مختارات من أشعار الشاعر عصام المصرى

الشاعر عصام المصرى

هو الشاعر المصرى عصام المصرى

ذو القصائد المصرية الأصيلة من أعاد للقصيدة العامية المصرية

ما افتقدته من ملامحها فقد أعاد لها بقصائده ما أفتقدته

بياع الترمس

بياع ترمس
مرة بقولة
هتالي يا عم
بـ نص جنية
قالي ياباشا
طلبك حاضر
واتفضل يا سعادتة البية
عندي ياعم الحاج سؤال ؟؟؟
لو تسمح تجاوبلي علية
هو صحيح الترمس
لما تبلة يزيد النص؟؟؟؟
قالي ياابني اقعد جنبي
اسمع ياابني كلامي وبص
اصل الرزق دا ربنا قسمة
والارزاق مش بس المال
قلت ياعم الحاج شاركني
قال متأ سف
اصل شريكي
الحاج
جمال

البنت بنتى

البنت بنتى
حنينة وآخر لماضة
غصب عنها
بقت بليدة فى التاريخ
وغصب عنها برضة
شاطرة فى الرياضة
بنت أبوها
بس لما يبكى أخوها
تبقى أم
وتبقى أخت
وتبقى دادة
ولما أخاصم أمها
بتستلم هى القيادة
تيجى جنبى وتلاغينى
كأنى طفل
وأمى قعدة بتدادينى
بابا تشرب شاى معايا
ولا أحكى لك حكاية
حضرتك
قهوتك مضبوطة والا
تحبها سكر زيادة
ولما تقلب كل حاجة
فى كل حاجة
كلنا نضحك ونرجع
نملا تانى البيت سعادة

من يومين وانا كنت قاعد فى العصارى

من يومين وانا كنت قاعد
فى العصارى الشاى بايدى
جاللى ابنى قال يا ابويا
يعنى ايه وطن الغلابه
قلت وطن الغلابه يعنى
مصر
هيه امك هيه امى ست الكل فى كل عصر
هيه اصلك هيه فصلك
هيه اسمك هيه رسمك
واللى باقى من ملامحك
لمسه من ايدها الكريمه

اصل امك دى عظيمه
لما حط الاحتلال
والشجر اصفر يا ابنى
وفى جذوعه دب فجأه الانهيار
شجرة مصر فجأة طرحت
وكان ثمارها الأنتصار
قلنا ان الدنيا حلوة
بكرة ياما تروق وتحلى
جم كلابها من جحورها
مصوا دمها اللى سايل
من عروقها
قهرو ناسها
زادوا خوفها
دبحوا ناسها
قال يا با با وفين كبيرها
فين رئيسها وفين زعيمها
قلت يا ابنى خلاص كفايه
بزياداك فى الحكايه
خش نام واخفى شويه
عن عينيا وعن ايديا

سيرة "عم عبده العربجي"
--------
جارْنا راجل عربجى .. و حْمارْته عَرْجَا .. وِ اسْمُه " عَبْدُهْ "

الزمن راسم على جْبِينُهْ شَقَا .. وْ قوَّه فْ سَوَاعْده

كل يوم الصبح يسرح .. و الترانزستور فى يَدُّه

يسمع النشره بْرَوَاقَهْ .. وِ انْ سِمِعْ " ثومهْ " يا سَعْده

*******

يوم بِقُولْ لى :" بَسّ لو تقدر حمارْتى .. كات تطيرْ

توصل الجولان و سوريا .. وْ تِوْصَل القدس الأسير

كات ترَفَّسْ كل ندل انْ كان صُغَيَّرْ أو كبير "

قلت آه يا عم عبدهْ ... لو جميع الناس حِمِير !!

*******

يوم بِيِسْأَلْنِى :" لماذا العربجيه بْدون نقابه ؟

ولاَّ يعنى حَقِّنا يفوتنا عشان ما احْنا غلابه ؟! "

قلت :" حاولوا وْ طالْبوا بيها " .. بَصّ بِعْنِيه الطَّيَابَه

قال :" ما انا يا صاحْبى عارف .. بَسّ خايف مِ الرقابه !!!

*******

ربنا عدِّل لُه حاله وْ جاب له تِلْفِزْيُون صُغَيَّر

و اتقلب حاله ف ثوانى .. و اللِّى حاصل شىء يحير

يقضى طول الليل قصاده .. وْ حجّتُهْ :" لازم نِغَيَّرْ "

كنت بيهْ فرحان تَمَلِّى ... و الفرح عمرهْ قصيَّر

*******

جانى يوم فرحان مِزَقْطَطْ .. و ف إيديه السُّمْر ( فيزا )

قال :" مسافر " قلت :" ليه ؟! " قال :" السفر له ألف ميزه

نفسى تجرى البليه و اكسب كلّ ساعهْ كام بريزه

و اغْتِنِى .. و العشه تصبح قصر فى أيَّام وجيزه "

*******

مرِّت الأيام .. سألنا عنه .. قالوا :" إشّ إشّ "

رزقه جاىّ لْحَدّ عنده .. سهل .. من غير ( شِى ) و ( هش )

الفلوس فى البنك تطرح .. و النعيم ادَّى لُه وِشّ

باع حمارْتُه الْعرجا وِ الْعِشَّه الْقديمه ... وْ جاب له دِشّ

*******

ألف فيلم .. وْ ميت مُسَلْسَلْ .. كل واحد له مَعَادُهْ

عم عبده الدش آسرُه .. وْ ليل نهار قاعد قُصَادُهْ

و اتْنَسِتْ " ثومه " وْ نقابْةِ الْعربجيه قْصَادْ فَسَادُهْ

و الإيدين الخِشْنَه نِعْمِتْ ... و الْمِسَا هَلّ بْسَوَادُهْ

*******

لو هاتسأل أىّ واحد عن حكايةْ عَمّ عَبْدُهْ

كان يقولْ لَكْ إنه مصرى عصرى .. بسّ العصر عانْدُهْ

تاه فى وسط الزحمه عقلهْ .. و الْتَقَى فى التوهه وعده

و انتهت أحلام حياته .. زَىّ طفل وْ مَاتْ فى مهده

» مختارات من أشعار الشاعر سعيد أحمد
» مختارات من أشعار الشاعرة وفاء صابر
» مختارات من أشعار .. الصحفية سلوى فتحى
» صدور مختارات من أشعار جلال الدين الرومى
» مختارات من شعر الشاعر عبدالله الجعيدى