قصيدة : الحب مات للشاعر عاطف الجندى

قصيدة : الحب مات للشاعر عاطف الجندى

لما دقيت ع البيبانْ

اترسم فرح ف وشوشنا

قلنا أهلاً

والله بانْ

بعد غيبه وبعد وحْشه

فين يا راجل كنت غايبْ

وانا وانتَ

اتنين حبايب

يللا إدخل

جوه حضنى

دفِّى صدرى ودفِّى عمرى

خلى دم عروقى يجرى

بالأمانْ

جات معاك الفرحه لابسه

توب خشوعْ

والزينات ماليه الشوارعْ

فى المدن أو فى النجوعْ

والله جوعنا لذكرياتكْ

شيخ بطل

كل الحروب اللى ف يمينكْ

لابسه فرحة الانتصارْ

والله "بدر" ف عز تِمُّهْ

جايب القرآن وقدرك

ألف شهر

من الشهور اللى ف قدرنا

***

الولاد لما رأوكْ

علقوا الفرحه ف عينيهم

لبسوا أجمل

ما ف ضميرهم

فى اليمين سبحه بتضحك

فى الشمال

ماسكين فانوسْ

***

وآنا لسَّه كنت باحبى

قالوا عنَّك 00

دا كريمْ

بيقابلنا

بقلب صافى

يطرح السلامات ، يعافى ع الجميعْ

وف عينيه الرحمه باينه

جاى يسلسل فى المواجع 00

بدِّل الأحزان 00 ربيعْ

***

بسِّ فيه حاجه هاقولها

تحزِّنك 00

وتقول لى ليه

شفت حالنا يا ابن عمى

جرى له أيه؟!

اللى يأكل حق أخوه

واللى يقتل أمه

ويحلِّى بأبوه

واللى يتمسِّك بدينه

فى الزمان دا

نقول 00 خدوه !

والمصيبه ف كل حتَّه من عالمنا

فى الحروب بيسلسلوه

بُص شرقك

بُص غربك

فين شمالك أو جنوبكْ

كله بيقول 00 اقتلوه

اللى يذكر اسم أحمد

اللى قال الرب واحد

مِشْ يهوذا00

ارجموه

كل حته فيها أقصى

وجرح نازف بينادى لنا

نطهروه

***

إحنا خلق كتير ولكن

ضاع إيماننا بالقضيه

ضعفنا خلانا تورته

وكل واحد

مد إيده

خد له حته م الصينيه

فين يا خالد

سيفك المسلول 00 وحَشْنا

قوم يا عمرو

وخد بإيدك بندقيه

أبوبكر يلّبِى صوتك

والفاروق

واولاد أميَّه

حالنا محتاج الصحابه

يأدبوا كلاب البريه

يمسحوا الدمعه اللى باتت

فى عيون الضاد

سبيه

دمعة الأقصى اللى عاشت

تحت ضرب المدفعيه

***

زى غابه صار عالمنا

والقوى هو اللى يكسب

واللى يفرض كلمته

والكون ده يصبح عزبته

واحنا العبيد

يأمر يطاع

أما الجياع

ما يسووا حاجه

ف ذمته

***

ماعلشّى فتَّحت المواجعْ

يا ابن عمى

يااللى همَّك نفس همِّى

بشتكى لك

وانت عارف

إن حبك

لسَّه جوه ضلوعى ساكن

رغم كمِّ المشكلات

والشِّويه اللى تجيهم

يبقوا أجمل ذكريات

ضيف خفيف

بالحب ماشى

يصحِّى فينا كتير حاجات

السلام يا صاحبى وأوعى

تنسى تيجى

بعدك انتَ الحب مات !

بعدك انتَ

الحب مات !

***

القاهرة فى 30 / 1 / 2000

الشاعر عاطف الجندى من الشعراء الكبار الذين يتميزون بدماثة الخلق والإلهام المنقطع النظير ويطوع الكلمات لتصير موسيقى شعرية عذبة

شكرا ياعم محمد يس ,,,,, هداياك كترت

حماده سكر زياده كتب:: الشاعر عاطف الجندى من الشعراء الكبار الذين يتميزون بدماثة الخلق والإلهام المنقطع النظير ويطوع الكلمات لتصير موسيقى شعرية عذبة

شكرا ياعم محمد يس ,,,,, هداياك كترت

الكابتن حماده

قصيدة : الحب مات للشاعر عاطف الجندى Rdd3fp8

» قصيدة قصيدة القدس للشاعر عبد الرحمن الأبنودى
» قصيدة دمعة الحب
» قصيدة جحا - للشاعر هشام الجخ
» قصيدة الحلم للشاعر محمد أسامة البهائي
» قصيدة ( المداوية ) للشاعر أبو الخير بدر