سالي علي : اللي معهوش ميلزموش

سالي علي: اللي معهوش ميلزموش



اللي معهوش ميلزموش ده بقي هو النظام الجديد اللي بدأ التعليم الحكومي في بلدنا مصر يمشي عليه اليومين دول، المفروض أن التعليم هو أساس بناء أي دولة، مش حاجه ثانوية فيها، وطبعا بما ان المسئولين عندنا بقي ده اخر حاجه ممكن يفكروا فيها، فكان لازم يبقي نص الشعب امي.
زمان كانوا بينادوا بمجانية التعليم لأن التعليم زي الماء والهواء اللي هما طبعا من غير فلوس وأي حد ممكن يقدر يحصل عليهم بسهولة جدا، وأهالينا زمان اتعلموا كويس يمكن عشان الزمن كان غير الزمن كان فيه حاجات لسه نضيفة زي الهواء طبعا اللي بقي ملوث دلوقتي ويجيب الامراض للناس والماية زمان كانت غير دلوقتي خالص علي الأقل كان زمان الناس مش بتعاني من الفشل الكلوي ذي دلوقتي.
وطبعا بما أن التعليم زي الماء والهواء فكان لازم هو كمان يتلوث "يعني هي جت عليه"، وطبعا في ظل انتشار الفساد فكر المسئولين العظام بتوع دولتنا في جعل التعليم الحكومي هو كمان بزنس "محدش احسن من حد بقي"، وطلعوا بفكرة جهنمية، قالك بالنسبة للمتفوقين بقي اللي هيدخلوا كليات القمة طبعا بعد مطلع عين أهاليهم في انهم يوصلوهم لكده.
قالوا احنا بقي هنفاضل بين المتفوقين وبعضهم إزاي بقي، راحوا عملوا في كليات القمة زي الهندسة والصيدلة قسم ممتاز، وقالوا ده هيبقي بفلوس واللي ميقدرش يدفع بقي يدخل العادي، سبحان الله يعني أنا ابقي جايبة نفس المجموع وداخلة نفس الكلية والاقي حد زي بالظبط هو ممتاز وأنا لا طب ليه بقي، فراح المسئولين ردوا علي السؤال العويص ده وقالولك "أومال إحنا هنصرف علي الكلية منين يعني"، لازم نعمل كده عشان نقدر ندخل فلوس للكلية نصرف بيها عليهم وعليك، سبحان الله اومال ميزانية الدولة طيب بتعمل ايه بقي، "وبلاش بقي نتكلم في السياسة خلينا ماشين جنب الحيط"!!.
الفكرة بقي في نفسية الطلبة لما الاقي حد زي ويمكن انا جايبة مجموع اكتر منه وهو قاعد في محاضرة فيها 30 واحد وانا في مدرج فيه 500 طالب، هو عنده تكيف وانا لا، هو عنده دكاترة مستواهم اعلي من اللي عندي، طب هنستني ازاي الناس ديه تبني البلد بقي، لما هما اصلا وقع عليهم ظلم من قبل ميطلعوا للدنيا بس هنقول ايه مهو ده حالك يابلد وهي ديه مصر ياعبلة اللي معهوش ميلزموش..