مفهوم..أسوان
زوجي الغالي
لاوسطى حراجي القط ..
العامل في السد العالي

زوجتك
فاطنه أحمد عبد الغقار
جبلايه الفار

أسوان
الرساله 3

الجوهره المصونه
والدره المكنونه
زوجتنا فاطنه أحمد عبد الغفار
يوصل ويسلم ليها
في منزلنا الكاين في جبلاية الفار

أما بعد ..

فهذا تاني خطاب ..
باعتين طيه ما قدرنا المولى عليه ..
وعنبعتلك في ظرف الجمعه .. طرد
الطرحه والجزمه بتوعك ..
وكساوي عزيزه وعيد .
دورت الحسبه ف راسي وقلت يا واد يا حراجي ..
هو يعني قانون العيل ما يدوقشي الكسوه ..
غير في العيد ؟
أمال كيف العيل حيحس أبوه جنبه
إذا كان الأب .. بعيد .. ؟
بقى أول ما دلقنا يا فاطنه بابور السد على محطة إسوان
أنا والجدعان
حسيت بالدوخه
مش أول مره باسيب جبلاية الفار .. ؟
رحنا المكتب
طبعنا البطاقات ..
ومضينا على الورقات
أه يا (( فطاني )) لو شوفتي الرجاله هْنِهْ
قولي .. ميات .. أولوفات ..
بحر من ولاد الناس ..
إللي من (( درجا )) واللي م (( البتانون ))
واللي من (( أصفون)) و (( التل))
جدعان .. زي عيدان الزان .. سايبن الأهل .
وتطلي في عين الواحد يا ولداه ع الغربه ..
عارفه يا مرتي الراجل في الغربه يشبه إيه .. ؟
عود دره وحداني .. في غيط كمون ..
حسيت بالخوف ناشع في عروقي زي البرد .
قضينا الليله الأولانيه في أي مكان .
العين مشقوقه..
والبال ..
زي الغله اللي بتسرسب من يد الكيال
وندهت عليكي قلت : انا بنده
سامعاني ؟
سامعيني يا عيال ؟
النبي لولا الخوف واللومه من الرجاله ..
لاركبت القطر وعدت
قبل ما أروح لموظف
قبل ما أرد سؤال.
وقعدت أعقل نفسي وأقول : يا حراجي يا بوي
أمال جيت ليه ؟
الخايف من الغربهة ما يجيش
اتحمل علشان كسوة عيد .. ورغيف العيش
لكإنك ياخي رحت (( الديش ))
من خوفي يا مرتي
قعدت أهدي الرجاله .
فاطنه ..
أول ما تفكي الخمسه جنيه
اطلعي ع الفور ..
وإدي حساب (( عمران )) وجنيه (( بمبة الصباغ ))
والباقي زيحوا بيه القارب
لما يعدلها الرحمن
سلمى ع الوِلد .. وع (( الحاج التايب ))
بلا كتر كلام ..
سلمي على كل اللي لينا فيهم نايب ..
وإوعي يا فطنه لما ارجع وأبص ف وش اللولاد ..
أعرف إن أبوهم كان غايب .
وإحنا هنا بنستنى الجوابات بفروغ صبر
طول ما الجوابات رايحه وجايه .
اعتبري كإني باجي أشوفك..
واجى .

زوجك لاوسطى حراجي

الرساله الرابعه

أسوان
زوجي الغالي
لاوسطى حرجاي القط
العامل في السد العالي

جبلاية الفار
الرسالة 4

وصلنا الطرد وجانا المبلغ يا حراجي ..
أحياك الرب وأبقاك ألفين عام ..
ولا عاد يقطعلك عاده ولا حس..
ولا يقفل لك كف ..
ولا يطوي من قدامك سجادة الخير والسعاده ..
اما بعد ..
فإحنا وزعنا المبلغ زي ما قلت..
ولعلك ما تشغلش بالك فينا وتبقى في راحة بال ..
إحنا يا حراجي – بعيد الشر- إن ضاقت بينا الحال يكفينا ريال
كفايه علينا البسطاوي الظهر يخطي عتبة الدار
غمبارح .. جانا (( الشيخ قرشي )) .. وخبط ع الباب ..
جه ساعة المغرب
قاللي لا بدن ما نبص لعيد ..
قاللي : (( يا بت المرحوم .. الواد لازمه الكتاب .. يو السوق ..
إتدلي هاتي له قلمين بوص .. ودواية .. ولوح )) ..
وضحك .. بعدين قاللي : (( لاحسن يطلع لوح ))
وأنا بيني وبينك يا حراجي عاوزاه يكبر
ويعوضنا عن الأهل ويعمل لنا قيمه ..
عاوزاه تكون قيمته ف جبلاية الفار قيمة القيمه ..
اللي بتقوله عن أسوان يا بوعيد ..
حكايه ولا حكايات أبو زيد ..
هيا يعني .. مش زي بلدنا .. ؟
أمال ناسها بيسووا إيه .. ؟
ما بيشتغلوش ليه ؟
وإنت .. طول عمرك راجل صاحب فاس
فهمهاني دي
لاحسن عامله في راسي زي الخبطه ..
كيف صاحب الفاس يصبح أوسطى .. ؟
صاحبك (( تكروني )) لما أتى بالطرد ..
شيعنا معاه الموجود ..
...............................................
في الليل يا حراجي تهف عليا ما عرف كيف ..
هففان القهوه .. على صاحب الكيف ..
وبامد إيديا في الظلمه ألقاك جنبي ..
طب والنبي صُح ومش باكدب يا حراجي .
وباحس معاك إن الدنيا لذيذه .
كيف حال (( عبد العال التابه )) و (( على اب عباس ))؟ ..
وقوللي يا حراجي ..
بتاكل كيف . ؟ وبتلبس إيه ؟ وبتقلع إيه ؟
بتنام فين ؟
قاعد في المطرح مع مين ؟
مين اللي بيغسلك توبك
وبتتسبح فين .. ؟
...............................................
في نهاية القول ..
أنا رح أشيع عيد ع الكتاب ..
فا إبعت له ووصيه على شد الحيل ..
وجميع الناس في الجبلايه
عايزين لك كل سعاده وخير ..
وبيتمنولك تاني ترجع في السلامه ..
تعمر مصطبتك ..
وتقيد اللنضه في الدار ..

زوجتك
فاطنه أحمد عبد الغفار
جبلاية الفار

الرساله الخامسه

الجوهره المصونه
والدرر المكنونه
زوجتنا فاطنه أحمد عبد الغفار
يوصل ويسلم ليها
في منزلنا الكاين في جبلاية الفار

أسوان
الرساله 5

مشتاق ليكي شوق الأرض لبل الريق ..
شوق الزعلان .. للنسمه .. لما الصدر يضيق
مشتاق .. وإمبارح ..
قاعد .. قدامي عِرق حديد.. وف يدي الفحار ..
غابت عن عيني الحته اللي أنا فيها..
وغابوا الأنفار
تحت النفق .
الضلمه يا فاطنه
بتساعد على سحب الفكر ..
تلاقيكي ولا عارفه الأنفاق.
ولقيت نفسي يا فاطنه طيره مهاجره
والطيره جناحها محتار
ولقيت نفسي على بوابة جبلاية الفار ..
باخد الأحباب بالحضن
كانس كل دروب الجبلايه بديل توبي
طاوي كفوفي وباخبط بيهم على صدر الدار
قلتلي لي مين ؟
مسيت الدمعه ف حزنك بإيدي..
مسيت الدمعه اللي ف حزنك ..
ماعرف خدتك في حضاني ولا إنتي خدتيني ف حضنك
وعزيزه وعيد حواليا بيشدوا الجلابيه
ويشموا ف غيبتي وفي إيديا..
وقعدت بيناتكم .. وبكيت .. وضحكت
لما لمحت عصايتي وتوبي .. وفاسي .. ومداسي
يمكن ساعه .. وقف اللمهندس على راسي ..
ولمس كتفاتي بصابعه .. قمت لفوق ..
طبطب على كتفي ..
وخدني من يدي بره النفقات في النور ..
ضيعنا نص نهار ..
وسألني .. قلت الشوق
قاللي إسمع يا حراجي أقولك ..
ويا فاطنه قعد يحكي ويتكلم ..
ألقط كلمه وميه تروح ..
وكلام .. م اللي يرد الروح ..
وحكى لي عن أسوان والسد ..
وحكى لي عن اللفرنج وعن حرب المينا..
في الجوابات الجايه يا فاطنه عاقولك وإحكي لك ..
اما عن نفسي .. فأنا لا بخيل ولا شي ..
كيف اللي ف قلبي بس يا ناس .. أرويه في جواب .. ؟
أما عن عيد ..
فأنا من بدري يا فاطنه قلت يروح الكتاب ..
وأقل ما فيها ..
عيفُك الخط ويحفظ له كام سوره
والأمر ده بس يا فاطنه يعوز شوره .. ؟
على خيرة الله ..
ووصلنا فطيرك ..
قعمزت ما بين الرجاله وكلناه ..
يعني أنا دقته .. ؟
والنبي بعنيا قعدت أتفرج ع الرجال بياكلوه
كنا طالعين م الشغل نشر عرق ..
بت يا فاطنه ..
النبي في الدنيا .. ما فيه واحده بتسوى فطيره زيك ..
شفت ده في عنين الرجاله ..
سلاماتي لكل اللي يقولك شحوال حراجي
وسلامي لعزيزه وعيد ..
أمانه عليكي لحين ماجي ..

زوجك
لوسطى حراجي

الرساله 6
أسوان
زوجي الغالي
لاوسطى حراجي القط
العامل في
السد العالي

أما بعد ..
فنعرفكم .. إحنا بخير ..
ولا يلزمنا إلا رؤية وجه الغايبين ..
(( مرزوق البسطاوي )) .. مرته وضعت .. حدفت ولدين
وجوابك وصل الجبلايةإمبارح ..
لكن مرزوق .. ما سرحشي غير اليوم ..
وما دمتو في صحه وعال ..
إحنا ما يلزمناش .. أكتر من ورقه في ظرف ..
ناس الجبلايه كبيراً وصغيراً عاوزين رؤياك .
قوللي يا حراجي بحق ..
عامل كيف بس ف ليل الفرقه .. ؟
واللهي ما خش دماغي حاجه من اللي كاتبه في الورقه ..
ويا خوفي عليك ..
بيقولوا فيه ناس .. ماتوا في اللي إسمه السد ..
طمنا عليك يا حراجي .
.........................................
قسمنا مع بيت العطار .. بلح النخله الشرك ..
إذا كان لازمك منه يا حراجي .. إبعت قول ..
مش راح تاجي .. ؟
طالقالك في البيت فروج ..
علشان لما تعود م الأسوان دي .. تلاقي لك حتة لحم ..
وإم (( علي أب عباس )) مشغوله عليه ..
بدري ما راسلهاش ليه ؟
أهي طول اليوم .. قاعده على العتبيه إيد على خد ..
وماسكه عود قش بتبكي وتخطط في تراب الدرب ..
طمنا عليه يا حراجي يرضيك المولى ..
وإذا كان عال وف خير ..
الضحك مع الجدعان .. ولا رساله لامه المشغوله أولى .. ؟
قلب الأم أصابه الشوق يا بوعيد ..
يبقى أسخن من رمال القياله لما يقيد
يبقى عش خراب بيسرخ على طيره ..
وعلى أب عباس عارف أمه ..
مالهاش في الدنيا غيره ..
وإمبارح كانت وسط الحريمات ..
قاعده تمسح دمعتها .. ف طرحتها وتقول :
اللي مانعني من الموت ..
اليوم اللي أشوف (( علي )) فيه متهني وفاتح بيت ..
يومها أقول للدنيا ضحكت عليكي
خلاص غوري ..
........................................
قولله يشيع يا حراجي .. الناس زعلانه ..
كل الجبلاية واخده في خاطرها منه ..
وإمه عنيها كستها الدخانه ..
أختك (( نظله )) رجعت بيت الحاج ركابي إمبارح من (( درجا ))
قالت جايه تريح عند خالاتها وحتولد في اللي يهل ..
يا حراجي .. جوابك بيرد الميه للزور الناشف ويبل .
ده إحنا عايشين هنا ع السيره ..
وزادنا الأخبار ..

زوجتك
فاطنه أحمد عبد الغفار
جبلاية الفار

الرساله السابعه

الجوهره المصونه
والدره المكنونه
زوجتنا فاطنه احمد عبد الغفار
يوصل ويسلم ليها
فى منزلنا الكاين
فى جبلايه الفار

قولى يا فاطنه للى بنقوللـُه وللى مبنقللـّوش..
الدنيا مش عيش بس ولا قروش.
ولا غيطان وفروش..
قولى يا فاطنه للـكل..
ان احنا كنا هبل.. وضيعنا العمر فاشوش.
حتقولى عليا اتجننت ولا عييت
ويا ريتنى مارحت الداهيه اللى اسمها اسوان..
ولا كنت طلعت من البيت.
لا يا فاطنه اللى بيقول الكلام ده ..
هوه حراجى اياه..
بس اللى قلب راسى يا فاطنه مش سهل ..
طب وحياة ولادى ساعات اصحى فى الليل..
عينى تتمط يا فاطنه وارقبكم بين النجم..
واعرف ان احنا مكـناش أهل .
طب كيف أهل يا فاطنه ..
وحياة اولادى يا بت الخال حاتجن .
قال أهل .. (( ونبيهه بت المنزوع ))
مره اتشاكلت قدامى مع ام الملوى .. وانفتح الموضوع.
وتقوللها يا حزينه
يا للى أبوكى مات م الجوع .
والدنيا يا فاطنه فى البر التانى ..
قالبه الدنيا .
ما هو ده اللى مغرفتلى كيانى ..
ومدوِّر لى راحة راسى ومخلينى زى ما كون واحد تانى.
(( نبيهه المنزوع )) فى البر التانى من الدنيا..
لبست بادله يا فاطنه سامعانى؟ لبست بدله .
و ِنزْلت وسط المـكن المتخـبِّـل تربط وتحل .
إحنا يا فاطنه فين م الدنيا.. ؟
فين مخ الدنيا الجبار ..
ما عرفشي كيف جبلاية الفار .. ؟
ليه أم على اب عباس ملحوده حداكى فى الدرب . .
وقاعده تخطط فى ترابه وتعدِّد . ؟
ياهل الدنيا . . ام على اب عباس بتعدد وبتبـكى . .
لإن على قاعد وسطينا .
طب تاجى تبص فى وشه
والنبى بقى زى اللى بيسوقوا مراكب شحن ف بحر المينا
يا ناس .
ينعل أم عباس واللى جاب ام على اب عباس .
ده الراجل من كتر اللى شافه بقـى شعره ا ُبْـيض .
وقال .. يكتب جوابات .. ؟
خليها هيه ف حالها وسط الحريمات .
دلوقت يا فاطنه .. مش قرشينها بيجوها .. ؟
خلاص .
دلوقت على اب عباس سُـكـَـرى ؟. . حشاش ؟
م الصنف اللى بيغوى النسوان . ؟
ده حتى بطل دلوقتى كرسى الدخان .
وحكاية الشوق الزايد ع الحد ده .. ممنوع .
سيبك من غربة جوزك واستنبهى للموضوع
ده انتى يا فاطنه نبيهه .
وان عيد اتعلـّم بكره ..
وقرا حكايتى فى الجرانين . .
يبقى عنـِدك علم .
طب والنبى من جهة الهدّه .. هدّه ..
لـكن راس الواحد زى ما كان بتلفّ ف حلم .
أما حكاية كيف صاحب الفاس يصبح أوسطى . .
مبسوط انا ع اللى عامله ف راسك زى الخبطه .
يبقى برضه رجايا منصان ..
وضرورى ماشيه يا فاطنه فى سكة فِهْـم .
لفى العياييل فى الليل م البرد . .
ويقدّرنى على ما تخش الشتويه أنـِّقى لى حرام صوف .
شدى حيلك مع نفسك وولادك إعملى معروف . .
واما يعدّلها المولى حناجى .

زوجك
لوسطى حراجى

الجواب الثامن:

أسوان
زوجي الغالي
لاوسطى حراجي القط
العامل في السد العالي

اما عن ان احنا بنتشوقلك فاحنا بنتشوقلك والشوق فى قلوبنا ناسف نسفان
ولا يمنعناش من شوقنا ليكم حتى قطع الخطابات
هى اللى حبلت بالواد تقدر برضه جوزها يغيب ولا ولدها ومتتشوقش
ده يبقى قليبها اسود من قلب جزازة الكحل
يا سلام والله يا حراجى يا سلام
ليه غايب ليك يوم ولا6 ايام
ده احنا دخلنا فى رابع شهر
والايام تقلانه عليا يا ابو عيد
وحكاية الشوق دى لا فى الايد ولا ليها مواعيد
وماله طب لما انتوا تشتغلوا هناك
واحنا هنا نشتاق؟
احنا عاجينا شوقنا ليكم احسن م الانفاق..
طب مش عارفاها وادينى قلت.
يعنى معرفتى ليها هتزودنى دراع؟
وكلامك فى ام على اب عباس صعب
لكن لما قالوا امبارح ان البسطاوى فى الدرب طلعت اجرى
قولت حراجى بعتلى جواب وطلع من على
قلت يا ما انت كريم يا رب
بصيت لك فى السر ولولوت ودانك
ودعيتلك ام على اب عباس قالت دلوقتى لولا حراجى كان هيرد يا ناس
وقعد مرزوق يقرالها ودمعيتها تخر تكلمها النسوان تضحك
لكن تقعد تبكى وتقول مالكم بيا بس يا خلق سيبونى فرحانةوماله
لما ابكى يعنى الفرحة دى بتاجى يوماتى سيبونى ابكى
اهى دمعة تطفى قلبى المحروج
وانت بعتلى جواب تمنعنى عن الشوق اتغير قولك يا حراجى
اتغير صوح وحديتك بقى زى حديت الراديو زى كلام الاساتيذ
طب اقولك قول وما تقتعش الورقة بسن الريشة وانت بتشتمنى
والنبى نفسى اشوف اسوان اشوف المكنة والمواسير والانفاق واقول متغفلكهاش نفسى اشوف صحبك المهاندس دى
متهيالى كمان يمكن وشك دلوقتى اتغير يمكن صوتك بردو
يمكن شبت
عيد راح الكتاب واهو ماشى زى القطر
وعزيزة امبارح سخنت لكن قايمه الصبح مليحة يمكن هتحصب
خلصوا القراشات
دلوقتى اختك ناظلة هتولد بكرة ولا بعد يومين مش بردو
هنديها قرشين وشوية قمح وسمن
دى ناظلة يا حراجى خيرها علينا
بتوج النار فى الجوف يا ابو عيد
وما غير الا جوابك بس اللى فى مقدارتة انه يهدينا ويبرد فينا النار

زوجتك فاطمة احمد عبد الغفار
جبلاية الفار

الجواب التاسع

الجوهرة المصونة
والدره المكنونه
زوجتنا فاطنه أحمد عبد الغفار
يوصل ويسلم ليها
في منزلنا الكاين في جبلايه الفار

زوجتى ام ولادى وتوبى ولحم رقبتى
فاطمة احمد عبد الغفار زوجتى واختى سترى وغطايا
والكتف اللى تملى شيلنى وشايلتى
فاطنة يا لنضة ليلى ومسطبتى وباب بيتى وعيلتى
فاطمة يا ست الناس والله ما طيعنا يا فاطمة غير الفاس وتارينى عرفت الهم يا فاطمة فى يوم ما عرفت الفاس
ادعى على ابويا ولا على جبلاية الفار ولا ادعى على اللى علمنى اغوى كلمة انفار فى الجبلاية يا فاطمة الواحد يغوى الكلمة دى
من غير ما يحس ما يعرف فين غويهالوا وفى اى مكان
زى تمام شرب الدخان
انفار انفار
ونعاود اخر الليل زى الحيطة المايلة على الدار مالين الدرب غبار
وهزار اتارى طلت العمر الواحد فينا يا فاطمة
ماشى المشوار بالمنظار
نفرح بالعشرين قرش
ويوم السوق نتباها برطل اللحم نفوت بيه قدام الناس
شايفة يا فاطنة يقطع ده اليوم الطين اللى تعلمنا فاس
كان يبقى صوح الفاس لو لينا ارض اهو بس فى دى يبقى الفاس فاس لكن مخيبها شغلة يا فاطمة ان كانت فى اراضى الناس
هتقولى عليا اتغريت ولا اتغيرت ابدا وحياة النعمة يا فاطمة
وهحكيلك طبعا احنا قاعدنا كتير ساكتين قبل ما يخدونا الشغل
ووصلنا هناك كان يوم اربع
طبعا اسوان دى جبل هى صوح يا فاطمة فيها سريات وضروب اسفلت
لكن ده فى الشقة التانية
اسوان بتاعتنا يا فاطمة جبل
اتسلمنا لواحد رايس تخنان وبكرش اسمة الحج بخيت
شوف احنا بدرنا كيف لكن بردو ما روحناش فى الاول
وقعدنا نعبى بالفاس والزمبير حجارة صغيرة الواحد
قد المليم ونحولها فى ترومبيل معرفش بيروح فين بس ترومبيل عالى
يمكن عالى قد القطر طب عارفة يقدر واحد من دول على ظهرة يشيل
ميت نخلة
وفى يوم نقانى الحج بخيت انا وتلاتة معايا عشان
نزرع دلاميت اهى دى الشغلة اللى تخوف وتموت صوح
اصعب ما يكون فى اسوان هى حكاية الدلاميت دى
صوابع طولانة كدة ننكتها فى الاجبال ونقيد السلك يا فاطمة
ورمح بيفرقع نجرى ونتكفه صدقى لما يقولوا قدامك
شوفنا خلق بتتوفى وقعدت اقول
ليه يا حراجى بيشيلوا ويعافروا فى الجبل المعافر ده
يكونوش ناوين على الزرع يا جدعان وطب دى حتت زرع
يعنى ضايقة الدنيا معاهم مش لاقين غير الارض الطوب
هى الناس دى يا ولاد بتفكر بالمقلوب وبقينا اخر الليل
افرش على حتة فى الشغل واقعد اتكلم واتحددت انا والملوى وعلى ابو عباس هو صوح الدلاميت اسهل من شيلت الفاس
لكن بيولعوا فى الجبل العالى ده ليه ما لقينا جواب
اصل اللى معانا يا فاطمة مش من اهل اسوان علشان يقولولنا
مهو جاين زينا من ميت جبلاية فار مهو كانوا هناك زينا
بيشتغلوا انفار يا خربيت اللى يضيع عمرنا هوف
وطلعنا وشيب راسنا فى حكاية الانفار
اتعلمنا من الصغر يا فاطمة ان مفيش فى الدنيا الا شغلانة الانفار
طب عمرك سمعانا بالدلاميت
صوباعين لما يطرشقوا تحت البيت عيجيبوا عليه فى واطية
وانا حتة كنت هقرب كيف من الدلاميت لولا ما اختارنى يا فاطمة الحج بخيت ان كان على اسمة اهو كل الناس بتقول دلاميت دلاميت اصل هو اسمة حلو دلاميت

لكن فى واحد قرب وشه فى شافه
ده حتى فى شغالة فى الدلاميت ويانا بيحطوا الصوباعين ويفروا
من غير ما يحققوا فيه ولا يعرفوا دة اللى فى العلبة و بيفرقع لما يحطوه كونته ايه
لكن جوزك صدق ما لقيه
عرفونى اوام وغويت الشغلة يا فاطمة
تفكرنى بايام العوم مش فاكرة اتعلمت العوم قبل بقيت الولد
بقى ده يقولى يا حراجى وده يقولى يا حراجى اهو من تحت الشغلة دى هى اتعلمت الاخير فى الجوابات كنت انام واصحى افكر واحلم فى الدلاميت لا عيال ولا مره ولا بيت
وعلى ابو عباس ما رديش قالى سيبنى فى الفحت اللى عارفة احسن من اللى متعرفهوش قالى سيبنى فى الكحت شغلانة عاريفها وعارفانى وارتحت ماالى تجينى خابطة وامى ورايا خلينى قاعد عايش لما تقضى يومينها قولتله يعنى انا اللى ماليش ناس يا على قالى لا بس انت معافر والدلاميت اعمى وكاثر
وهقولك ايه ولا ايه قولنا حديث ما يقض يا فاطمة وانا لولا عارفك جادعة وعارفانى عافى ابعاتلك لاه انا عارف القصة تخض سلمى على عيد وقوليلة الرب يقرب فى المواعيد ده نهار لقياكم هو الفرح يا فاطمة وهو العيد
زوجك الاسطى حراجى

الجواب العاشر

أسوان
زوجي الغالي
لاوسطى حراجي القط
العامل في السد العالي

اما بعد
قالى قولى لابويا كمان جوابين واكون
اتعلمت اقرا الورقة وافك الخط
قالى طول ما البسطاوى بيقرا الجوابات
سرنا مكشوف واللى جوانا يااما يكون معروف
رديت على الواد عيد يا حراجى
قولتله ما تخافش ولو انى معاه فى القول
قولتله ابوك بيقول انقولى وقولى للناس
بيقولى انقل وقولى للى بنقوله واللى ما بنقولوش
هو ابوك بيقول مشتاق اتمد معاكى فوق الفرش
ده بيتكلم على الفاس والناس
ولو انه لو قال لكن ادى القسمة بلاانا
براجل يهوى الشمس اكتر من سهر الليل
كمل يا حراجى قول
والله طول حسك ما بيطلع من الورقة
وانا زى ما يكون شايفه الاسوان بالعين
والنبى يبقى انت صوح بقيت اسطى
بيقولوا قال لابس اقول ايه بس
والنبى مكسوفه يا زوجى قلعت التوب قال
بيقولوا بقيت مهندس يا حراجى
وبيقولوا انك مستوظف صوح
كمل يا حراجى حكاية الشغل
بس اوعى بردوا تنسى تقولى
ساكن فى المطرح مع مين?
وبتاكل ايه?
وبتلبس ايه?
وبتقلع فين?
مع انى خابرة انك والله ما ح تريد
عزيزة دلوقتى بتنطق بتقول امبوه
فى عيل يقول امبوه قبل ما ينده على ابوه
اه هى البت عزيزه
ما انت غايب عنها
فى المغرب روحت قعدت فى عتبة بيت طلب الحداد
هتقول اتباهت ابدا والله يا حراجى
ما هما اللى فتحوا السيرة عاد
واقول الحق انا صدقت لقيت ناس تفتحلى السيره
وحكيت للحريمات كل اللى قولته فى الجوابات
اعملك ايه ما انت بتكتبلى كلام
يكسر صندوق القلب ويطلع وحده
وفى فى الجبلايه حريم خايفه يا حراجى ما تبعت رجالها
عاشة بن عفون قالت فى ناس بتموت
قالوا الجبل بيتهز ويتطوطح ويوقع على الولد
وقالوا سعات الولد يدق فى توب هالكبريت
اقول الحق انا فى الاول قلبى اتمرجح واتهزيت
لكن اتفكرت كلامك ع الدلاميت
وفتحت القول قولت وحكيت النبى يا احمد
فاطمة كانت زى قنايا مطلوقة
لا هما قاموا يسدونى ولا انا اتسديت
واما رجعت البيت حسيت انى حراجى حسيت انى زيك
واجعص منك ايه يعنى لما الواحد يزرع وردة يا حراجى
والناس ما تشوفهاش ولا تتنشقهاش
انتوا زرعتوا الوردة واحنا نشممها للناس
مش لازم نعمل حاجة زيكوا
ابعت يا حراجى وقول احكيلى حكايه الانفار
ملعون خاش اللى يكتب ورقة لمرتة يا راجل
ويدكنله فيها شويه اسرار

زوجتك
فاطمة احمد عبد الغفار

» الميدان(للأبنودي)
» سمكة القط الخطرة
» القط الذي لا يحب المطر
» القط الأكثر قوة ملاحظة في العالم
» تربية القط الشيرازى من الألف إلى الياء