كلنا عمال اولاد عمال _ للشاعر محمد عبد القوى حسن

كلنا عمال اولاد عمال
شعر : محمد عبد القوى حسن
-------------------------
كلنا عمال فى الترحيله
كلنا شايلينك يااصيله
لو مره تقلتى ما جضينا
ولا عمرك هنتى ف عنينا
ولامره صغرتى يااميره
وكلنا بناكلها بعرقنا
والارض تحسنا تعرفنا
ترحم اقدامنا فى تقييله
كلنا شلناها بكلتها
وحمدنا الله على فجلتها
لاسهرنا ف ديسكو ولا ف ريسكو
ولابعنا الغاليه ف شدتها
كلنا عمال اولاد عمال
نرضع م الارض نشيل احمال
نحفظ ف العرض ونبنى المجد
ف عز الحر وعز البرد
ابدا مابنشكى ولابنبكى
ونشق الصعب ف عز اهوال
كلنا عمال اولاد عمال
وبنينا السد حفرنا قنال
هدينا الخط بكل نضال
نضرب بالجوع ونصد دروع
لاعرفنا دموع ولا قلنا محال
كلنا عمال اولاد عمال
عمر التكييف مادخل بيتنا
ولادخل الضانى ف حلتنا
ولامره ملينا معدتنا
بكباب كداب ..
ولا لينا انياب
كلنا عمال اولاد عمال
غير الجلاب يوم دخلتنا
زى اللبلاب فوق عشتنا
نسرح وندارى عورتنا
نربط احجار فوق سرتنا
ودايما راضين بقسمتنا
فارشين تحتينا هدمتنا
وايدينا هى مخدتنا
كلنا عمال اولاد عمال
ولامره نكل ف وحدتنا
ولامره نمل ف عزلتنا
وانتم فارضين الجدارات
عازلينا عنكوا يابهوات
واكلين السمنه بزبدتها
وشاربين الشربه بدهنتها
وماليين الكرش بخزينتها
وانتم بصراحه رمتها
انتم بصراحه عفانتها
واحنا العمال اولاد عمال
واحنا اللى مامره طبلنا
ولامره رقصنا وزمرنا
وانتم بهوات واولاد بشوات
كلنا عمال اولاد عمال
نعرق احنا بين المجرات
نعزق نزرع طول السنوات
وانتوا الحاصدين القمحات
وانتوا الشاربين اللبنات
واحنا ندور بين زبالتها
من بين اكوامها ف ناصيتها
على بعض بواقى لقمتها
بناكلها فتات من بين حصوات
ولا مره شكينا غربتها
كلنا عمال اولاد عمال
جانا الاصلاح وفرحنا به
راح الاصلاح وقفل بابه
رجعت الاسوار تكبر تانى
والبوابات تعلى عشانى
وافوت تانى من جنب السور
لكن مابيدى طبق بنور
ولا ماشى اغنى للحور
انا فايت مهزوم ف كيانى
وايديا فاضيه لخلانى
مكسور الخاطر مهزوم
قامت ثورات عدت ثورات
زادوا البشوات اعداد واعداد
ورضينا بتنى الروس تانى
لكن التنى ماكفاشى
الصفوه العاليه ماقابلاشى
غيرشى بالوحل ياامباشى
ونزلنا الوحل برغبتنا
وشربنا بمحض ارادتنا
غسلين قطران والعدل ميزان
بيطب ف ناحية واكلينا
والكفه تجيص ناحيتنا
والكفه تفيص فوق بيتنا
وان مره اتعدلت لحوال
واتعلم ولدى بنضال
وجاب الدرجات عال العال
وفرحوا الاعمام والاخوال
وقالوا خلاص ماشى الحال
والواد هايعوض كل مافات
ويعدل حال الاخوات
يقولولوا لا انت محال
تقعد على كرسى الابرار
كرسى الاخيار اولاد اخيار
كرسى الشرفاء الاطهار
علشان لمؤاخذه دامش عيبك
داعيب الوالد ابوك طبعا
الواطى الدون الزبال !!!
كلنا عمال اولاد عمال

» الحوريه : للشاعر محمد عبد القوى حسن
» بتشوق / للشاعر محمد عبد القوى حسن
» التشكيل بالصوره فى قصيده الحوريه للشاعر محمد عبد القوى حسن
» فيديو - أغنية غية حمام للشاعر محمد ربيع ألحان محمد سامي
» مناقشة ديوان أسئلة ما بتنتهيش للشاعر محمد ربيع محمد بدار وعد