حوار مع المواطن المصرى المطحون

حوار مع مواطن مطحون

المذيعة: مساء الخير عزيزى المواطن.. تحب حضرتك تشترك معانا فى البرنامج؟

المواطن: على حسب الاشتراك بكام؟

آه ده شكله عسل وهيتعبنا.. يا فندم أنا قصدى تشترك معانا برأيك.

والله يافندم أنا لو كان عندى رأى أحب أحتفظ بيه لنفسى.

■ حضرتك مكبر الموضوع ليه.. ده برنامج إذاعى بنحتفل فيه بذكرى الثورة.

ـ يا فرج الله.. هى الثورة قامت أخيراً؟.. والله ماحد قال لى.

لا حول الله يارب.. عزيزى المواطن إحنا بنتكلم عن ثورة يوليو بتاعة الزعيم جمال عبدالناصر.

ـ أيوه عارفه.. جمال عبدالناصر مبارك.. شاب أمير وربنا هينصره علينا إن شاء الله.

■ لا مش هينفع كده خالص.. شوفوا لنا مواطن تانى والنبى.. عشان اليوم المجيد ده يعدى.

المعد: باقولك إيه يا هانم.. ده المواطن المتاح دلوقتى.. مشى حالك بيه لحد ما نلاقى غيره.

ـ
يا فندم حضرتك متعصبة ليه.. أنا باهزر معاكى.. حد ما يعرفش ثورة يوليو.. مش
دى اللى ثورة أطلقها جمال.. وإحنا حفرنا القنال وبعدين حررناه وبنفكر
نبيعه دلوقتى.. أنا راكب معاكى فى البرنامج.. اتفضلى.

■ الصبر من عندك يا رب.. حضرتك ممكن نبتدى نسجل بس أستسمحك الإجابة تبقى على قد السؤال.

ـ والنبى البرنامج ده هيبقى عسل.. إنتى بس شوطى وربنا هيكرمنا.

■ المذيعة:
أعزائى المشاهدين كل عام وأنتم بخير.. فى هذا اليوم المجيد نزلنا إلى شارع
الثورة لننقل فرحة المواطنين بهذا اليوم التاريخى الذى غير وجه مصر..
التقينا بأحد المواطنين وسألناه عن رأيه فى مبادئ ثورة يوليو؟

ـ هى ثورة يوليو عندها مبادئ. والله ماكنت أعرف.

■ أيوه يا فندم ثورة يوليو عندها ست مبادئ.

ـ يا عينى.. ده الواحد مننا بيبقى عنده مبدأ بيطلع عينه فى الزمن ده وهى عندها ستة.. الله يكون فى عونها.

■ إيه اللى حصل للناس بس يا رب. يا سيد يا محترم مبادئ يعنى أهداف.

ـ والله.. يعنى الثورة عندها ست أهداف زى الأهلى كده.. وجابتهم فى مين؟

■ ماهو ده السؤال يا فندم؟ فى رأيك كابن من أبناء مصر بعد مرور ٥٨ عاماً على الثورة ما الذى تحقق من أهداف ثورة يوليو؟

ـ إنتى مش بتقولى إنها جابت ست أهداف خلاص.

■ يا بنى آدم إفهم الثورات غير الماتشات.. الثورة بتيجى بأهداف وبعد كده بتحققها. فهمت؟
ـ
أيوه فهمت.. يعنى فى الماتش بنلعب عشان نحط الهدف.. فى الثورة بنحط الهدف
وبعد كده بنلعب فيه.. والنبى ماتتنرفزى يا ست هانم.. أصل أنا والله أول مرة
أسمع حكاية أهداف الثورة دى.. حضرتك قولى لى الهدف وأنا أعلق لك عليه بعون
الله.

■ معقول برضه.. بص يا سيدى أول هدف من أهداف الثورة القضاء على الاستعمار وأعوانه، إيه رأى حضرتك فى هذا الهدف؟

ـ أرجوكى اعذرينى أنا ما احبش أجيب سيرة الاستعمار.

■ ليه إن شاء الله؟

ـ عشان أعوانه هيزعلوا.. وزعلهم أوحش من زعل الاستعمار ذات نفسه.

■ إنت غريب قوى على فكرة.. بلاش الاستعمار.. عندك مثلا من أهم أهداف الثورة كان القضاء على الاحتكار وسيطرة رأس المال على الحكم.

ـ من فضلك أنا وافقت أسجل على أساس إن ده برنامج تاريخى.. ومش هتجيبوا سيرة أحمد باشا عز وحديد عز.. أنا عندى عيال وعايز أعالجهم.

■ إيه علاقة أحمد باشا عز وحديده بالموضوع يا أخينا.

ـ
مش بتقولى احتكار.. عايزه تخلينى أقول الكلام اللى بيقولوه عليه بتوع
المعارضة إنه محتكر الحديد عشان هو صاحب جمال مبارك وأمين تنظيم الحزب
الوطنى.. بصى بقى أنا شاكك فيكو بصراحة.. انتو من قناة إيه.. معاكو
كارنيهات.

■ ييه ده هيقلب دماغنا.. بلاش يا سيدى الهدف ده.. خلينا فى هدف غيره.. عندك مثلا هدف القضاء على الإقطاع.

ـ حضرتك بتتكلمى عن الثورة الفرنساوية ولا ثورة يوليو.. ممكن تورينى كده الورقة اللى بتقرى منها.

■ من فضلك ممكن تعلق على الهدف وانت ساكت.

ـ إزاى يعنى.. أعلق وأنا ساكت إزاى؟

■ قصدى تتكلم فى صلب الموضوع.

ـ
ما هو معلهش يا ست هانم.. إنتى عماله تقولى لى قضاء على الإقطاع وتحقيق
العدالة الاجتماعية بين طبقات الشعب.. إنتى مش عايشه معانا فى البلد.. أنا
حاسس إنك بتتبلى على ثورة يوليو وبتلزّقى لها أهداف من وراها.. أصل يعنى لو
ثورة يوليو كانت بتهدف للكلام ده ماكانتش هتقعد ٥٥ سنة من غير ما تحققه.

■ طب خلاص
خلاص أنا هاختار لك هدف تانى وقول تعليقك بأدب لو سمحت.. وبلاش ألفاظ
تلزّقى وتتبلِّى والكلام ده.. تهدف ثورة يوليو إلى إقامة حياة دستورية
وديمقراطية سليمة.. حضرتك بتضحك ليه؟

ـ
أصلى افتكرت إنها سليمة سليمة.. فاكره لما الكافر فى فيلم فجر الإسلام قال
شلت يدى وبعدين ضحك عليهم وقال إنها سليمة سليمة.. آه ياكفرة.. إنها سليمة
قال.

■ طيب
نكتفى بهذا القدر مع المواطن الكريم لكى نتيح الفرصة لعشرات المواطنين
الذين يتسابقون خلف الكاميرا على إبداء رأيهم فى أهداف ثورة يوليو. كفاية
كده أنا مش مكملة مع الراجل ده.. أبقى ست مش كويسة ويا رب أتنقل القناة
التامنة لو كملت معاه.

ـ المعد: طيب خلاص هدى نفسك يا هانم.. هنمشيه.. بس إنتى إهدى والنبى.

■ إيه ده.. مش ممكن.. ده لسه واقف هنا.. إنت يا أخينا ما تتوكل على الله وتمشى من هنا.. ما خلصنا التسجيل.. إنت واقف هنا ليه؟

ـ مستنى إعادة «الأهداف».

</blockquote>

ههههههه خطيره جدا والله يا قمر
أحلي موضوع قريته في المرح من فترة لأنه مضحك ومؤلم جدا يعني ضحكة بس فيها ألم
الفقرة دي ليا تعليق عليها

اقتباس :: ثورة يوليو كانت بتهدف للكلام ده ماكانتش هتقعد ٥٥ سنة من غير ما تحققه.

طبعا العيب مش في الثورة العيب في القائمين علي تحقيق أهدافها يعني المسلمين دلوقت متخلفين علميا واقتصاديا يبقي العيب في الإسلام ولا العيب في المسلمين نفيس الأمر من رأيي
بس بجد موضوع ساسي مضحك جداااااااااااااااااااااا
شكرا يا قمر

أختنا وأستاذتنا رانيا

موضوع يبدوا في ظاهره مرح

ولكن في باطنه يحمل الكثير من الدهاء السياسي

ضحكت فيه من قلبي

شكرا لك ولأطروحاتك القيمة

أم البنات كتب:

ههههههه خطيره جدا والله يا قمر
أحلي موضوع قريته في المرح من فترة لأنه مضحك ومؤلم جدا يعني ضحكة بس فيها ألم
الفقرة دي ليا تعليق عليها

اقتباس :: ثورة يوليو كانت بتهدف للكلام ده ماكانتش هتقعد ٥٥ سنة من غير ما تحققه.

طبعا العيب مش في الثورة العيب في القائمين علي تحقيق أهدافها يعني المسلمين دلوقت متخلفين علميا واقتصاديا يبقي العيب في الإسلام ولا العيب في المسلمين نفيس الأمر من رأيي
بس بجد موضوع ساسي مضحك جداااااااااااااااااااااا
شكرا يا قمر

وبجد احلى مرور مرورك يا قمر
وانا بصراح كنت قاصدة انزل الموضوع دهةفي التوقيت ده
عشان بجد نص الشعب غلبان ومش فاهم هو فيه ايه بالظبط
على راي واحد صاحبنا قتلوووووه
ثورة ثورة

أكرم عبد القوي كتب:: أختنا وأستاذتنا رانيا

موضوع يبدوا في ظاهره مرح

ولكن في باطنه يحمل الكثير من الدهاء السياسي

ضحكت فيه من قلبي

شكرا لك ولأطروحاتك القيمة

اضحك الله سنك دائما
استاذي الفاضل
وحقيقي دي طبيعة اغلب الشعب المصري البسيط
مش فاهم حاجة في اي حاجة
او عامل عبيط عشان يعيش
ربنا يعديها على خير
سعدت بقراءتك للموضوع
وتحليلك له

عن جد موضوع في المليان وجاء في وقته بالتمام
مودتي

أطلس كتب:: عن جد موضوع في المليان وجاء في وقته بالتمام
مودتي

اهلين بك اطلس
نورت الموضوع بطلتك
شكرا جزيلا

هههههههههههههههههاي
موضوع في العضم يا استاذه خلاني مش مجمع كلمتين علي بعض
لأن كل اللي نفسي قالهم المواطن

حماده قرني صلاح كتب:: هههههههههههههههههاي
موضوع في العضم يا استاذه خلاني مش مجمع كلمتين علي بعض
لأن كل اللي نفسي قالهم المواطن

ايون المواطن المطحون يا استاذ حمادة
هو انا وغيري كتيييييييير
اللي فاهم ومش فاهم
واللي بيحول المهزلة لسخرية بيضحك عليها لوحده
يلا ..الحمد لله انها ماشية بستر من الله
نورتني بجد وسعدت بوجدك

بيان هام

بصفتي الحاكم العسكري للمنتدي فقد تقرر تكليفك بإحضار موضوع آخر نظرا لشعبية هذا الموضوع الملحوظة

انتهي البيان

» نداء إلى القضاء المصرى العادل .. من المواطن حمادة قرني صلاح
» مهلبيه بالقمح المطحون للاطفال من 6 شهور
» اكد الموقع الرسمى لاتحاد الكرة المصرى لكرة القدم ان وزير الداخلية وعد بعودة الدورى العام المصرى اوائ
» وزاره دلع المواطن
» حبيبي المواطن